RONDA PROBINSYA

Nakumpiska ng mga awtoridad ang mahigit 100,000 pisong halaga ng hinihinalang shabu sa magkahiwalay na operasyon ng Southern Police District (SPD) sa Pasay.

Sa Brgy. 178, arestado ang 18 taong gulang na si Joshua Casumpan kung saan nasabat mula rito ang higit 24,000 pesos na halaga ng umano’y shabu.

Sa Eusebio St., Brgy. 42, sa lungsod pa rin ng Pasay, huli ang 17 taong gulang na si alyas Jun, gayundin ang isang alyas Teddy, 52 taong gulang.

Nasabat mula sa dalawa ang halos 100,000 pisong halaga ng hinihinalang shabu, maliban sa 500,000 buy-bust money.

Sasampahan ng kaukulang kaso ang mga nasabing suspek.

Nadakip ng pinagsanib na pwersa ng Warrant & Subpoena Section at Intelligence Section ng Las Piñas Police ang isang lalaki na matagal nang tinutugis ng batas dahil sa kasong rape kasunod ng ikinasang operasyon sa Batangas.

Ayon kay PBGen. Jimili Macaraeg, Director ng Southern Police District (SPD), ang akusadong si Jomari Pasagui ay No. 3 Most Wanted Person ng Las Piñas PNP dahil kasong rape.

Matapos ang krimen ay nagtago ito sa Brgy. Santiago, Sto. Tomas, Batangas kung saan nahuli ng mga awtoridad.

Nakakulong na ngayon sa Custodial Facility ng Las Piñas PNP ang akusado habang hinihintay ang commitment order mula sa korte na siyang may hawak ng kanyang kaso.

Nagwakas ang maliligayang araw ng isang lalaking matagal nang wanted sa batas dahil sa patong-patong na kasong rape na kinakaharap nito sa isang korte sa Kalibo, Aklan matapos masakote ng Pasay City Police.

Kinilala ang akusado na si Elmer Bernardo, 51 taong gulang, at No. 3 Top Most Wanted Person ng Aklan PNP.

Si Bernardo ay nadakip ng mga pulis sa Roxas Blvd. sa Pasay matapos silbihan ng warrant of arrest para sa walong bilang o eight counts ng kasong rape sa Kalibo RTC o regional trial court, Branch 3.

Isinasailalim ngayon sa dokumentasyon ang akusado at nakatakdang dalhin sa Aklan para litisin sa kinakaharap nitong mga kasong kriminal.

Mahigit 100,000 pisong halaga ng umano’y shabu ang nakumpiska mula sa tatlong drug suspects sa ikinasang buy-bust operation sa Aratiles II, Brgy. BF Homes, Parañaque City.

Ayon sa P’que Police Sub-Station 5, nakilala ang mga suspek na sina Royjan Montemor, Jay Pedimonte at Andy Cerbito.

Maliban sa drug money na 500 piso at 1,000 pisong bust-bust money, 17 sachets ng umano’y shabu ang narekober sa operasyon na nagkakahalaga ng 136,000 pesos.

Nakakulong na ngayon sa custodial facility ng P’que PNP ang mga suspek at nakatakdang sampahan ng kaukulang kaso.

Timbog ang isang lolo dahil sa umano’y pagtutulak ng ipinagbabawal na droga sa Brgy. Sucat, Muntinlupa City.

Ang suspek na si Richard Zipagan, 50 taong gulang, ay nasakote sa ikinasang anti- criminality operation  sa lugar.

Mahigit 20,000 pisong halaga ng hinihinalang shabu ang nasabat mula kay Zipagan.

Kasong paglabag sa Comprehensive Dangerous Drugs Act ang isasampa laban sa suspek.

Arestado ang tatlong tulak umano ng droga sa ikinasang operasyon ng mga awtoridad sa Brgy. Pulang Lupa 2, Las Piñas City.

Kinilala ang mga suspek na sina Florie Silverio, Margaret Hernandez at Ricardo Hosenilla, parehong nakatira sa nasabing barangay.

17 gramo ng hinihinalang shabu ang nasabat mula sa mga suspek na nagkakahalaga ng 115,600 pesos at 500 pisong buy-bust money.

Inihahanda na ang kaukulang kasong isasampa laban sa mga suspek.

Hindi pa mang tumitindi ang Amihan sa bansa, ilang pananim na gulay na sa Benguet at Mountain Province ang nabalot ng frost o andap.

Kabilang sa mga apektado ang mga gulayan sa bayan ng Buguias, Benguet.

Ayon kay Buguias Mayor Ruben Tinda-An, tila napaaga ang pagdating ng andap na karaniwan tuwing Disyembre hanggang Pebrero o sa peak season ng Amihan.

Sa kabila nito, wala naman anyang naitalang matinding pinsala sa mga gulay sanhi ng andap.

Ang andap o frost ay mga hamog na nagyelo na nangyayari kapag mababa na ang temperatura sa isang lugar.  —sa panulat ni Drew Nacino

Nabulahaw ang mga residente ng Nueva Ecija, Pangasinan at Pampanga dahil sa pag-atake ng sandamakmak na rice black bug na kilala rin sa tawag na alitangya o atangya, na may mabahong amoy.

Kabilang ang mga lungsod ng Cabanatuan at San Jose sa Nueva Ecija sa mga naperwisyo ng rice black bug na bumalot sa ilang establisyimento gaya ng gasolinahan.

May ilang ATM machine ang hindi rin nagamit dahil sa kapal ng alitangyang nakadikit sa mga ito habang isang toyota fortuner ang dumulas patungo sa isang palayan sa cabanatuan dahil sa nagkalat na peste sa kalsada.

Sa ngayon ay hindi pa mabatid ng Department of Agriculture kung ano ang rason ng pagkalat ng mga alitangya. —sa panulat ni Drew Nacino

Isang Barangay Ex-O ang naaresto ng Manila Police District (MPD)– Station 7 dahil umano sa iligal na droga.

Kinilala ang suspek na si Ronald Santiago, miyembro ng Commando Gang, Ex-O ng Barangay 152, Zone 14 at residente ng Kagandahan Street, Tundo, Maynila.

Nag-ugat ang pagkaka-aresto kay santiago sa sumbong ng isang concerned citizen sa iligal na aktibidad ng suspek kaya’t nagsagawa ng surveillance ang mga operatiba ng MPD-Station 7 Drug Enforcement Team.

Ayon kay Lt. Harry Ruiz Lorenzo, III, Commander ng Station 7, natiklo si Santiago sa riles ng tren malapit sa Antipolo Street, kahapon.

Nakumpiska mula sa suspek ang tatlong plastic sachet ng shabu na nasa 1 point grams at nagkakahalaga ng mahigit 10,000 piso. —sa panulat ni Drew Nacino

Hindi na kailangang magpakita ng swab test result sa mga turistang papasok sa Ilocos Norte mula Disyembre a-primero.

Ayon sa provincial government, ang mga biyahero mula sa mga lugar na nasa ilalim ng alert level 1 hanggang 3 ay kailangan lamang na magpakita ng valid vaccination card at dapat na magpasuri o health check pagdating sa naturang lalawigan.

Habang ang mga turistang naturukan na ng unang dose, mga hindi pa bakunado at galing sa mga lugar na nasa alert level 4 ay kailangan na magpakita ng RT-PCR test na isinagawa sa loob ng 72 oras o antigen test na isinagawa sa loob ng 24 na oras.—sa panulat ni Airiam Sancho