Patay ang isang high value target na kabilang sa mga tinaguriang narco-politician matapos na manlaban sa ikinasang operasyon ng PNP – Criminal Investigation and Detection Group (CIDG).
Kinilala ni PNP Chief P/Gen. Guillermo Eleazar ang nasawi na si Montasser Sabal na dating alkalde ng bayan ng Talitay sa Maguindanao mula 2010 hanggang 2013.
Ayon sa PNP Chief, may dalawang outstanding warrant of arrest laban kay Sabal dahil sa mga kasong may kinalaman sa iligal na droga at pagsusuplay ng armas sa Bangsamoro Islamic Freedom Fighters (BIFF).
Kagabi, mapayapang naaresto si Sabal ng mga tauhan ng CIDG sa port of Batangas subalit, nang-agaw umano ito ng baril habang siya’y ibinibiyahe patungong Kampo Crame.
Nagawa pang isugod sa ospital si Sabal sa San Juan, Batangas subalit idineklara rin itong dead on arrival.
Matagumpay namang naaresto ang anim pang kasabwat ni Sabal na sina Norayda Nandang, Muhaliden Mukaram, Aika De Asis, Ailyn Compania, Zuharto Monico at Wilson Santos.
Ayon kay Eleazar, naging dating pulis din si Montasser na na-assign sa Special Action Force (SAF) bago tumakbo sa pulitika.
Nabatid din na kabilang si Montasser sa mga utak ng madugong pagpapasabog sa Davao City noong 2016.
Nakuha sa kaniya ang samu’t saring matataas na uri ng armas gayundin ang apatnaraang gramo ng hihininalang shabu.
Sinabi pa ng PNP Chief na inaalam pa nila sa ngayon kung may kinalaman sa pulitika ang pagbebenta ni Montasser ng mga armas lalo pa’t papalapit na ang 2022 elections.
