Binuksan na ng Philippine Red Cross (PRC) ang ika-24 na bagong Bakuna Center hinggil sa COVID-19 sa probinsya ng La Union.
Ayon kay PRC La Union Chapter Administrator Almira Abrazado, mayroong 80 staff, 4 na physician at 10 support volunteer sa bakuna center na matatagpuan sa Rotary Service Center, Paringao.
Samantala, ang operasyon ng naturang bagong center ay de-depende sa supply ng bakuna na ilalaan ng lokal na pamahalaan. —sa panulat ni Airiam Sancho
Pinangunahan ng Department of Health (DOH)- CALABARZON ang pamamahagi ng maternity kits o “mama kits” sa iba’t ibang opisina ng probinsya.
Ayon kay Regional Director Eduardo Janairo, kabuuang 2,500 kits ang ipinagkaloob ng DOH sa rehiyon kung saan matatanggap ng bawat lalawigan ang tig-500 ng kits.
Aniya, naglalaman ang mama kits ng mga supply tulad ng bulak, cotton cloth, nail cutter, maternity pads at iba pa na makatutulong sa kaligtasan ng panganganak ng mga buntis upang maiwasan ang pagkakaroon ng impeksyon sa mga bagong silang na sanggol. —sa panulat ni Airiam Sancho
Kinumpiska ng awtoridad ang armas at mga bala ng isang kapitan sa barangay at tauhan nito sa bayan ng Talitay, North Cotabato.
Kinilala ang suspek na si Benjamin Mantol alyas “Datu mama”.
Ayon kay Major General Juvymax Uy, inatasan niya ang 90th Infantry Battalion (90-IB) at mga nasasakupang military units na magmamanman sa lalawigan dahilan para mahuli ang tauhan ng 6th infantry division (6-ID) nang mapadaan ang truck na sinasakyan sa isang checkpoint.—sa panulat ni Airiam Sancho
Patay ang mag-asawa matapos sumabog ang isang granada sa gitna ng kanilang pagtatalo sa lungsod ng Malaybalay, Bukidnon.
Sa inisyal na imbestigasyon, lumabas na kinokompronta ng asawang lalaki na si Jojit Leona ang kaniyang asawa na si Romalyn Leona dahil umano sa selos habang hawak-hawak nito ang isang granada.
Habang patuloy ang mainit na pagtatalo ay bigla na lamang sumabog ang hawak na granada ni Jojit.
Samantala, nasaktan naman sa naturang pagsabog ang lima pa kabilang ang isang bata at sanggol.—sa panulat ni Airiam Sancho
Dalawang hinihinalang biktima ng summary execution ang natagpuan sa Barangay Guis-guis Talon, Sariaya, Quezon.
Ayon sa inisyal na report ng Sariaya Municipal Police Station, nakita ng isang residente ang dalawang bangkay sa ilog na tanging damit pang ibaba lang ang suot, nakabalot ng packaging tape ang mga mukha at nakagapos ang kamay at paa.
Isa sa dalawang biktima ay babae na tinatayang 30-40 taong gulang habang ang lalaki ay tinatayang nasa 45-50 taong gulang.
Samantala, narekober ng mga pulis ang isang baril at apat na basyo ng bala sa naturang insidente.
Patuloy pa rin ang isinasagawang imbestigasyon sa pagkakakilanlan ng dalawang biktima na hinihinalang posibleng itinapon lamang sa lugar.—sa panulat ni Airiam Sancho
Tumaas ng 700% ang mga kaso ng dengue sa lungsod ng Baguio.
Ito’y ayon sa City Health Services Office (CHSO) matapos makapagtala ng 1,036 cases mula Enero 1 hanggang Oktubre 4 ngayong taon na mas mataas kumpara sa 144 cases sa kaparehong panahon noong 2020.
