RONDA PROBINSYA

Patuloy na iniimbestigahan ng mga otoridad ang nangyari sa seaman na natagpuang patay at isinilid sa isang drum sa Solana, Cagayan.

Sa imbestigasyon ng Solana Police, nilangoy ng isang construction worker ang nakita nitong palutang-lutang na drum sa Cagayan River at nang buksan ay tumambad ang bangkay ng kinilalang si Rowel Unabia, 32 anyos na dating seaman.

Umaapela ng tulong ang pamilya unabia sa makapagtuturo sa pumatay kay Rowel.

Sa pagsisiyasat ng scene of the crimes operatives, kinakitaan ng saksak sa dibdib ang biktima.

Sa ngayon, inaalam pa ang motibo sa likod nang pagpatay.—sa panulat ni Joana Luna

Patay sa pamamaril ang isang election officer ng bayan ng Lope De Vega sa Catarman Northern Samar.

Sa inisyal na imbestigasyon ng pulisya, kinilala ang biktima na si James Diaz Maghanoy, 42 anyos.

Ayon sa otoridad, pauwi na ng kanilang tahanan si Maghanoy sakay ng kanyang motorsiklo nang barilin ito ng dalawang beses ng hindi pa nakikilalang suspek.

Kinondena ng COMELEC ang nangyaring pamamaslang at nanawagan sa mga otoridad na pabilisin ang imbestigasyon.—sa panulat ni Joana Luna

Magsasagawa ang DA-BFAR ng tatlong buwang fishing ban sa Visayan sea.

Ayon sa DA-BFAR, layon ng ikinasang fishing ban na mabigyan ng pagkakataon ang mga lamang dagat gaya ng sardinas at mackerels sa Visayan Sea Fishing ground na makapagparami.

Sa ilalim ng Fisheries Administrative Order tinitiyak nito ang masaganang panghuhuli ng mga isda sa Pebrero sa susunod na taon, buwan kung kailan matatapos ang pagpapatupad ng fish ban.—sa panulat ni Joana Luna

Nasawi ang mag-ama matapos na makuryente sa sakahan sa bayan ng Bani, Pangasinan.

Kinilala ang mga biktima na sina Joey Ortaleza, 56 anyos at anak na si Mark Ortaleza, 21 anyos.

Base sa imbestigasyon ng pulisya, nagtungo ang mag-ama sa kanilang sakahan nang biglang maapakan ng anak ang kable ng kanilang pumping station na ginagamit nila sa pagpapatubig.

Nataranta ang ama ni Mark nang makita niya ang anak na nangingisay kaya agad niya itong hinawakan para tulungan subalit maging siya ay nakuryente.

Samantala, idineklarang binawian ng buhay ang mga biktima nang isugod sa ospital.—sa panulat ni Airiam Sancho

Magbibigay ng 500,000 pisong halaga ang hindi nagpakilalang concerned citizen, bilang reward money sa makapagtuturo sa gunmen, na pumatay sa isang negosyante at dalawang kapatid nito sa probinsiya ng Cagayan.

Layon ng kalahating milyong pabuya na pabilisin ang takbo ng imbestigasyon sa pagresolba ng kaso sa pagkamatay ng negosyanteng si Nick Gannaban.

Napabalitang pinagbabaril si Gannaban sa harap ng kanyang tindahan sa Bayan ng Tuao ng dalawang lalaking sakay ng itim na motorsiklo.

Narekober ng otoridad sa crime scene ang tatlong spent shell ng calibre kuwarenta y singko at isang deformed slug.

Napag-alaman ring kapatid ng yumaong negosyante sina Barangay Chairman Orlino Gannaban at Fredo Gannaban na naunang pinaslang nitong mga nakaraang taon.

Apela ng pamilya gannaban at mga residente sa lugar na bigyan pansin at paiigtingin ang aksyon ng kapulisan sa nangyayaring patayan sa Cagayan.—sa panulat ni Joana Luna

Umabot na sa 91.74% ang vaccination rate sa Baguio City.

Ayon kay Chief of the Public Information Office (PIO) – Baguio Aileen Refuerzo, lagpas na sa 90% ng target population ang vaccination rate ng Baguio dahil sa puspusang paghihikayat ng lokal na pamahalaan sa mga residente ng siyudad na magpabakuna.

Batay sa inilabas na vaccination statistics ng Baguio City, nasa 257,805 na ang bakunadong indibidwal at nasa 212,390 ang fully vaccinated sa mga ito.

Ani Refuerzo, maaring makapagrehistro sa bakuna.baguio.gov.ph ang mga residente ng lugar na nais magpa-schedule ng kanilang vaccination day.—sa panulat ni Joana Luna

Patay ang isang indibidwal at sugatan ang 13 iba pa, matapos mahulog sa bangin ang sasakyan ng Bureau of Fire Protection (BFP-BARMM) sa probinsiya ng Cotabato.

Ayon sa ulat ng otoridad, lulan ang mga tauhan ng BFP-BARMM ng kanilang sasakyan papauwi ng Cotabato City mula sa Wao, Lanao Del Sur nasa Barangay Barangian, Alamada na ang sasakyan nang biglang mawalan ng preno at hindi nakontrol ng drayber ang manibela kaya’t dumiretso sa gilid ng kalsada ang sasakyan at tuluyang  nahulog sa malalim na bangin.

Agad na rumesponde ang PNP-Alamada, at mabilis na naisugod ang labing tatlong sugatan sa ospital habang isa ang napaulat na nasawi.

Sa ngayon, patuloy na iniimbestigahan ng pnp-alamada traffic section ang nangyaring aksidente.—sa panulat ni Joana Luna