Nasabat ng mga ototridad ang mahigit pitong milyong pisong halaga ng shabu sa isang buy bust operation sa Lapu-Lapu City, Cebu.
Nadakip sa operasyon, ang isang 36-anyos na lalaki.
Ayon kay City Intelligence Unit Chief Police Lt., Noah Anana, matagal na nilang sinusubaybayan ang suspek.
Patuloy namang inaalam ng mga otoridad kung saan at kanino nakukuha ng suspek ang mga droga. —sa panulat ni Hya Ludivico
Arestado sa ikinasang buybust operation ang 27 indibidwal kabilang na ang 6 na kababaihan na hinihinalang tulak ng iligal na droga sa magkakahiwalay na lugar sa lalawigan ng Cavite.
Ayon sa Cavite Police Provincial Office, nangunguna sa listahan ang Cavite City sa may pinakamaraming bilang ng tulak na inaresto na may pitong naaresto; sumunod ang Gen Trias City at Dasmarinas City na may tig-5 nahuli; habang 4 naman ang nahuli sa Imus City; 2 sa Silang at tig-1 sa Alfonso, Ternate, Bacoor City at Kawit Cavite.
Nahaharap ngayon sa kasong Republic Act 9165 o Comprehensive Dangerous Drugs Act of 2002 ang mga naarestong suspek. —sa panulat ni Angelica Doctolero
Pinaigting ng mga otoridad ang pagtugis sa isang suspek na pumatay sa isang mamamahayag sa Bansalan, Davao del Sur.
Ayon sa Davao del Sur Police Provincial Office, kinilala ang nasawing reporter na si Orlando “Dondon” Dinoy habang kinilala naman ang suspek na si Brandie Mercado Campaner, na itinuturong gunman na pumunta sa apartment biktima saka ito pinagbabaril.
Samantala, nakapagpalabas na rin ang mga otoridad ng cartographic sketch, bagay na makakatulong sa pagkilala sa suspek.
Sa ngayon, patuloy pang inaalam ang motibo sa pagpaslang ng suspek sa biktimang si Dinoy. —sa panulat ni Angelica Doctolero
Patay ang biktimang kinilalang si Victorino Mulleda, 53-anyos matapos makuryente sa barangay Pamukid, San Fernando, Camarines Sur.
Base sa imbestigasyon ng Camarines Sur Police Provincial Office, napag-alaman na umalis ng gabi ang biktima sa kanilang bahay kasama ang anak nito para mangisda kung saan, naging magkaiba ang kanilang direksiyon.
Nang makauwi ang anak ng biktima ay dito na natagpuang nakahandusay ang kaniyang ama sa isang palayan kung saan, nakasukbit pa sa likod nito ang de-kuryente na panghuli ng isda.
Tumanggi namang magpaliwanag ang pamilya ng biktima habang patiloy pang iniimbestigahan ng mga otoridad ang naturang insidente. —sa panulat ni Angelica Doctolero
Nag-alok na ang Cagayan De Oro City Local Government ng P2 million na pabuya sa sinumang makapagbibigay impormasyon sa ika-aaresto ng pumatay sa anak ni Cagayan de Oro 1st District Rep. Rolando Uy.
Nobyembre a-onse nang pagbabarilin at mapatay ang mga biktimang sina Roland Sherwin “Tawee” Uy at caretaker nitong si Samuel Pabalan, sa barangay Pagatpat.
Kinondena naman ni Mayor Oscar Moreno ang naganap na krimen kasabay ng pag-apela ng tulong mula sa publiko upang maaresto ang mga nasa likod ng pagpaslang at agarang maibigay ang katarungan sa mga biktima.
Samantala, patuloy na pinaghahanap ng mga pulis ang gunmen, na nagpanggap na bibili ng buhangin at tumakas sakay ng motorsiklo. —sa panulat ni Drew Nacino
Tumataas na COVID-19 hospital bed utilization rate ang itinuturong dahilan kung bakit isinailalim sa Alert level 4 quarantine status, ang probinsiya ng Catanduanes simula November 16 hanggang sa katapusan ng buwan ayon sa Provincial Health Officer nito.