Pahayag ni Dr. Donabel Tubera-Panes, CHSO epidemiology and surveillance unit head, karamihan sa mga dinapuan ng dengue sa kanilang lugar ay may edad isang buwan na gulang hanggang 90 taong gulang.
Aminado si Tubera-Panes na naaalarma sila sa datos kaya’t mahigpit nilang binabantayan ang pagsirit ng mga dengue cases sa kanilang lungsod.
Huli ang 9 na indibidwal matapos ikasa ang buy-bust operation ng mga tauhan ng Philippine Drug Enforcement Agency-Region 3 sa dalawang drug den sa bahagi ng Pamintuan Village Dau sa Mabalacat, Pampanga.
Ayon sa mga otridad, nakuha mula sa mga suspek ang 25 gramo ng shabu na may street value na P170,000.
Mahaharap sa kasong paglabag sa RA 9165 o Comprehensive Dangerous Drugs Act of 2002 ang mga nahuling suspek. — Sa panulat ni Angelica Doctolero
Nailigtas ng mga tauhan ng Philippine Coast Guard ang 3 pasahero matapos masira ang bangkang kanilang sinasakyan sa bahagi ng Capones Island, San Antonio, Zambales.
Sa nakuhang impormasyon ng mga otoridad, pabalik na sana ng Noveleta, Cavite ang mga pasahero mula sa Mariveles Bataan nang magkaroon ng aberya ang bangkang kanilang sinasakyan.
Ayon sa mga otoridad, nadatnan nilang palutang-lutang ang mga pasahero makaraang tangayin ng malakas na alon dahil sa bagyong Lannie.
Nagsasagawa na ngayon ng search and rescue operations ang PCG sa naturang lugar habang inabisuhan nadin ang mga residente at mga mangingisda kaugnay sa insidente.
Sa ngayon nasa maayos na kondisyon na ang 3 pasahero. — Sa panulat ni Angelica Doctolero
Aabot sa P6 milyon na halaga ng marijuana ang nakumpiska ng Benguet Provincial Police Office sa mga naarestong drug suspect.
Kinilala ang mga suspek na sina Mary Ann Felipe Del Rosario, Simiano Tadina Patingan, at Jun Comot Colera na hinarang ng mga pulis sa isang checkpoint sakay ng Mitsubishi Montero.
Ayon sa mga otoridad, nakuhanan pa ng iligal na armas, magazine na may 7 bala ng baril ang isa sa mga nahuling suspek.
Nahaharap ngayon sa kasong Republic Act 9165 o Comprehensive Dangerous Drugs Act of 2002 at Republic Act 10591 o Comprehensive Firearms And Ammunition Regulation Act ang mga nahuling suspek.
Samantala, nagsasagawa na ngayon ng follow-up investigation at operation ang mga otoridad para alamin kung may mgasangkot pa sa iligal naaktibidad.
Pinaaalerto na din ni Philippine National Police Chief Police General Guillermo Eleazar, ang kaniyang mga tauhan upang maiwasang makalusot ang mga suspek na nagdadala ng iligal na droga sa Metro Manila maging sa iba pang lugar sa bansa. — Sa panulat ni Angelica Doctolero
Niyanig ng magnitude 5.2 na lindol ang Calatagan, Batangas kaninang 2:14 ng madaling araw.
Ayon sa (PHIVOLCS), tectonic ang origin ng lindol na may lalim na 131 kilometro.
Natunton ang epicenter ng lindol sa layong 19 kilometro hilagang kanlurang bahagi ng Calatagan.
Naitala ang intensity 2 sa Calapan City at Puerto Galera, Oriental Mindoro; Olongapo City; at Makati City.
Naramdaman naman ang intensity I sa Marikina City; Plaridel, Bulacan; Batangas City, Calatagan, Batangas; at Tagaytay City, Cavite.
Wala namang inaasahan na napinsala ang lindol at walang inaasahan na mga aftershock.—sa panulat ni Hya Ludivico