RONDA PROBINSYA

Nakatanggap ng ayuda ang ilang mga residente sa Calamba, Laguna sa tulong ng isang residente na nagbukas ng community pantry sa kanilang lugar.

Ito ay para matulungan ang mga residenteng nasalanta ng bagyo at nawalan ng trabaho bunsod ng pandemiya.

Samantala, sa naging pahayag naman ni DILG Secretary Eduardo Año sa Talk to the People ni Pangulong Rodrigo Duterte kagabi, sinabi niya na 18 LGUs na ang nakakumpleto sa distribusyon ng ayuda. —sa panulat ni Angelica Doctolero

Nadagdagan ang bilang ng mga nasawi dahil sa COVID-19 sa lalawigan ng Bohol.

Batay sa datos ng Bohol Inter-Agency Task Force (BIATF), umakyat na sa 401 ang bilang ng mga nasawi sa COVID-19 sa probinsya.

Kaugnay nito, hinikayat naman ang mga residente na sumunod sa minimum health standards.

Sa ngayon, umabot na sa 16,814 ang kabuuang bilang ng mga kaso ng COVID-19 sa lalawigan, na may 2,165 active cases.

Ayon pa sa BIATF, okupado na rin ang lahat ng COVID Intensive Care Unit (ICU) beds sa tertiary hospitals sa Bohol, at maging ang mga COVID isolation bed. —sa panulat ni Hyacinth Ludivico

Mahigpit nang ipinagbabawal ng lokal na pamahalaan ng Siargao ang pagsasagawa ng party sa bayan ng General Luna.

Ito’y matapos makatanggap ng reklamo mula sa mga residente ng umano’y kabi-kabilang party kasunod ng pagbubukas ng lugar sa mga turista.

Ayon kay Arcely Gallentes, Municipal Tourism Officer, bagama’t pinayagan nang makapasok ang mga byahero mula sa Metro Manila, mahigpit pa ring ipinatutupad ang liquor ban at mga pagsasagawa ng party at videoke.

Umiiral din aniya ang curfew hour mula 9pm hanggang 5am.

Tiniyak naman ni Gallentes na may mga pulis nang magro-ronda upang masigurong sumusunod ang mga residente at turista sa mga ipinatutupad na panuntunan.

Diversionary Tactics ng mga bandidong BIFF at Dawlah Islamiyah, personal na pag-atake at Pulitika.

Iyan ang 3 anggulong pinag-aaralan na ngayon ng Militar hinggil sa nangyaring pagpapasabog sa isang covered court sa Datu Piang, Maguindanao nitong weekend.

Ayon kay Army’s 6th Infantry Division at Joint Task Force Central Spokesman Lt/Col. John Paul Baldomar, nagmula sa isang Improvised Explosive Device o IED ang sanhi ng pagsabog.

Kalimitang ginagamit aniya sa Central Mindanao ang mga signature bomb kaya’t hindi nila ini-aalis ang posibilidad na pakana ito ng BIFF o Dawlah Ilamiyah para malihis nito ang atensyon sa kanila ng Militar.

May natanggap ding pagbabanta ang isang grupo ng LGBT sa lugar na nagsagawa ng volleyball tournament bago pa man ang pagsabog.

Maaari rin aniyang may kinalaman iyon sa Pulitika dahil sa itinuturing “Hotspot” ang naturang bayan tuwing may halalan.

8 ang naitalang sugatan sa nangyaring pagsabog kaya naman nakikipag-ugnayan ang Militar sa Pulisya para tugisin ang mga nasa likod ng insidente. —sa ulat ni Jaymark Dagala (Patrol 9)

Humirit ng time-out ang mga health care worker ng Ilocos Sur sa pamamagitan ng pagpapapatupad ng Enhanced Community Quarantine (ECQ) sa lalawigan dahil sa patuloy na pagdami ng kaso ng COVID-19.

Ayon kay Dr. Jun Tagorda, Presidente ng Ilocos Sur Medical Society, kabilang sa mga humiling ng 14-day time-out sa pamahalaang panlalawigan ng Ilocos Sur ang Ilocos Sur Medical Society, Southern Ilocos Sur Medical Society, Municipal Health Officers, Philippine Nurses Association–Ilocos Sur, Philippine Hospital Association – Ilocos Sur Chapter, Private Hospitals Association at iba pang grupo ng mga doktor.

Kulang, pagod at halos magkasakit na ang mga health care worker dahil sa patuloy na pagtaas ng kaso at halos puno na rin ang mga ospital.

Sakaling aprubahan ang kanilang hiling, titiyakin niya aniya na magtratrabaho pa rin sila sa kabila ng ipatutupad na lockdown.

Sinabi naman ni Dr. Trina Tabboga Talaga, Chief of Hospital ng Ilocos Sur Provincial Hospital Gabriela Silang na sa ngayon ay pinag-aaralan pa ang hiling na “time-out” ng mga health worker. —sa panulat ni Hyacinth Ludivico

Nakapagtala nitong sabado ang Baguio City ng 411 dagdag na kaso ng COVID-19, ang pinakamataas na bilang ng mga bagong kaso sa isang araw.

Ayon kay Mayor Benjamin Magalong, bunsod ito ng pagbaba ng nakukuhang resulta sa laboratoryo dahil sa dami ng specimens na pinoproseso araw-araw.

Aniya, umaabot na sa 2,000 tests ang isinasagawa kada araw kasunod ng muling pagtaas ng COVID-19 cases at Delta variant cases sa lungsod.

Sinabi pa ni Magalong na patuloy nilang tinututukan ang mga lugar na may mataas na mga kaso. —sa panulat ni Hyacinth Ludivico

Isang doktor ang patay matapos pagbabarilin sa bayan ng Pilar, Abra.

Kinilala ng Pilar Municipal Police ang biktimang si Dra. Trina Dait, residente ng Barangay Poblacion at naka-destino sa La Paz District Hospital.

Naisugod pa sa Abra Provincial Hospital ang doktor pero kalauna’y binawian din ng buhay.

Pasado alas-7 ng nang makarinig ng sunod-sunod na putok ng baril ang mga otoridad mula sa naturang lugar na ilang kanto lamang ang lapit sa himpilan ng pulisya.

Narekober naman sa crime scene ang limang basyo ng bala ng M16 armalite rifle.

Blangko pa ang mga pulis kung ano ang motibo sa krimen at kung sino ang nasa likod nito.—sa panulat ni Drew Nacino

Suspendido ang operasyon ng pampublikong sasakyan sa Davao Occidental simula sa Lunes,  Setyembre 20 hanggang 26.

Ito ayon sa direktiba ni Davao Occidental Governor Claude Bautista ay para maiwasan ang pagkalat ng COVID-19 sa lalawigan.

Setyembre 27 na balik operasyon ang public transportation sa Davao Occidental bagamat limitado sa 50% seating capacity.

Bukod sa suspensyon ng public transportation, epektibo rin sa Davao Occidental ang curfew mula 9pm-4am bagamat exempted ang APOR, liquor ban mula 7pm-4am at no movement o walang paggalaw sa araw ng Linggo.

Hanggang kahapon, Setyembre 17, ang Davao Occidental ay nakapagtala ng 2, 618 COVID-19 cases kung saan 749 ang active cases, 1, 804 ang naka-recover at 65 ang nasawi.