RONDA PROBINSYA

Naabot na ng limang ospital sa Baguio City ang full capacity ng mga pasilidad nito dahil sa patuloy na pagtaas ng kaso ng COVID-19.

Ayon kay Baguio Health Officer Dr. Rowena Galpo, nito lamang nakaraang linggo ay naitala sa lungsod ang 289 na bagong kaso ng virus.

Ito aniya ay mas mataas sa naitalang surge o pagsipa ng kaso na kanilang naitala noong Abril ngayong taon.

Paliwanag ni Galpo na sa kabila ng full capacity ng mga ospital sa lungsod ay kanilang ginagawa ang lahat ng makakaya para mabawasan ang mga naka-admit sa ospital para makatanggap muli ng mga dinadapuan ng COVID-19.

Sa huli, iginiit na ito ang dahilan kung bakit mahalaga ang pagbabakuna kontra COVID-19 para sa karagdagang proteksyon.

Nakapagtala ng record high na bilang ng nasawi dahil sa COVID-19 sa loob ng isang arawang Cordillera Administrative Region (CAR) nitong linggo.

Ayon sa Department of Health – CAR, 23 ang nadagdag sa bilang ng mga nasawi kung saan walo dito ay mula sa Bagiuo City; anim sa Benguet; apat sa Apayao; tatlo sa Abra at dalawa sa Mountain Province.

Dahil dito, umakyat na sa 1,034 ang kabuuang bilang ng mga namatay dahil sa virus sa rehiyon.

Umabot naman sa 6,695 ang COVID-19 active cases kung saan pinakamaraming naitala sa Baguio at Benguet.

Sinabi naman ni Dr. Donnabel Tubera-Panes, pinuno ng Baguio City Epidemiology and Surveillance Unit (CESU), na dapat nang magpatupad ng bubble para sa vulnerable persons at ipagbawal ang mga bisita upang mapigilan ang pagkalat ng COVID-19. —sa panulat ni Hyacinth Ludivico

Arestado ang 53 katao dahil sa pagsasagawa ng “rap battles performances” at lumabag sa mass gathering sa Barangay Mohon, Arevalo, Iloilo City.

Ayon kay Police Captain Chen Tañagras, hepe ng Arevalo Police Station, binigyan ng citation ticket ang mga violator.

Kinandado na rin aniya ang establisyemento na napag-alamang nagbebenta rin ng mga alak.

Wala umanong alam ang mga barangay official sa nangyayari sa loob ng establisyemento dahil ang permit nila ay pagbebenta ng motor. —sa panulat ni Hyacinth Ludivico

Timbog ang dalawang suspek na nambudol sa isang babae na nakunan ng celfon sa Sta Ana, Maynila.

Nakita sa CCTV ng Barangay 874 ang paglalakad ng tatlong babae na sa kanto ng Tejeron at Revillen Street at tila magkakaibigan dahil nag uusap.

Subalit napag alamang hindi kilala ng biktimang si alias Angel, 22 anyos ng Tanza, Cavite ang dalawang babaeng kasama nitong naglalakad at naimbitahan lamang ng kanyang kaibigan ang biktima na magpunta sa Maynla.

Pagdating sa meeting place, ang mga suspek ang nakipagkita kay Angel na sinabihan nilang pupuntahan nila ang kaibigan nito.

Nagtiwala naman si Angel at ibinigay sa isa sa mga babae ang kanyang celfon na nagkakahalaga ng halos P40,000.

Bagamat nakaalis kaagad ang isang suspek, naharang ni Angel ang isa pa kaya’t nasaklolohan siya ng taga barangay na sa follow up operations katuwang ang mga pulis ay natimbog din ang isa pang suspek.

Kakasuhan ng theft ang mga suspek na pawang miyembro ng Commando Gang.

Nakatutok pa rin sa ngayon ang mga health workers sa kalagayan ng mga kaanak ng isang nurse sa Iloilo na dinapuan ng COVID-19.

Ayon sa mga awtoridad, kinilala ang naturang nurse na nagtatrabaho sa Representative Pedro Trono Memorial District Hospital sa Guimbal sa Iloilo.

Mababatid na dumalo ng isang birthday party ang nasabing nurse at nang bumalik sa ospital ay napag-alamang positibo na virus.

Kasunod nito, agad na nagsagawa ng contact tracing ang mga awtoridad ay lumabas na positibo na sa COVID-19 ang 13 mga kaanak nito na kasalukuyan namang naka-quarantine na.

Nalubog sa baha ang 31 barangay sa Pikit, North Cotabato matapos umapaw ang Pulangi River.

Ipinabatid ni MDRRMO Pikit Officer Tahira Kalantongan na wala namang inilikas dahil sanay na rin ang mga residente sa pag apaw ng Pulangi River at maging ng Liguasan Marsh.

Gayunman, tiniyak ni Kalatongan ang mahigpit na monitoring sa 21,000 pamilyang naapektuhan ng baha.

Isa na lang ang binabantayang kaso ng COVID-19 sa Batanes.

Ito ayon kay Dr. Allan Sande, Provincial Health Officer ng Bataan ay tinatawag nilang breakthrough infection sa isang senior citizen na kaagad nilang ipinasok sa isolation facility at ginamot ang ubo nito.

Sinabi ni Sande na umaayos na rin ang kalagayan ng nasabing 71 taong gulang na pasyente na residente ng Itbayat at dumating sa lalawigan noong Setyembre 1.

Iiklian ng Cebu Provicial Government ang quarantine period para sa mga OFW na uuwi sa lalawigan.

Gayunman, ipinabatid ni Cebu Governor Gwendolyn Garcia na kailangang fully vaccinated ang returning OFW para sumailalim sa bagong lima mula sa pitong araw na quarantine period.

Sinabi ni Garcia na kailangan pa ring sumailalim sa RT PCR test ang returning OFW matapos ang quarantine period at papayagan lamang umuwi sa kani kanilang pamilya kung magne negatibo sa swab test.

Patay ang isang lalaki sa landslide sa loob ng isang resort sa Batangas.

Iyan sa kasagsagan ng pananalasa ng bagyong Jolina nitong Miyerkoles.

Ayon sa pamunuan ng resort, nasa lunch break at nagpapahinga ang biktima kasama ang mga katrabaho nito sa kanilang barracks ng matabunan ng bahagi ng lupa mula sa slope ang pansamantalang tinutuluyan ng mga ito.

Nakatakbo naman ang iba nitong kasamahan at kasalukuyan pang kinikilala ang biktima.

Nangyari ang insidente sa ginagawang bahagi ng resort ayon sa pamunuan nito.—sa panulat ni Rex Espiritu