RONDA PROBINSYA

Nalubog sa baha ang ilang bahagi ng mindanao bunsod ng malakas na ulang dala ng monsoon trough (trap).

Kabilang sa binaha ang mga bayan ng isulan, sultan kudarat at tantangan, south cotabato kung saan abot dibdib ang tubig.

Nasa 250 pamilya na ang inilikas habang ekta-ektaryang palayan ang nalubog.

Isang lalaki naman ang sugatan matapos bagsakan ng puno ang kanyang tricycle sa isulan. —sa panulat ni Drew Nacino

Patay ang dating presidente ng University of Eastern Philippines matapos pagsasaksakin sa loob mismo ng kanyang bahay sa Catarman, Northern Samar.

Nadiskubre ang katawan ng biktimang si Rolando Delorino, 64 anyos ng kanyang anak na babae sa kusina sa ground floor ng kanilang bahay sa Barangay Dalakit, mag-aala-6, kahapon ng umaga.

Agad namang nasakote ang suspek na si Alvin Plandez, 22 anyos na umamin sa krimen pero iginiit na pinilit umano siya ng isang commander ng New People’s Army na patayin ang biktima.

Ayon kay Northern Samar Provincial Police Director,Col. Arnel Apud, nagbanta umano ang NPA Commander na papatayin ang pamilya ni plandez kung hindi papaslangin si delorino.

Batay sa CCTV footage, nakita si Plandez sa labas ng bahay ng biktima, dakong ala-5 ng madaling araw at tinakpan ang mga camera bago pumasok sa tahanan ng mga delorino. —sa panulat ni Drew Nacino

Inihatid na sa kanilang huling hantungan ang magpinsang sina Far Eastern University football player Kieth Absalon at Nolven Absalon.

Libu-libong Masbateños, kabilang ang kanilang pamilya’t mahal sa buhay, ang dumalo sa necrological service sa Masbate Baptist Church bago ang funeral procession sa Barangay Kalipay.

Nasawi ang magpinsan noong nakaraang linggo matapos masabugan ng landmine na itinanim ng New People’s Army (NPA) sa Brgy. Anas, Masbate City.

Matatandaang nangako ng hustisya si Pangulong Rodrigo Duterte sa pamilya ng football player nang lumabas sa imbestigasyon na bukod sa nasabugan ng improvised explosive device (IED) ay binaril pa umano ng mga salarin ang mga biktima.

LOOK: Magpinsang Keith at Nolven Absalon, inihatid na sa huling hantungan sa Masbate | via @jaymarkdagala pic.twitter.com/IYdlohhDhS

— DWIZ Newscenter (@dwiz882) June 13, 2021

Nakaranas ng pangangati ng lalamunan ang mga residente ng tatlong barangay sa bayan ng Agoncillo, sa lalawigan ng Batangas matapos magbuga ng asupre o sulfur dioxide ang Bulkang Taal.

Ayon sa Philippine Institute of Volcanology and Seismology (Phivolcs), maging ang pananim ng mga naninirahan sa mga barangay ng banyaga, bilibinwang at Subic Ilaya ay nanuyot o tumigas dahil sa pangyayaring ito.

Pahayag ng Phivolcs, mahigit 9,000 tonelada ng sulfur dioxide ang ibinuga ng taal sa nakalipas na dalawang araw.

Pinaalalahanan naman ng ahensya ang mga residenteng malapit sa bulkan na palaging magsuot ng face mask at uminom ng maraming tubig.

Nananatili naman sa alert level 2 ang Taal volcano dahil sa patuloy na abnormal activities na naitatala nito.

Humiling ng exemption sa liquor ban at paghihigpit sa curfew

Nanawagan ang grupo ng Philippine Chamber of Commerce and Industry sa Boracay na bigyan ng exemption ang kanilang lugar pagdating sa pagpapatupad ng liquor ban at curfew.

Nakasaad sa liham na ipinadala ng PPCI-Boracay sa tanggapan ni Governor Florencio Miraflores, hiniling ng grupo ng mga negosyante sa isla na sana’y wag nang ipatupad ang liquor ban sa pamosong tourist destination ng bansa.

Kamakailan lamang, ipinatupad ng provincial government ang liquor ban at curfew hour sa buong aklan dahil sa naitatalang pagtaas ng kaso ng COVID-19 doon.

Sinabi ng grupo ng mga negosyante sa isla, na nais sana nilang gawing ala-1 hanggang ala-5 ng madaling araw ang curfew hour mula sa kasalukuyang alas-10 ng gabi hanggang ala-singko ng madaling araw.

Layon umano nito na mas ma-enjoy ng mga turista ang kanilang pagbisita sa isla ng Boracay.

Gayunman, iminungkahi rin ng grupo na dapat na isailalim muna sa RT-PCR test ang lahat ng mga nais na magtungo sa Boracay kabilang na mga taga-Malay at mula sa iba pang mga bayan sa Aklan.

Isinugod sa isang government hospital sa Muntinlupa City ang convicted mass murderer na si dating ARMM Governor Zaldy Ampatuan matapos magkaroon ng seizure.

Ayon kay Bureau of Corrections assistant secretary Gabriel Chaclag, kinailangang isailalim sa mga pagsusuri si Ampatuan na hindi kayang isagawa sa New Bilibid Hospital na kasalukuyang under construction.

Magugunitang nakaranas ng stroke ang dating gobernador habang nasa kustodiya ng Bureau of Jail and Management Penology.

Gayunman, ito ang unang beses na isinugod sa ospital si Ampatuan simula nang ilipat sa Bilibid.

Disyembre 2019 nang hatulang guilty sa kasong 57 counts of murder kaugnay sa Maguindanao massacre si Ampatuan at kanyang kapatid na si dating Datu Unsay Mayor Andal Ampatuan Jr. — sa panulat ni Drew Nasino.