Nakapagtala ang Bicol Region ng pinakamababang kaso ng COVID-19 sa loob ng isang araw.
Ito ay makaraang maitala ang anim na mga kaso sa rehiyon kung saan tatlo ay mula sa Albay at tatlo rin sa Camarines Sur.
Samantala, wala namang naitalang kaso ng naturang sakit sa Camarines Norte, Catanduanes, Masbate at Sorsogon.
Sa ngayon ay umabot na sa 46,198 ang kabuuang kaso ng COVID-19 sa Bicol Region. —sa panulat ni Hya Ludivico
Nag-alok ng cash reward si Mayor Sylvia Austria sa makakapagturo sa suspek na pumatay kay barangay chairman Zoilo “Anlo” de Belen ng brgy. Lambakin sa Jaen, Nueva Ecija.
Aabot sa ₱150,000 ang pabuyang inalok ng lokal na pamahalaan ng Jaen sa makapagbibigay ng impormasyon o makapagtuturo sa mga salarin sa krimen.
Ito ay para mapabilis ang pagresolba sa kaso upang mabigyan ng hustisya ang pagkakapaslang kay de Belen.
Matatandaang pinagbabaril ng mga hindi nakikilalang suspek si de Belen habang ito ay nagdidilig ng halaman malapit sa kanyang bahay nito lamang Nobyembre a-5.
Patuloy pang iniimbestigahan ng mga otoridad ang motibo sa pamamaril. —sa panulat ni Angelica Doctolero
Patay matapos magbigti ang isang Sangguniang Kabataan o SK treasurer sa kanilang bahay sa barangay Manangat, Caoayan, Ilocos Sur.
Kinilala ang biktima na si Hannah Isabel Reotita, 22-anyos na natagpuan ng kaniyang kapatid na wala nang buhay sa loob ng kwarto nito.
Sa imbestigasyon ng mga otoridad, nagkaroon ng problema ang biktima sa kanyang trabaho na posibleng dahilan ng pagpapakamatay nito.
Patuloy pang iniimbestigahan ng mga otoridad ang naturang kaso.—sa panulat ni Angelica Doctolero
Ipatutupad sa lalawigan ng maguindanao ang “no vaccine card, no entry” sa lahat ng papasok sa mga border checkpoint ngayong araw, Martes, Nobyembre 16.
Pangungunahan ni Maguindanao Police Director Col. Jibin Bongcayao ang pagpapatupad ng bagong patakaran batay narin sa executive order na inilabas ng pamahalaang lalawigan.
Ayon kay Bongcayao, ang mga wala o hindi magpapakita ng vaccination card ay kailangang magpakita ng negatibong resulta ng reverse transcription-polymerase chain reaction o RT-PCR test na may three-day effectivity.
Nabatid na ang Maguindanao ay napaliligiran ng mga lalawigan ng Sultan Kudarat, North Cotabato at Lanao del Sur kung saan, ang mga dadaan lamang o pupunta sa ibang lugar ng lalawigan ay dapat ding magpakita ng vaccination certificate. —sa panulat ni Angelica Doctolero
Patay sa pamamaril ng hindi pa nakikilalang suspek ang may-ari ng isnag funeral parlor at driver nito sa bayan ng Sibagat, Agusan del Sur.
Sa imbestigasyon ng mga otoridad, kinilala ang nasawing biktima na sina Remer Basco na may-ari ng funeral parlor at Alden Egagamao na driver naman nito habang sugatan at kritikal naman sa ospital ang isa pang kliyente.
Agad namang dinala sa ospital pero dineklarang dead on arrival si Basco habang namatay naman matapos ang ilang oras si Egagamao.
Narekober sa pinangyarihang krimen ang 4 na basyo ng bala na pinaniniwalaang galing sa .45 kalibre ng baril, 5 fired bullets na galing sa .45 kalibre at kalibre 9mm.
Sa ngayon, patuloy pang iniimbestigahan at inaalam ng mga otoridad ang motibo sa pamamaril. —sa panulat ni Angelica Doctolero
Patay sa pamamaril ng hindi pa nakikilalang suspek ang isang babae sa Matanao, Davao del Sur.
