RONDA PROBINSYA

Arestado ang magbayaw sa ikinasang buy-bust operation ng otoridad sa Gamu-Roxas Road, Barangay District 2, Gamu, Isabela.

Sa ipinarating na report ng Gamu Police Station ,Police Captain Geriyell Frogoso kay Police Colonel James Melad Cipriano, Direktor ng Isabela Police Provincial Office (IPPO), ang mga suspek ay kinilalang sina Eugene Quendara, 38 anyos at RD Flores, 37 anyos na residente ng Santa Filomena, San Mariano, Isabela na kabilang sa Regional Priority List Target ng PNP at PDEA.

Nakumpisa sa mga suspek ang ibinibentang iligal na droga na may timbang na isang gramo na tinatayang nagkakahalagang P6,000, kasama ang 500 gramo ng marijuana na may market value na P60,000, isang granada, at improvised shot gun.

Nahaharap ang magbayaw sa kasong Republic Act 9165 o Comprehensive Dangerous Drugs Act of 2002, RA 10591 at RA 9516. —sa panulat ni Airiam Sancho

Arestado sa Maynila ang isang lalaking suspek sa pamamaril dahil sa utang sa Angeles, Pampanga Martes ng madaling araw.

Ayon kay Police Captain Philippines ng Manila Police District, binaril sa dibdib ang biktima ng wala umano itong maibigay matapos maningil ng suspek.

Namataan naman ito ng ilang kamag-anak sa Malate nang tumakas mula sa Sitio Ipil, Barangay Malabanias, Angeles City, Pampanga at agarang inireport sa Malate Police na nagsagawa ng follow up operation matapos makumpirma ang nasabing insidente.

Naiturn-over na ng mga pulis Maynila ang suspek sa Angeles City Police at nahaharap ito sa kasong frustrated homicide. —sa panulat ni Airiam Sancho

Arestado ang 12 suspek na mahigit isang taon nang pinaghahanap hinggil sa pagkamatay ng isang estudyante na umano’y hazing ng fraternity sa Sorsogon noong 2020.

Ayon sa Police Regional Office 5, natunton ang mga lalaki na nasa pulong sa isang bahay sa Barangay Lawa, Calamba, Laguna.

Kinilala ang mgaito na sina Mar Charnel Fajardo, 22; Arman Bunyi Jr., 23; Arvin Nuñez, 25; Ronnel Balaguer, 25; Johnson Gealone, 26; Runy Gerero, 35; Remdrant Gerolao, 34; Reniel Guran, 32; Archie Dipon, 43; Ronmark Godala, 24; Billy Berania, 31; at Ulysses Berania, 29, na tinaguriang Most Wanted Personalities sa bayan ng Bulan, Sorsogon at may nakalabas na warrant noon pang Agosto 2020.

Magugunitang namatay ang 23 anyos na criminology student na si Omer Despabiladares, kasunod ng pinagdaaanang initiation rites ng fraternity sa Bulan.

Ayon sa pulisya, walang piyansa ang mga suspek na nahaharap sa kasong paglabag sa Anti-Hazing Law. —sa panulat ni Airiam Sancho

Aabot sa P2.4-M halaga ng shabu ang narekober ng mga otoridad sa naaksidenteng SUV sa bahagi ng Barangay Bado Dangwa, Tabuk City, Kalinga.

Ayon kay Police Col. Davy Vicente Limmong, Provincial Director ng Kalinga Police Provincial Office, patungo sana ng Centro ng Tabuk City ang isang toyota fortuner nang maaksidente ito sa pakurbadong daan sa nabanggit na lugar.

Nang respondehan ito ng mga pulis ay wala na umano ang driver ng SUV na kinilalang si Fernando Maccay na residente ng Buscalan, Tinglayan, Kalinga.

Aabot sa 20 bricks nang pinatuyong dahon ng marijuana na may timbang na 20 kilo at 400 gramo.

Hinahanda na ang kasong isasama laban sa suspek na si Maccay na patuloy pang pinaghahanap ng mga otoridad. —sa panulat ni Angelica Doctolero

Nagpositibo sa paggamit ng iligal na droga ang apat na bus driver matapos ikasa ang random drug at alcohol test ng Land Transportation Office (LTO) na isinagawa sa ­Parañaque Integrated Terminal Exchange (PITX).

Sa pahayag ni PITX Spokesman Jason Salvador, aabot sa siyamnaput dalawang bus drivers ang isinailalim sa surprise drug test ng Regional Anti-Drunk and Drugged Enforcement Unit ng LTO.

Agad namang kinumpiska ang mga lisensya ng apat na bus driver habang isasailalim naman sa confirmatory test ang kanilang mga resulta sa drug test.

Bukod sa surprised random drug test, nagsagawa rin ng road worthiness test sa mga bus ang mga tauhan ng LTO.

Nahuli ding gumagamit ng mga improvised plate numbers ang ilang mga driver na hindi pa nakapagparehistro.

Ayon sa pamunuan ng LTO, hindi nila kukunsintihin ang mga pasaway na driver dahil kaligtasan ng mga pasahero ang nakasalalay lalo na ngayong COVID-19 pandemic. —sa panulat ni Angelica Doctolero

Patuloy pang iniimbestigahan ng mga otoridad ang pagkamatay ng isang Barangay Kapitan sa bahagi ng Purok 1, Brgy. Datu Salumay, Marilog District, Davao City.

Kinilala ang biktima na si Brgy. Kapitan Amado Mansabid, 55-anyos at residente sa nabanggit na lugar.

Base sa nakuhang impormasyon ng mga otoridad, natutulog ang biktima sa loob ng kanilang tindahan ng biglang pumasok ang isang lalaki na naka-helmet at pinagbabaril ang biktima gamit ang kalibre .45 na baril dahilan ng agaran nitong pagkamatay.

Inaalam pa ng mga otoridad ang motibo ng suspek na patuloy pang pinaghahanap matapos tumakas sa ginawang krimen. —sa panulat ni Angelica Doctolero

Patay sa pamamaril ang isang empleyado ng isang bangko sa bahagi ng Sitio Looban, Barangay Camanci, Nort, Aklan.

Sa imbestigasyon ng mga otoridad, isang suspek ang dumating sa nabanggit na lugar saka pinagbabaril ng tatlong beses ang biktimang nakaupo sa loob ng tricycle.

Naisugod pa sa ospital ang biktima pero idineklara itong dead-on-arrival.

Humihingi ngayon ng hustisya ang pamilyang naiwan ng biktima. —sa panulat ni Angelica Doctolero