RONDA PROBINSYA

Binawian ng buhay ang isang ina matapos na iligtas ang nalulunod na anak sa Buwaya River, Barangay Poblacion, Ilocos Sur.

Kinilala ang biktima na si Jona Alcantara Munar, 33 anyos.

Ayon sa imbestigasyon, kasama ni Munar ang kaniyang mga anak at pamangkin na magswimming nang mapansin nito na nalulunod na ang isa sa kaniyang mga anak.

Nagawang iligtas ng biktima ang kaniyang anak ngunit siya ay nalunod rin.

Matapos na maiahon ng mga rumespondeng miyembro ng salcedo Municipal Police Station, BFP at MDRRMC si Munar ay agad itong isinugod sa ospital ngunit idineklarang dead on arrival.—sa panulat ni Airiam Sancho

Aabot sa 15 pasahero ang sugatan, matapos mahulog ang sinasakyang truck sa bangin, na halos sampung metro ang lalim sa Tabuk, Kalinga Province.

Ayon kay Provincial Director Police Colonel Davy Vicente Limmong, nawalan ng preno ang truck na minamaneho ni Noriel Aragon habang pababa sa pakurbang bahagi ng kalsada sa Barangay Nambaran kaya dumiretso ito sa bangin.

Ani Limmong, lulan ng truck ang 15 indibidwal kabilang ang pitong menor de edad.

Nagtamo ng head-injury si Melnard Bawagan, 30 anyos, habang galos at sugat naman ang tinamo ng iba pang pasahero at driver ng truck.—sa panulat ni Joana Luna

Arestado ang isang tauhan ng Bureau of Corrections (BUCOR) nang barilin nito ang nakainumang babae sa Panabo, Davao Del Norte.

Ayon sa otoridad, naganap ang pamamaril sa isang floating restaurant sa panabo kung saan magkakasamang uminom ng alak si Corrections Senior Officer 2 Jose Ariel Dela Cruz at biktimang si Jenelie Del Campo kasama ang iba nilang kaibigan.

Paliwanag ng pulisya, nagkaroon ng alitan sa pagitan nila Cs02 Dela Cruz at Jenelie bago magpasyang umuwi ang mga ito.

Isang bangka ang sinakyan ng dalawa pabalik sa pangpang mula sa floating restaurant, at nang makababa, binaril umano ni Dela Cruz si Jenelie bago tumakas lulan ng kaniyang sasakyan, na agad ikinasawi ng biktima.

Nahuli sa Hot-Pursuit Operation si Dela Cruz nang makabangga ito ng iba pang sasakyan habang hinahabol ng mga otoridad.

Haharap sa kasong murder si CS02 Dela Cruz.—sa panulat ni Joana Luna

Huli cam ang isang motorcycle taxi service driver matapos mambastos at manghipo ng pasahero.

Sinabi ng pasahero na si Grasya, 24 na taong gulang, hinimas umano ng driver ang kanyang hita at niyayaya pa ito sa isang hotel .

Kinilala naman ang suspek na si Dennis Bendecio, isang Joyride driver.

Ipinabatid ni Grasya na sa puntong iyon ay nanginginig na siya sa takot  dahil baka dalhin ito sa madilim na lugar at may gawing masama.

Aniya, nang malapit na siyang bumaba ay agad namang humingi ng paumanhin ang driver ngunit desidido ang biktima ng magsampa ng kaso sa driver.

Samantala, sinabi ng pamunuan ng Joyride na agad nilang tinanggal sa serbisyo ang nasabing driver.

Patay ang 53 anyos na lalaki matapos na saksakin habang nakikipaglamay sa Dagupan City.

Batay sa report, kinilala ang biktima na si Armando Siapno Sr. at suspek na si Jay-R Dizon na parehong residente ng Barangay Lucao sa nasabing lungsod.

Ayon sa anak ng biktimang nakasaksi sa krimen, nakaupo aniya ang kaniyang ama habang kalong ang tatlong taong gulang na apo nang lumapit si DIzon at bigla na lamang itong sinaksak sa dibdib.

Samantala, hangad ng nagdadalamhating pamilya ni Siapno na mabigyan ng hustisya ang nangyaring krimen.—sa panulat ni Airiam Sancho

Binawian ng buhay ang isang 19 anyos na binata matapos mabaril ng isang pulis sa Pampanga.

Ayon sa imbestigasyon, nagtamo ng tama sa dibdib at leeg ang biktimang si Abelardo Vasquez Jr.

Batay sa kaniyang pinsan nagkukwentuhan lamang sila nang bigla umanong sitahin ni Police Corporal Alvin Pastorin.

Aniya, naingayan daw ang pulis kaya’t kinausap ito ng biktima ngunit tinulak daw ito at biglang nagpaputok ng warning shot na sinundan pa ng tatlong putok ng baril hanggang sa masawi ang biktima.

Ngunit batay sa report ng pulisya, sinita raw ni Pastorin ang magpinsan dahil wala itong suot na face mask at mga damit pang-itaas.

Matapos nito ay umalis umano si Pastorin at nagtungo sa kaniyang sasakyan subalit pinagbabato raw ito ng grupo ng biktima.

Sa pangamba niya ay nagpaputok siya ng baril hanggang sa matamaan si Vasquez.

Nasa ilalim na ng kustodiya ng Bacolor Police si Pastorin habang desidido naman ang pamilya ng biktima na magsampa ng kaso at panagutin ang suspek.—sa panulat ni Airiam Sancho

Patay ang dalawang rider at isang babaeng nadamay sa karera ng motorsiklo sa lungsod ng Malaybalay, Bukidnon.

Ayon kay Police Sergeant Rusty Fuentes ng Malabaybalay City Police Station, kinilala ang mga nasawi na sina Florendo Cabatbat Jr., 21 anyos, Kert Sabas Togle, 16 anyos at Abegail Manalo 22 anyos.

Aniya, nahagip ng motorsiklo sa karera ang multicab na sinasakyan ni manalo dahilan upang magkarambola ang mga sasakyan na nagresulta sa pagkasawi ng tatlong indibidwal.

Samantala, patuloy ang imbestigasyon ng mga otoridad sa insidente at pinaghahanap ang iba pang sangkot sa illegal drag racing.—sa panulat ni Airiam Sancho

Tatanggap ng 25 kilong bigas, ang mga residenteng naka-kumpleto na ng kanilang bakuna kontra COVID-19, sa Vigan, Ilocos Sur.

Ayon kay Mayor Juan Carlo Medina, layon ng nasabing hakbang na mas mahikayat ang hindi pa bakunadong mga residente sa syudad.

Paliwanag ng Alkalde, upang makatanggap ng nasabing benepisyo ay kinakailangang fully vaccinated ang residente at mismong sa lungsod ng Vigan nabakunahan.

Target ng lokal na pamahalaan ng vigan na matapos ang pamimigay ng benepisyo sa Disyembre.—sa panulat ni Joana Luna