RONDA PROBINSYA

Patay matapos tambangan ang konsehal ng bayan ng Liloy, Zamboanga del Norte.

Kinilala ni Liloy Police Chief, Major Alexis Bahunsua, ang biktimang si Ernesto Bihag Jr., 46 anyos, residente ng barangay Causwagan.

Ayon kay Bahansua, minamaneho ni bihag ang isang puting toyota fortuner patungong barangay communal nang gitgitin ng maroon na toyota innova sa highway at pinaputukan ng mga lalaking sakay nito.

Matapos nito ay bumangga naman ang sasakyan ng konsehal sa puno ng kamagong.

Nagtamo ng tama ng bala sa iba’t ibang bahagi ng katawan ang biktima at naisugod pa sa ospital pero hindi na ito nakaabot ng buhay.

Inaalam na ng pulisya ang motibo sa pamamaslang at sino ang nasa likod nito.—sa panulat ni Drew Nacino

Isang negosyanteng nagpapautang ng pera ang patay matapos pagbabarilin ng isang hindi kilalang salarin sa Antipolo City, Rizal.

Kinilala ang biktimang si Teodoro Virgilio Castellon habang nakatakas ang gunman.

Ayon sa Antipolo City Police, nasa loob si Castellon sa kanyang pag-aaring Castellon Poultry Supply sa Sitio Malaking Parang, Barangay San Jose nang maganap ang insidente.

Bigla umanong sumulpot ang hindi nakilalang lalaki at pinaulanan ng bala gamit ang hindi pa mabatid na kalibre ng baril sa iba’t ibang bahagi ng katawan si Castellon na agad nitong ikinamatay.

Inaalam na ang motibo sa pamamaslang at kung may kaugnayan ito sa negosyo ng biktima maging ang pagkakakilanlan ng salarin.—sa panulat ni Drew Nacino

Nadagdagan pa ng apat na lugar sa Quezon City na nasa ilalim ng special concern lockdown dahil sa pagsirit ng kaso ng COVID- 19.

Dahil dito, ipinabatid ng QC government na limamput tatlo nang lugar sa lungsod ang naka lockdown.

Kabilang sa mga bagong isinailalim sa lockdown ang Bansalangin street, Barangay payatas, tatlong lugar sa area 6, luzon avenue, Barangay Old Balara, isang lugar sa Molave street, Barangay Payatas at isang lugar sa road 1, Barangay Bagong Pag- asa.

Sa pinakahuling record ng QC City government, nasa halos sampung libo na ang aktibong kaso ng COVID- 19.

Tuluy tuloy naman ang pagbabakuna sa Quezon City kung saan mahigit 3.1 million na ang natuturukan kontra COVID 19.

Arestado sa buy-bust operation sa Taguig City ang isang 72-anyos na lola matapos makumpiska ang mahigit isang milyong halaga ng hinihinalang shabu kasama ng isang baril at magazine.

Kinilala ang suspek na si Vilma Ajili Isani alyas “madam” matapos nitong pagbentahan ang isang anti-narcotic agent ng limampung libong halaga ng shabu.

Nahaharap ngayon sa kasong paglabag sa section 5 (sale of dangerous drugs) section 11 (possession of dangerous drugs), kasong Article II ng Republic Act of 9165 (Comprehensive Dangerous Drugs Act of 2002) at RA 10591 (Comprehensive Firearms and Ammunition Regulation Act) ang suspek.—sa panulat ni Angelica Doctolero

Patay ang 66 years old na lola matapos masagasaan ng isang tricycle sa San Pablo City, Laguna.

Sa imbestigasyon, naglalakad ang biktimang kinilalang si Rosalina Gabriel Bitoin sa gilid ng kalsada at akmang tatawid ng masalpok ng naturang sasakyan.

Dahil sa lakas ng pagkakabangga sa biktima ay tumilapon ito dahilan ng kaniyang agarang pagkamatay.

Nakakulong na ngayon ang suspek na kinilalang si Francis Allan Alcantara 41-anyos matapos sumuko.—sa panulat ni Angelica Doctolero

Patay ang dalawang drug suspek matapos makaengkwentro ang mga tauhan ng Philippine National Police o PNP sa purok 4, Barangay Calero, Bulacan.

