Nasunog ang nasa 120 mga bahay sa isang residential area sa Brgy. Manresa, Quezon City nitong Lunes.
Ayon sa Bureau of Fire Protection (BFP), itinaas ang first alarm dakong 1:12 ng hapon at idineklara itong fire out alas-2:30 ng hapon.
Tinatayang aabot sa 150,000 pesos ang halaga ng pinsala ng sunog at nasa 330 indibidwal naman ang naapektuhan nito.
Patuloy na iniimbestigahan ng mga awtoridad ang sanhi ng sunog. —sa panulat ni Hya Ludivico
Patay matapos malunod sa ilog ng Tuguegarao City, Cagayan ang dalawang magkaibigan na kinilalang sina Mark Anthony Tupil, 13-anyos at Vince Nara, 12-anyos.
Sa imbestigasyon ng mga otoridad, nangunguha ng gagamba ang dalawang biktima, kasama ang isa pa nilang kaibigan, nang magkayayaan silang maligo sa ilog na sakop ng barangay Bagay.
Dito na nalunod si Tupil matapos tumalon sa ilog dahil inakalang mababaw umano ang lebel ng tubig nito kung saan, tinangka umanong sagipin ni Nara ang kaniyang kaibigan pero nalunod din ito.
Agad na nagsagawa ng search and rescue sa operation ang mga otoridad matapos humingi ng saklolo ang isa pa nilang kaibigan pero hindi nila nakita ang mga biktima dahil bukod sa malalim ang tubig ng ilog ay malakas din umano ang agos ng tubig nito.
Lumutang lang ang bangkay ng mga biktima matapos ang dalawang araw na operation. —sa panulat ni Angelica Doctolero
Patay ang isang senior citizen matapos bugbugin at tuhugin ng kahoy sa ulo sa bayan ng Sigay, Ilocos Sur.
Ang biktima na sisenta’y nwebe anyos, may asawa at isang magsasaka ay napatay ng singkwenta anyos na kagawad sa barangay Matallucod.
Ayon sa pulisya, naaktuhan umano ang biktima na nakapatong at nakikipagtalik sa asawa ng suspek.
Bumisita ang kagawad sa bahay ng kanyang asawang mayroon umanong sakit sa pag-iisip at nadatnang nakakubabaw sa kanyang misis kaya’t ginulpi at tinusok ang mukha ng biktima.
Hawak na ng Sigay Municipal Police ang suspek na nahaharap sa kasong homicide. —sa panulat ni Drew Nacino
Nasa P6.3 million na halaga ng smuggled na sigarilyo ang nasabat ng Bureau of Customs – port of Davao sa bayan ng Makilala, North Cotabato.
Arestado naman ang 5 suspek na kinilalang sina Rey Mariscal, Rheno Quiao Mariscal, Romulo Soria, Pablito Elorcha at Glenn Torres Judilla.
Ayon sa BOC, pawang lulan ang lima ng 6 – wheeler truck na kargado ng 12,500 reams ng puslit na sigarilyo.
Patungo sanang General Santos City mula Davao del Sur ang truck nang maharang ng mga pulis.
Inisyuhan naman ng warrant of seizure and detention ang mga nasabat na smuggled items dahil sa paglabag sa Customs Modernization and Tariff Act. —sa panulat ni Drew Nacino
Ilang Chinese vessels ang namataang umaaligid malapit sa Pagasa Island sa West Philippine Sea, kahapon.
Napansin ang grupo ng mga Chinese vessel ng ilang mamamayahag habang lulan ng eroplanong nagtungo sa pagasa kung saan matatagpuan ang Naval Station Emilio Liwanag.
Gayunman, bago lumapag ang Philippine aircraft ay nakatanggap ang kapitan nito ng radio challenges mula sa Chinese Coast Guard na nagtataboy sa mga paparating na Pinoy.
Ayon kay Lt. Ryan Cellan, Commanding Officer ng naturang istasyon, hindi na bago ang paninita ng Chinese Coast Guard sa mga pumupunta sa Pagasa Island.
Ang Pagasa ang isa sa pinaka-malaking isla na okupado ng pilipinas sa pinag-aagawang Spratly Islands.
Kamakailan ay tinangka ring harangin ng mga Chinese vessel ang supply ship ng Armed Forces of the Philippines na patungong Ayungin Shoal. —sa panulat ni Drew Nacino
Naglunsad ng joint communication at anti-piracy exercises ang Philippine Coast Guard (PCG) at Japan Coast Guard (JCG) sa Sibutu Passage, Tawi-tawi.
Ayon sa PCG, kasama sa lumahok ang BRP bagacay, BRP cape san agustin, BRP sindangan at BRP malamawi mula sa PCG at JCGS Tsugaru ng JCG.
Nagsagawa ang dalawang coast guards ng radio communication sa pagitan ng JCG helicopter at PCG vessels.
Ang nasabing aktibidad ang nagsilbing oportunidad para sa PCG at JCG upang matuto sa isa’t-isa.—sa panulat ni Drew Nacino
NANUMPA na si Cebu City Vice Mayor Michael Rama bilang alkalde kasunod nang pagpanaw ni mayor Edgardo Labella.
Sa isang simpleng seremonya, nanumpa sa harap ni Justice Gabriel Ingles si Rama bilang bagong City Mayor, gayundin si Councilor Dondon Hontiveros bilang Vice Mayor.
Samantala, ayon kay Rama, itatalaga naman niya si dating Councilor Joy Pesquera bilang bagong konsehal kapalit ni Hontiveros.
PATAY ang dalawang menor de edad matapos malunod dahil sa malawakang pagbaha sa Liguasan Delta sa Central Mindanao.
Nabatid na sinubukang sagipin ni Rohana Tumbaga ang isang taong gulang niyang kapatid na babae pero natangay din ito ng tubig-baha sa Barangay Inug-ug sa Pagalungan, Maguindanao.
Ayon sa Municipal Disaster Risk Reduction and Management Office (MDRRMO), maliban sa Pagalungan ay apektado rin ng flashfloods ang daan-daang mga residente sa bayan ng Montawal.
Mahigit 100,000 pisong halaga ng hinihinalang shabu ang nasabat ng mga awtoridad mula sa dalawang drug suspects sa ikinasang buy-bust operation sa Quintas St, Brgy CAA, Las Piñas City.
Kinilala ang mga suspek na sina Evangelyn Villesa, 50 taong gulang, at Ronnie Velado, 59 na taong gulang, kapwa residente ng naturang lungsod.
Bukod sa limang daang pisong buy-bust money, nakumpiska rin mula sa dalawa ang tinatayang labinlimang gramo ng umano’y shabu na nagkakahalaga nga ng mahigit isang daang libong piso.
Nakakulong na ngayon ang mga suspek at nakatakdang sampahan ng kaukulang kaso.
Kalaboso ang tatlong kilabot umanong tulak ng droga matapos madakip ng mga awtoridad sa Brgy. Putatan, Muntinlupa City.
Kinilala ang mga suspek na sina Abraham Gonzales, Michael Enjambre, at Richard Borja, kapwa nakatira sa nasabing barangay.
Nakumpiska sa operasyon ang mahigit isang gramo ng hinihinalang shabu na nagkakahalaga ng higit pitong libong piso.
Kasong paglabag sa comprehensive dangerous drugs act ang isasampa laban tatlong suspek.