Inanod ng baha ang nasa 450 kaban ng mais sa bahagi ng barangay Asinga-via, Baggao, Cagayan sa gitna ng pananalasa ng bagyong Maring.
Ang nasabing mga mais ay inani pa umano ng mga magsasaka kung saan, hindi nila inaasahang tatangayin ito ng bagyo.
Dahil dito, kakaunti na lang ang kanilang naisalbang mais na aabot sa 20 sako.
Sa ngayon, baha parin sa nasabing lugar dulot ng bagyong Maring. — sa panulat ni Angelica Doctolero
Patay ang 3 bata sa nangyaring landslide sa Benguet.
Ayon kay Vice Governor Johnny Waguis, nakatanggap sila ng ulat na natabunan ang mga bata na may edad 2 , 6 at 8 na taong gulang.
Tiniyak naman ni Waguis na una nang nagbabala ang lokal na pamahalaan sa mga residente kaugnay sa posibleng landslide dahil sa malakas na buhos ng ulan.
Ang mga babala aniyang ito ay ipinadala sa pamamagitan ng text messages at anunsyo ng mga opisyal.
Samantala, ayon sa Provincial Disaster Risk Reduction and Management Office ng Benguet, nailikas na ang ilang mga pamilya matapos makapagtala ng pagbaha, landslides at rockslides bunsod ng malakas na buhos ng ulan.
Binawian ng buhay ang isang lalaki dahil sa pananaksak ng tricycle driver sa lungsod ng Las Piñas.
Ayon sa imbestigasyon ng pulisya, kinilala ang suspek na si Abiel Ralph Diaz, 35 taon gulang, na nakita sa crime scene matapos na pagsasaksakin ang biktima na 19 taon gulang.
Giit ni Diaz, ilang beses siyang hiningan ng pera ng biktima kaya niya ito sinaksak sa inis dahil wala naman siyang maibigay.
Samantala, nahaharap sa kasong murder ang suspek sa krimen. —sa panulat ni Airiam Sancho
Nahaharap ngayon sa kaukulang kaso ang isang pulis matapos magreklamo ang isang babaeng rider na biktima ng panghahalay.
Base sa impormasyong nakuha ng mga otoridad, hinarang umano ng suspek na si Police Staff Sergeant Robin Mangaga ang biktima na nagmamaneho ng walang lisensya.
Ayon sa biktima, papasok na sana siya sa kaniyang trabaho nang sitahin siya sa nadaanang checkpoint sa Mabalacat, Pampanga.
Nang mapag-alaman na walang dalang papeles o lisensya ang biktima, dito na isinakay ng suspek sa kaniyang sasakyan ang biktima saka idinala sa isang motel at doon ginawa ang panghahalay.
Mabilis namang nagsumbong sa pinaka malapit na himpilan ng pulis ang biktima dahilan para maharap sa kasong administratibo si Mangaga. —sa panulat ni Angelica Doctolero
Itinuturong dahilan ng ilang mga residente ang kontaminadong tubig dahilan ng diarrhea outbreak sa Barangay Manay, Davao Oriental.
Matatandaang nasawi ang nasa 6 na indibidwal habang isinugod naman sa ospital ang nasa 40.
Nabatid na sa kinuhang water samples ng mga tauhan ng Provincial Health Office (PHO) at Municipal Health Office (MHO) team, lumalabas sa imbestigasyon na mayroong nakitang Escherichia Coli na isang uri ng bacteria.
Dahil dito, isinailalim sa disinfection ang lahat ng mga water reservoir sa lugar.
Sa ngayon, pansamantalang sinusuplayan ang mga residenteng apektado ng kontaminadong tubig. —sa panulat ni Angelica Doctolero
Nasa 5 barangay sa San Miguel, Catanduanes ang naka-isolate matapos maputol ang isang daan dahil sa umapaw na spill way bunsod ng bagyong Maring.
Ayon kay San Miguel MDRRMO Head Mary Ann Teves, naputol ang bahagi ng Obo Spillway bunsod ng malakas na pag-ulan na nagdulot ng baha sa lugar.