Sa imbestigasyon ng mga otoridad, gumanti ang mga pulis matapos magpaputok ng baril sa checkpoint ang mga suspek sakay ng motorsiklo.

Dito na hinabol ng mga otoridad ang mga suspek na kinilalang sina, Paciano Bandola III, 31-anyos at Reynaldo Robin Bandola Jr., 29-anyos.

Nakuha sa mga suspek ang mahigit kalahating milyon na halaga ng shabu, dalawang kalibre.45 baril, isang 9mm sub machine gun, mga bala at magazine.—sa panulat ni Angelica Doctolero

Nanawagan ng tulong ang ina ng siyam na buwang gulang na bata na nakalunok ng push pin.

Ayon sa ulat, nasa milktea shop sa Kidapawan City ang mag-ina nang hindi nito namalayang nakuha pala ng bata ang isang push pin doon at isinubo ito.

Sinubukan pa ng ina na kunin ang push pin ngunit tuluyan na itong nalunok ng bata.

Matapos magpa-x-ray, nakitang nasa bituka na ng sanggol ang pin.

Ayon sa Doktor, kailangang ma-operahan ang bata kung hindi natural na mailabas ng bata ang pin sa loob ng tatlong araw.

Tinatayang aabot sa 50,000 pesos hanggang 100,000 pesos ang magagastos sa pagpapagamot at operasyon ng bata.—sa panulat ni Hya Ludivico

Arestado ang limang drug suspekts sa magkahiwalay na drug operation sa Albay at Camarines Sur ayon sa report ng pulis ngayong linggo.

Sa pahayag ni Bicol Police Spokesperson, Police Major Maria Luisa Calubaquib, nakuha sa mga suspekts ang ilang sachet ng shabu (crystal meth).

Kinikilala sina Garry De Lima, 30 taon gulang at si Marvin Moreno, 27 gulang na parehong residente ng barangay  Mabolo at  high-value targets ng pulisya, na nahuling nagbebenta ng shabu mga ala-1 ng hapon sa kanilang village.

Kasunod dito, nadakip din si Allan Lanuzga, 46 taon gulang, pangwalo sa high-value targets at nahuling nagbebenta sa isang drug agent sa barangay Abella, mga 7:50 ng gabi.

Sa Tobaco City, arestado sa barangay Basud si Lionel Colina, a.k.a Linard Ciruales, 34 taon gulang na residente ng barangay Mariroc.

At sa Polangui, Albay, nakuha ang dalawang sachet ng shabu kay John Lloyd Alpapara, 20 taon gulang residente ng barangay Sugcad.

Ani Police Major Calubaquib, ang mga arestadong suspeks ay nasa Police Custodial habang naghihintay ng formal complaint sa pagbebenta ng illegal na droga sa ilalim ng Comprehensive Dangerous Drug Act of 2002. —sa panulat ni Airiam Sancho

Nagpositibo sa COVID-19 ang 19 na seminarian at staff members ng Ateneo De Manila University ngayong Martes.

Ayon kay Executive Director of Jesuit Communications, Fr. Emmanuel “Nono” Alfonso, isang pari ang dinala sa ospital habang ang lahat ay asymptomatic.

Suspetsya ng paaralan na ang virus ay nagmula sa staff members dahil ang mga seminarian ay hindi pinapayagan lumabas.

Sa ngayon, tatlong building ang naka locked down kasama ang Loyola House of Studies kung saan ang virus ay nagmula. —sa panulat ni Airiam Sancho

Arestado ang 250 katao sa pagsalakay ng National Bureau of Investigation (NBI) sa isang iligal na online sabong sa San Leonardo, Nueva Ecija.

Ayon kay Atty. Emeterio Donggalo Jr., pinuno ng nbi-Special Project Team, nakatanggap sila ng reklamo sa isa mismong lehitimong operator ng E-Sabong sa bansa kaya sila nagsaggawa ng pagsalakay.

Ani Donggalo, halos kaparehas lang ang aktibidad ng iligal sa legal na E-Sabong, ngunit nagkakatalo ito sa hindi pagbabayad ng prangkisa ng mga iligal na online sabong.

Nakumpiska sa lugar ang libo-libong pera na ginamit pangtaya, mga production equipment tulad ng mga camera at computer na gamit naman sa live streaming ng sabong at mga manok na panabong.