RONDA PROBINSYA

Nanawagan na sa Department of Health si Oriental Mindoro Gov. Humerlito Dolor na payagan na ang operasyon ng COVID-19 testing laboratory ng ospital sa kanilang lugar.

Ayon kay DOH MIMAROPA Regional Director Dr. Mario Baquilod, hinold ng Health Services and Regulatory Bureau ang license to operate sa naturang ospital matapos hindi makapasa sa requirement health facilities na kailangan ng DOH.

Ayon sa mga health workers at mga Doctor, nahihirapan sila sa pagsasagawa ng swab test dahil ibinabiyahe pa nila ito sa Maynila mula sa kanilang lugar kung saan, inaabot pa ng hanggang limang araw bago malaman ang resulta.

Dahil dito, napupuno na ng mga pasyenteng naghihintay sa resulta ng kanilang COVID-19 test lalo na ang mga tent sa labas ng ospital at mga isolation facility.

Libre kasi ang test sa naturang ospital kaya dito madalas nagpupunta ang mga pasyente. — sa panulat ni Angelica Doctolero

Isang lalaki ang nanganganib maoperahan sa lalamunan matapos aksidenteng malunok ang kanyang pustiso sa bayan ng Numancia, Aklan.

Kinilala ng Aklan Provincial Police Office ang biktimang itinago lamang sa pangalang Berto 24  anyos, residente ng Barangay Pusiw.

Nanananghalian ang biktima ng batchoy at sa kasarapan ng pagnguya ay hindi nito namalayang nalunok na pala ang kanyang pustiso.

Agad isinugod sa Aklan Provincial Hospital si Berto habang hinihintay ang rekomendasyon ng doktor kung isasailalim ito sa operasyon.—sa panulat ni Drew Nacino

Tiklo ang tatlong indibidwal kabilang na ang dalawang estudyante sa Malabon City.

Nahuli ang tatlong indibidwal na sina Argie Tabinas, 35-anyos na isang bet collertor at organizer ng pasugalan habang ang dalawa pa ay kinilalang sina Lanz Joseph Patani, 18-anyos at Rondaznie Aldana, 21-anyos matapos isinagawa ang anti-illegal gambling operation ng mga pulis.

Ayon sa mga otoridad, nakatanggap sila ng report mula sa isang concerned citizen na may iligal na aktibidad na ginagawa ang mga hinuli.

Nakakulong na ngayon sa Malabon City Jail ang mga inaresto. —sa panulat ni Angelica Doctolero

Nagpositibo sa sakit na Corona virus desease ang sampung health workers ng Batanes General Hospital.

Ayon sa Medical Center Chief ng Cagayan Valley Medical Center na si Dr. Glen Matthew Baggao, handa ang kanilang mga hospital beds para sa mga nagpositibong health workers kung saan, isa dito ay ang doktor habang siyam naman ang health workers.

Humihingi na ng tulong ang Batanes General Hospital para maiwasan ang pagdami ng kaso ng COVID-19 sa kanilang mga tauhan.

Sa ngayon, nakatanggap narin ng ppe sets ang Batanes General Hospital mula sa CVMC habang mayroon naring kagaragdagang tent at mga beds na magagamit sa naturang hospital sa lalawigan ng Batanes. —sa panulat ni Angelica Doctolero

Kulong sa presinto ang isang aluminum installer matapos makuhanan ng baril at shabu sa ikinasang buy-bust operation ng Caloocan City Police Office.

Kinilala ang suspek na si Gilberto Meralina alyas “Boy,” 51 taong gulang na residente ng 212  Acco Homes, Brgy. 176, Bagong Silang, Caloocan City.

Sa operasyon ng mga otoridad, isang nagpanggap na pulis ang bumili ng halagang P7,500 na iligal na droga sa suspek dahilan para agad itong mahuli ng mga pulis.