Nabatid na hindi sementado ang naturang area at tinatambakan lamang ito ng mga lupa para madaanan ng mga sasakyan.
Kabilang sa mga barangay na naka-isolate ay ang Barangay Obo, Patagan Sta. Elena, Patagan Salvacion, Dayawa at Siay na gumagamit ngayon ng mga bangka para lamang makatawid sa ibang lugar.
Sa ngayon ay hinihintay parin ang tuluyang paghupa ng baha at inaasahan din ng mga residente na mapapalitan ng matibay na tulay ang naturang spillway upang maiwasan ang anomang insidente. —sa panulat ni Angelica Doctolero
Aabot sa 34-M halaga ng shabu ang nasabat sa ikinasang drug buy-bust operation ng mga tauhan ng Philippine National Police (PNP) at Philippine Drug Enforcement Agency (PDEA) sa bahagi ng Parañaque City.
Kinilala ang suspek na si Kenneth Vito Cruz na nahaharap sa kasong paglabag sa RA 9165 o ang Comprehensive Dangerous Drugs Act of 2002.
Ayon kay PNP Chief Gen. Guillermo Eleazar, nakatutok man ang mga tauhan ng PNP sa pagpapatupad ng minimum health standards ngayong panahon ng pandemiya ay hindi parin nila pinababayaan ang kanilang mandato na waasanang kriinalidad at iligal na droga sa bansa.
Dagdag pa ni Eleazar, patunay lamang ito na nagbubunga na ang nilagdaang kasunduan sa pagitan ng PDEA at ng kanilang ahensya para masiguro ang kaligtasan ng bawat isa.
Sa ngayon, patuloy namang nananawagan sa publiko si General Eleazar na makipagtulungan at sakaling may mapansing kakaibang pagkilos ay agad itong ireport sa kanilang tanggapan. —sa panulat ni Angelica Doctolero
Nasa full capacity na ang mga ospital sa lalawigan ng Oriental Mindoro dahil sa pagtaas ng mga kaso ng COVID-19 sa lalawigan.
Sa Oriental Mindoro Provincial Hospital, umabot sa 80 ang COVID-19 patients kung saan maging ang kanilang medical staff ay tinamaan rin ng virus kaya’t kulang na rin sila sa mga tauhan.
Gayundin ang MMG Hospital sa Calapan City kaya hindi na nito kayang tumanggap pa ng mga pasyenteng may COVID-19.
Maliban dito, kapos na rin ang mga ospital sa oxygen tank dahil nahihirapan din ang mga supplier sa pagpila sa pagpapa-refill ng mga tangke sa Metro Manila at Batangas.
Umapela naman ang MMG Hospital sa gobyerno na tumulong sa pagpapadala ng oxygen sa lalawigan.
Sa ngayon ay nasa 875 ang active COVID-19 cases sa Oriental Mindoro.—sa panulat ni Hya Ludivico
Tumaas ang kaso ng dengue sa Baguio sa 700 porsyento.
Batay sa datos ng City Health Services Office, nasa mahigit 1,000 kaso ng dengue ang naitala mula Enero hanggang nitong ika-apat ng Oktubre.
Nasa 10 naman ang napaulat na nasawi dahil sa dengue.
Kaugnay nito, hinikayat ng lokal na pamahalaan ang mga residente na panatilihin ang kalinisan sa paligid.
Patay ang 2 dalaga nang mahulog sa irigasyon ang sinasakyang motorsiklo sa probinsya ng Cotabato.
Kinilala ang mga nasawi na sina Analyn Antipolo Garino, 20 taon gulang at Angelie Mayola Jorillo, 25 taon gulang, na empleyado sa pribadong kumpanya.
Ayon kay Midsayap Chief of Police Lieutenant Colonel Rolly Oranza, minamaneho ni Garino ang motorsiklo habang angkas si Jorillo nang biglang mawalan ng kontrol ang drayber at tuluyang mahulog sa NIA Irrigation Canal sa Barangay Villarica.
Samantala, binawian ng buhay ang dalawang dalaga nang maiahon itong mga rumespondeng pulis at tauhan ng Bureau of Fire Protection. —sa panulat ni Airiam Sancho