Sa isang panayam sinabi ni Dr. Hazel Palmes na nasa 80% na ang COVID bed utilization rate ng kanilang provincial hospital, habang nasa 50% naman ang ICU utilization rate.
Ayon pa kay Palmes, mayroong 353 aktibong kaso ng COVID-19 sa lugar, nasa 132 ang asymptomatic at nasa 205 ang nakakaranas ng mild symptoms.
Dagdag pa ng doktora, nasa 63, 283 sa 275,043 na target population pa lamang ang kumpleto na ang bakuna kaya’t malayo pa aniyang maabot ng probinsiya ang herd immunity. —sa panulat ni Joana Luna
Arestado at haharap sa patung-patong na kaso ang isang rape suspect matapos makuhanan ng granada, baril, mga bala at marijuana sa kanyang tinitirahan sa lalawigan ng Isabela.
Ayon kay Reina Mercedes Police Station Chief Police Major Christopher Danao, mayroong inihaing search warrant sa bahay ng suspek na inisyu ni Presiding Judge Regional Trial Court Branch 7, City of Ilagan, Isabela Honorable Andrew Barcena.
Dahilan upang makumpiska ng mga otoridad ang isang hand grenade, caliber.22 revolver na may apat na bala, tatlong bala ng caliber 38 at tatlong rolyo ng pinatuyong dahon ng marijuana.
Kinilala ang suspek na si Romeo Mangabat Y Lagrana, limangput tatlong taong gulang na isang magsasaka.
Ani Danao may nakabinbing pang kaso ng panggagahasa si Lagrana na nakapending sa Office of Provincial Prosecutor sa lungsod ng Ilagan.
Nasa kustodiya na ng pulisya si Lagrana habang pinag-aaralan pa ang tamang disposisyon ng mga kasong kakaharapin nito. —sa panulat ni Joana Luna
38 bahay at ilang pananim ang napinsala sa pananalasa ng buhawi sa lungsod ng Matalam, Cotabato.
Ayon sa Municipal Disaster Risk Reduction ang Management Office, 12 bahayang naapektuhan sa barangay Poblacion habang 26 na bahay naman sa barangay Manubuan.
Apektado rin ang mga sakahan gayundin ang mga rubber trees, mango at banana plantation sa lugar.
Tinatayang aabot sa mahigit isang milyong piso ang halaga ng mga nabanggit na napinsala. —sa panulat ni Airiam Sancho
Natupok ng apoy ang mga hilera ng apartment sa Cainta, Rizal.
Ayon sa imbestigasyon ng Bureau of Fire Protection (BFP), nag-umpisa ang sunog sa kusina dahil sa napabayaang gasul ng isang apartment unit sa Barangay San Andres.
Dahil dito, iniakyat sa ikalawang alarma ang sunog dakong alas-kwatro y medya ng madaling araw kanina at naapula dakong alas-singko ng umaga
Sinabi naman ng may-ari ng nasunog na apartment na si Benedict Cruz na posibleng umabot sa dalawang daang libong piso ang gagastusin para mapaayos muli ang mga nasunog na bahay. —sa panulat ni Airiam Sancho
Arestado ang isang lalaki matapos ang ikinasang buy-bust operation ng otoridad sa bayan ng Nabua, Camarines Sur.
Ayon kay PNP Regional Director Police Brigader General Jonnel C. Estom, nasamsam mula sa suspek na si Bienvenido Dinsing Jr. Kinikilalang high-value priority target at miyembro ng big-time drug syndicate, ang mahigit isang kilo ng hinihinalang shabu na tinatayang nagkakahalaga ng mahigit pitong milyong piso (P7.8-M).
Batay sa operasyon, nakabili umano ng 150 gramo o katumbas ng higit apat na raang libong piso (P450k) ang nagpapanggap na buyer ng otoridad.
Nakaramdam naman ng pagdududa ang suspek sa transakyon at agad nitong binunot ang kaniyang baril na ipinaputok laban sa kapulisan.
Napilitang gumanti ang operatiba kung saan natamaan si Dinsing sa kaniyang katawan na naging sanhi ng kaniyang pagkamatay. —sa panulat ni Airiam Sancho