RONDA PROBINSYA

Naghain na rin ng certificate of candidacy ang anak ng pinaslang na mayor ng Tanauan City, Batangas na si Antonio Halili.

Maagang nagtungo kahapon sa Comelec office sa lungsod si Mark Anthony Halili upang i-file ang kanyang CoC bilang kandidato sa pagka-alkalde.

Tatakbo ang nakababatang Halili sa ilalim ng partido pederalismo ng dugong dakilang samahan.

Si Halili ang panganay na anak ng dating alkalde, na binaril at pinatay sa harapan ng Tanauan City Hall habang nagfa-flag ceremony noong July 2, 2018.

Makakatapat ni Mark Anthony sa halalan si dating Congressman Sonny Collantes na kanyang ninong sa kasal habang makakalaban ng kanyang kapatid na si incumbent Mayor Sweet Halili, sa pagka-kongresista ng 3^rd district ang ninang na si Maria Theresa “Maitet” Collantes. —sa panulat ni Drew Nacino

Arestado ang tatlong itinuturing na high priority targets sa drug war matapos ang ikinasang magkakahiwalay na buy-bust operation na nasamsam ang P41.5-M halaga ng shabu sa Lapu-Lapu City, Cebu noong biyernes ng hapon.

Ayon kay Police Colonel Arnel Banzon, nahuli ng otoridad si Millanes na nakumpiskahan ng 2.1 kilo ng shabu na nagkakahalaga na P14.28 milyon, kasunod nito nakuha naman kay Reny Nabor at Rhodoro Dayuha ang 4 na kilo ng shabu na tinatayang nagkakahalaga na P27.2-M sa Sitio Mustang, barangay Pusok.

Kasalukuyan ngayong nakaditine ang mga suspek sa Lapu-Lapu City Police Station at nahaharap sa kasong paglabag sa comprehensive Dangerous Drug Act of 2002. — Sa panulat ni Airiam Sancho

Apektado ang construction ng isang P20-M housing project para sa Panay Bukidnon, Indigenous People (IP) dahil sa mega dam project sa Calinog, Iloilo Province.

Ayon kay Jalaur River Multipurpose Project (JRMP-II) Manager Engineer Jonel Borres, ang nasabing pabahay ay para sa inisyal na 35 pamilya ng Panay Bukidnon na nasa 25% na ang construction rate.

Kaugnay nito, ang P11.2-B proyekto ng tatlong magkakahiwalay na dams,   na pinangangasiwaan ng National Irrigation Administration (NIA).

Sinisiguro naman ng National Housing Authority (NHA) at NIA-6 na ligtas ang lugar.

Inaasahan na matatapos ang construction ng housing project sa 2022 na kung saan ito rin ang target na araw na matatapos ang pagpapatayo ng tatlong dam. —Sa panulat ni Airiam Sancho

Nakapagtala ng magnitude 4.8 na lindol ang munisipalidad ng Claveria, Cagayan Province.

Ayon sa PHIVOLCS, namataan ang lindol sa layong 18.7 degrees hilaga at 121 degrees silangan o limang kilometro kanlurang bahagi ng nabanggit na lugar.

May lalim ang lindol ng aabot sa limampu’t anim na kilometro at tectonic ang origin nito.

Nakapagtala naman ng intensity IV sa Claveria, Pamplona, Sanchez Mira, Abulug, At Allacapan, Cagayan; Flora, Apayao; Pagudpud, Bangui, Burgos, Pasuquin At Bacarra, sa Ilocos Norte.

Intensity III – Amulung, Alcala, Sta. Ana at Sta. Praxedes, Cagayan; Pasuquin, Laoag City, Batac at San Nicolas, Ilocos Norte.
Intensity II – Peñablanca at Tuguegarao City, Cagayan; Currimao, Ilocos Norte
Intensity I – Sinait, Ilocos Sur; Badoc, Ilocos Norte

Samantala, nakapagtala din ng instrumental intensity ang naturang lindol kung saan:

Intensity III – Laoag City, Ilocos Norte; Gonzaga and Claveria, Cagayan
Intensity I – Sinait, Ilocos Sur

Wala namang inaasahang aftershock matapos ang pagyanig. —sa panulat ni Angelica Doctolero

Aabot sa P6.8-M halaga ng shabu ang nakumpiska sa tatlong miyembro ng criminal group sa ikinasang buy-bust operation sa Parañaque City, kamakalawa.

Kinilala ang mga suspek na sina Esmail Taha Abdilla alyas Waway Taba, ng ‘Arman Apinado Robbery and Ille­Gal Drug Group’ at kabilang sa High Value Individual (HVI); Salahudin Burak Zumbaga at Amad Abo.

Maliban sa isang kilo ng shabu, nakuha din sa mga ito ang isang Ford Lynx, iba’t ibang identification cards, at dalawang cellphone.

Nahaharap sa kasong paglabag sa RA 9165 o Comprehensive Dangerous Drugs Act of 2002 ang mga suspek. —sa panulat ni Hyacinth Ludivico

Umabot na sa 523 ang aktibong kaso ng COVID-19 sa Batanes.

Sa datos ng provincial government nitong Biyernes, nakapagtala ng 14 na panibagong kaso ang lalawigan kaya’t umakyat na sa 589 ang kabuuang COVID-19 cases sa lalawigan.

Nakapagtala rin ang Batanes ng 18 bagong gumaling sa sakit dahilan upang pumalo na sa 64 ang total recoveries.

Habang dalawa naman ang naitalang nasawi dahil sa COVID-19 sa Batanes.

Muli namang pinaalalahanan ng lokal na pamahalaan ang mga residente na sundin ang minimum public health standards. —sa panulat ni Hyacinth Ludivico