Narekober sa suspek ang sampung gramo ng shabu na nagkakahalaga ng P68, 000 at isang 9mm pistol na kargado ng magazine na may apat na bala. —sa panulat ni Angelica Doctolero

Aabot sa 6.8-M na halaga ng shabu ang nakumpiska ng mga otoridad sa lalaking suspek sa Talipao, Sulu.

Ito ay matapos ikasa ang buy-bust operation ng mga otoridad sa nabanggit na lugar kung saan, kinilala ang suspek na si Elmer Dalhadi Esmiraji o mas kilala sa alyas na “Totoh”, 24-anyos.

Nahaharap ngayon sa Republic Act 9165 o Comprehensive Dangerous Drugs Act of 2002 ang inarestong suspek. —sa panulat ni Angelica Doctolero

Sinira ng mga otoridad ang aabot sa 30-M halaga ng marijuana matapos madiskubre sa tatlong lugar sa Sadanga, Mountain Province.

Ayon kay PNP Chief Police General Guillermo Eleazar, ang nadiskubreng iligal na droga sa tatlong tagong lugar ay aabot sa 15,200sq/m na lupain.

Base sa report ng Cordillera Regional Director Police Brigadier General Ronald Lee, 152,000 fully-grown marijuana plants ang nadiskubre sa lugar. —sa panulat ni Angelica Doctolero

Patay ang sampung taong gulang na batang lalaki matapos ang pananaksak ng kaniyang sariling ama sa Barangay Culalabo Del Sur, Burgos, Isabela.

Kinilala ang suspek na si Sergie Estela, 35-anyos na sinasabing may problema sa pag-iisip habang ang biktima naman ay kinilalang si Arjay Estela.

Ayon sa mga kapitbahay, nakarinig umano sila na humihingi ng pasensya si Sergie Estela sa kaniyang anak na nagtamo ng apat na saksak sa kaniyang katawan.

Matapos ang pananaksak ay sinubukan ding magpakamatay ng ama ng biktima sa pamamagitan ng paglaslas ng kaniyang leeg pero agad itong napigilan.

Isinugod pa sa ospital ang biktima pero idineklara ding dead-on-arrival.

Napag-alaman na nagmomodule ang biktima ng saksakin ng kaniyang ama.

Sa ngayon ay patuloy pang nakikipag ugnayan ang mga otoridad sa ina ng biktima na nasa abroad. —sa panulat ni Angelica Doctolero

Nahuli ng mga otoridad ang isa sa dalawang lalaking suspek sa serye ng panghohold-up sa Pasig City.

Ayon sa Pasig City Police Office, nagsagawa ang kanilang tauhan ng oplan sita sa kanto ng agustin at E.Santos kung saan, hinarang ang isang motorsiklong walang plaka.

Nang sitahin ng mga otoridad ang suot na bag ng mga rider ay agad silang umatras at tumakas.

Tinutukan pa umano ng baril ng isa sa mga suspek ang isang pulis at nakipambuno.

Dito na pinaputukan ng baril ng mga pulis ang kaliwang paa ng suspek na kinilalang si Jason Trinidad at agad na nahuli habang nakatakas naman ang isa pang suspek na kinilalang si Alex Almuela na patuloy pang pinaghahanap ng mga otoridad.

Nabatid na ang dalawang nahuli ay suspekdin sa panghohold-up sa isang palengke at isang gasolinahan sa naturang lugar. —sa panulat ni Angelica Doctolero

Arestado ang isang 72-anyos na lola matapos makumpiskahan ng iligal na droga at baril ng mga tauhan ng Taguig City Police Office.

Ayon sa mga otoridad, nagkasa ng buybust operation ang  Station Drug Enforcement Unit sa bahagi ng Brazil Street sa Barangay Napindan, Taguig City.

Sa imbestigasyon ng mga pulis, aabot sa 150g o P1-M ng shabu ang nakuha mula sa suspek.

Inaalam na ng Taguig City Police ang kung sino ang supplier ng lola na nahaharap sa kasong paglabag sa Comprehensive Dangerous Drugs Act of 2002 at Comprehensive Firearms and Ammunition Regulation Act. —sa panulat ni Angelica Doctolero