RONDA PROBINSYA

Tatanggap ng 25 kilong bigas, ang mga residenteng naka-kumpleto na ng kanilang bakuna kontra COVID-19, sa Vigan, Ilocos Sur.

Ayon kay Mayor Juan Carlo Medina, layon ng nasabing hakbang na mas mahikayat ang hindi pa bakunadong mga residente sa syudad.

Paliwanag ng Alkalde, upang makatanggap ng nasabing benepisyo ay kinakailangang fully vaccinated ang residente at mismong sa lungsod ng Vigan nabakunahan.

Target ng lokal na pamahalaan ng vigan na matapos ang pamimigay ng benepisyo sa Disyembre.—sa panulat ni Joana Luna

Bumaba sa 2% ang COVID-19 positivity rate sa Quezon City.

Ayon sa OCTA Research, ito ay mula sa 7-day average ng mahigit sa 3,000 test.

Batay rin sa datos ng OCTA sa 7-day average, bumaba sa 63 ang naitalang bagong kaso sa lungsod, ito na ang pinakamababa simula noong January 2 hanggang 8.

Naitala naman ang -54% na one week growth rate.

Sa kasalukuyan ay may average daily attack rate ang Quezon City na 1.98 kada 100,000 kada araw.

Huli sa ikinasang drug buybust operation ng mga tauhan ng Philippine Drug Enforcement Agency (PDEA) at Malolos City Police ang dalawang suspek sa iligal na droga.

Kinilala ng Bulacan PNP ang naarestong suspek na sina Alejandro Paloma alyas Negro at Maria Isabel Lim na nakuhanan ng mahigit isang milyong pisong halaga ng party drugs at shabu.

Nakumpiska sa mga suspek ang dalawang transparent plastic pouch na may isandaang piraso na pink tablet ng ecs­tasy, samsung cellphone, lisensiya, passport, limang pakete ng shabu na may 131 gramo ang timbang at isang pakete ng marijuana.

Narekober din kay alyas Negro ang dalawang baril, isang motorsiklo, at cellphone.

Nahaharap ngayon sa kasong RA 9165 o Comprehensive Dangerous Drugs Act of 2002 ang mga suspek. —sa panulat ni Angelica Doctolero

Dead on arrival sa ospital ang isang matandang traffic enforcer makaraang araruhin ng humaharurot na motorsiklo sa Quezon City.

Kinilala ang biktima na si Arsenio Guevarra Cera, 74-anyos na empleyado ng Barangay Police Security Officer (BPSO) habang kinilala naman ang naarestong suspek na si Francisco Melito, 40-anyos.

Base sa imbestigasyon ng mga otoridad, tatawid sana sa kalsada sa Quirino Highway malapit sa Baesa Road, Brgy. Baesa ang biktima nang biglang sumulpot ang humaharurot na motorsiklo dahilan ng agarang pagkamatay nito.

Nakakulong na ang suspek at nahaharap sa patong-patong na kaso. —sa panulat ni Angelica Doctolero

Sugatan ang dalawang indibidwal matapos masunog ang isang warehouse na pagmamay-ari ng Food Panda, isang online food and grocery delivery platform brand na matatagpuan sa Ayala-Alabang sa Muntinlupa City.

Ayon sa mga tauhan ng Bureau of Fire Protection (BFP) Muntinlupa, hindi itinaas ang fire alarm signals dahil mabilis umanong naapula ang apoy.

Tinatayang aabot sa 5,000 piso ang halaga ng danyos sa sunog habang inaalam pa ng mga otoridad ang dahilan ng pagkakasugat ng mga biktima. —sa panulat ni Angelica Doctolero

Nag-party nang walang social distancing at walang suot na face masks ang ilang mga kabataan sa Tulunan, Cotabato.

Naganap ang insidente sa selebrasyon ng 60th Founding Anniversary ng Tulunan noong Biyernes.

Ayon sa mga otoridad, alas-10 ng gabi nang matapos ang programa ng lokal na pamahalaan ngunit dumagsa ang mga kabataan at nagpatuloy na mag-party.

Ayon kay Tulunan, Cotabato Mayor Reuel “Pip” Limbungan, posibleng ginamit ng mga kabataan ang sound system na naiwan sa party matapos ang employee’s night.

Wala na rin aniyang nagawa noon ang mga otoridad at bandang alas 12:30 na nang mapatigil ang party ng mga kabataan.

Sa ngayon ay wala pang pahayag si Limbungan kung may aksyon nang ginawa laban sa mga organizer ng party.

Matatandaang isinailalim sa Alert level 2 ang Cotabato City mula November 22 hanggang 30. —sa panulat ni Hya Ludivico

Arestado ang isang high value individual sa ikinasang buy bust operation ng mga operatiba ng Pasig City Police Station, sa Barangay Pinagbuhatan, Pasig City.

Ayon sa otoridad, kinilala ang suspek na si Kokey Kasim, 18 anyos at residente ng barangay Pinagbuhatan.

Nahuli si Kasim makaraang magpanggap ang pulis Pasig na bibili ng shabu.

Narekober sa suspek ang 65 gramo ng hinihinalang shabu na aabot sa mahigit 440,000 piso, 500 pisong buy-bust money, 30,000 piso at isang pakete ng sigarilyo.

Nakapiit na sa Pasig City Police Station si Kasim na haharap sa kasong may kinalaman sa iligal na droga. —sa panulat ni Joana Luna