RONDA PROBINSYA

Nalito ang mga naka-close contact ng isang board member sa Guimaras matapos maglabas ng maling resulta ng RT-PCR test ang isang ospital sa Iloilo City.

Ayon kay Guimaras Board Member Cyril Beltran  nagpositibo sa COVID-19 ang kanyang nakakatandang kapatid kaya’t sumailalim siya at kanilang pamilya sa swab test.

Una aniya siyang sinabihan ng hindi pinangalanang source na nag positibo siya sa COVID-19 maging ang kanyang dalawang anak at kasambahay subalit nagulat na lamang siya na negatibo siya sa virus batay sa opisyal na resulta ng laboratory test.

Hindi naman tinukoy ng board member kung anong ospital ito kasabay nang paglilinaw na hindi niya ito kakasuhan.

Natupok ang Gaisano Grand Mall sabayan ng San Jose De Buenavista, Antique.

Nagsimula ang sunog sa roof deck ng mall sa Barangay 8, dakong ala-6 kagabi.

Ayon sa Bureau of Fire Protection, inabot ng hanggang ngayong madaling araw bago tuluyang maapula ang apoy.

Dahil sa laki ng apoy ay ilang bahagi ng ikalawang palapag ng gaisano ang nag-collapse.

Ang Gaisano Grand Mall ang kauna-unahang shopping mall sa lalawigan. —sa panulat ni Drew Nacino

Ibinalik ng isang basurero sa Pangasinan ang halos P200,000 na natagpuan niya habang nasa trabaho.

Nakita ni Reny Corpuz ang P500 na nasa tabi ng isang basura ngunit tumambad sa kanya ang isang paper bag na naglalaman ng halos P200,000.

Sa halip na itago ito sa kanyang sarili, agad na isinuko ni Corpuz ang naturang pera sa lokal na pamahalaan ng Urdaneta, Pangasinan.

Ani Corpuz, ayaw nitong itago ang perang hindi naman sa kanya at hindi nito pinagpaguran.

Naibalik ang nasabing pera sa isang establisyimento na hindi sadyang naitapon ang paper bag na naglalaman ng pera habang nagsasagawa ng general cleaning.

Dahil dito, si Corpuz ay hinangaan at agad na na-promote sa kaniyang trabaho.

Umaasa ang mga senador na mapaplantsa na ang gusot sa pagitan ng mga namumuno sa Bangsamoro Autonomous Region in Muslim Mindanao (BARMM).

Ito’y ayon kay Senate Majority Leader Juan Miguel Zubiri ay matapos mabigo ang Malakaniyang na resolbahin ang usapin ng pagpapaliban sa BARMM elections sa susunod na taon.

Ayon kay Zubiri, pumagitna kasi ang Pangulo sa kanilang naging pulong kamakalawa lalo’t at ipinunto lang niya ang magkabilang punto.

Sa panig naman ni Sen. Francis Tolentino na chairman ng senate committee on local government, mahihirapang umusad ang eleksyon sa barmm dahil hindi pa naipapasa ang electoral code nito.

Ang Bangsamoro Transition Commission (BTC) aniya ang dapat na bumabalangkas nito subalit hindi kakayanin lalo’t 100 araw na lamang at magbubukas na ang paghahain ng kandidatura.

Naghigpit na rin ng community quarantine restrictions ang Albay kasunod ng pagtaas ng bilang ng kaso ng COVID-19.

Sinabi ni Gov. Al Francis Bichara, isinailalim na ang probinsya sa general community quarantine (GCQ) simula pa noong nakaraang linggo.

Sa katunayan aniya, suhestiyon ng iba ay magpatupad ng enhance community quarantine (ECQ) ngunit kung ito ang iiral ay magsasarado na naman ang ekonomiya sa probinsya at marami na namang hanapbuhay ang maaapektuhan dito.

Aminado rin si Bichara na nahihirapan silang tukuyin ang mga tunay o posibleng COVID-19 carriers mula sa Metro Manila dahil sa mga nagpi-prisinta ng pekeng medical certificate.

Patay ang isang lalaki matapos mang hostage ng limang taong gulang na bata sa San Rafael, Bulacan.

Ayon sa mga otoridad  biglang pinasok ng suspek na armado ng baril ang bahay ng biktima na tinutukan nito at kaagad namang nakahingi ng tulong ang  magulang nito.

Sinasabing sinubukan ng mga pulis na kausapin ang suspek subalit naging bayolente ito at pinaputukan pa ang mga otoridad dahilan kaya’t binalikan siya ng mga pulis at napatay.

Nakuha sa suspek ang isang baril at pakete ng hinihinalang shabu.

Ligtas naman ang bata na isinasailalim na sa post traumatic debriefing kasama ang kaniyang magulang.