Kinilala ang biktima na si Dorothy Bantilan na isang encoder ng rural health sa nabanggit na lugar.
Ayon sa mga otoridad, pinagbabaril ang biktima habang nakaupo sa labas ng isang tindahan sa barangay Poblacion, kasama ang kaniyang anak at ilang kamag-anak.
Inaalam pa ng Matanao Police Station ang motibo sa pamamaril habang tinitignan narin ang pagkakakilanlan sa suspek na mabilis tumakas matapos ang pamamaril.
Sa ngayon, isasailalim sa counseling ang anak ng biktima matapos niyang masaksihan ang pagpaslang sa kaniyang ina. —sa panulat ni Angelica Doctolero
Umakyat na sa 5 ang nasawi sa landslide sa Iligan City, Lanao del Norte.
Kinilala ng Iligan City Police ang magkakapatid na biktimang Sina Shemabel, 7 buwang gulang; Trishamae, 3 taon; John Kent, 6 na taong gulang; Sean, 4 na taong gulang at CJ Barulan, 8 taong gulang.
Sugatan naman ang kanilang magulang na sina Sheila Mae Barulan, 26 anyos at Jessie Barulan, 24 anyos.
Ayon kay Iligan City Police Office Spokesman Maj. Zandrex Panolong, 8 kabahayan ang nawasak habang ang bahay ng mga Barulan ang natabunan nang husto ng lupa.
Dakong ala-6 ng umaga kahapon nang maganap ang landslide sa Purok dos, Sitio Sawsaw, Taparak, barangay Mandulog matapos ang malakas na ulan kung saan labis na naapektuhan ang mga bahay na malapit sa ilog.
Pawang natutulog pa anya ang mga biktima nang gumuho ang lupa. —sa panulat ni Drew Nacino
3 bata ang patay habang 2 ang sugatan matapos ang landslide sa Mandulog, Iligan City sa Lanao del Norte.
Nangyari ang insidente matapos tumama ang lakas ng ulan sa naturang lalawigan kung saan lahat ng miyembro ng pamilyang barulan ay nasa loob ng bahay.
Ayon kay Mandulog Barangay Captain Abungal Pagsidan Cauntongan, kinilala ang mga magkakapatid na biktima na Sina Shemabel, 7 months old, Trisha Mae 3 taong gulang, John Kent 6 na taong gulang, Sean, 4 na taon at CJ Barulan.
Habang sina Shiela Mae Barulan , 26 na taong gulang at Jessie Barulan 24 na taong gulang.
Dagdag ng kapitan, nasa 8 bahay ang nasira ng naturang landslide kasama ang bahay ng Barulan family.
Mahigit 700,000 pisong halaga ng hinihinalang shabu at marijuana ang nasabat ng mga awtoridad mula sa tatlong drug suspects, kabilang ang dalawang babae, sa ikinasang buy-bust operation sa Tolentino St. Pasay City.
Kinilala ang mga suspek na sina Danica Mae Caingat, Danilo David at Angelain Khell David.
Bukod sa 500 pisong buy-bust money, nakumpiska rin mula sa kanila ang halos 400,000 pesos na halaga ng umano’y shabu at halos 400,000 pisong halaga rin ng marijuana.
Nakatakdang sampahan ng mga kaukulang kaso ang mga naturang suspek.
Bagsak sa kulungan ang dalawang lalaki matapos mahulihan ng mahigit 40,000 pisong halaga ng hinihinalang shabu sa Bagong Silang St., Brgy Hagonoy, Taguig City.
Kinilala ang mga suspek na sina Fortunato Igdao at Peter James Pesigan na kapwa nadakip sa ikinasang buy-bust operation ng Station Drug Enforcement Unit (SDEU) ng Taguig PNP.
Nasabat sa operasyon ang 40,800 pesos na halaga ng umano’y shabu, isang purse, at dalawang daang pisong buy-bust money.
Kasong paglabag sa dangerous drugs act ang isasampa laban sa mga suspek.