RONDA PROBINSYA

Nasakote ng mga elemento ng Motorcycle Patrol Unit ang dalawang drug suspects, kabilang ang isang menor de edad, sa isinagawang anti-criminality operation sa Road 16, New Lower Bicutan, Taguig City.

Ayon sa Taguig PNP, nakilala ang mga suspek na sina Norman Tria at alyas “Mat” na labimpitong taong gulang lamang.

Nakumpiska mula sa kanila ang mahigit tatlong gramo ng hinihinalang shabu na nagkakahalaga ng 23,800 pesos.

Sasampahan ng kaukulang kaso si Tria habang itu-turn over naman sa DSWD ang menor de edad na suspek.

Kalaboso ang tatlong drug personalities, kabilang ang isang dating barangay kagawad, matapos madakip sa ikinasang buy-bust operation sa P. Rosales Street, Brgy. Sta Ana, Pateros.

Kinilala ang mga suspek na sina Imelda Soriano, Nenita Buenaventura, at Renato Sanga na dating barangay kagawad ng Brgy. Ligid-Tipas, Taguig.

Sina Soriano at Buenaventura ay kasama sa unified drugs watchlist ng Pateros PNP.

Nasabat mula sa kanila ang isang timbangan at ilang sachets ng hinihinalang shabu na nagkakahalaga ng 47,600 pesos.

Dinagsa ng mga turista ang ilang mga pasyalan sa Tagaytay City kasabay ng pagluluwag ng quarantine status sa Metro Manila at mga karatig-probinsya.

Ayon kay Tagaytay Tourism Chief Jarryd Bello, halos domoble ang bilang ng mga nagpunta ngayong Nobyembre kumpara noong mga nakaaang buwan.

Aniya, naitala sa Picnic Grove angnasa 56,000 bisita ngayong buwan mula sa 26,000 noong Oktubre.

Dagdag pa nito, sumigla rin ang negosyo ng maraming kainan at mga lodging house sa nasabing lugar.

Samantala, hinikayat niya ang mga turista na pumunta sa Tagaytay lalo’t bukas ito para sa lahat ng edad. Kailangan lamang aniya na magpakita ng vaccination card para makapasok sa mga pasyalan. —sa panulat ni Airiam Sancho

Nasawi ang isang lalaki habang nagpapagupit matapos pagbabarilin ng hindi pa nakikilalang salarin sa lungsod ng Cotabato.

Ayon sa imbestigasyon, kinilala ang biktimang si Jomar Utto Tatak, residente ng Barangay Rosary Heights 3 sa nasabing lugar.

Nangyari ang krimen sa loob ng isang barber shop nang biglang pumasok ang suspek at pinagbabaril ang biktima.

Nagtamo ng mga tama ng bala sa iba’t ibang parte ng katawan si Jomar na naging sanhi ng agaran nitong pagkamatay.

Patuloy namang iniimbestigahan ang motibo at pagkakakilanlan ng suspek. —sa panulat ni Airiam Sancho

Arestado ang dalawang suspek matapos ang ikinasang buy-bust operation sa lungsod ng Caloocan.

Batay sa imbestigasyon ng Northern Police District, nasamsam sa mga hindi pinangalanang itinuturing na high value target ang nasa 54 na milyong piso (P54-M) ng hinihinalang shabu.

Patuloy namang iniimbestigahan ng mga otoridad ang naturang insidente. —sa panulat ni Airiam Sancho

Required na ang vaccination card sa mga nais pumasok sa mga mall sa Lapu-Lapu City sa Cebu.

Alinsunod ito sa kautusan ng lokal na pamahalaan kung saan ang mga hindi bakunadong indibidwal ay kailangang sumalang sa antigen COVID-19 test upang makapasok sa naturang establisyemento.

Sinabi naman ng isang opisyal ng isang mall na posibleng mabawasan ang mga papasok sa mall ngunit mas mabuti na rin umano ito bilang bahagi ng pag-iingat sa hawaan ng COVID-19.

Ayon naman sa isang opisyal ng local vaccination operation center, ang pag-oobliga ng antigen test ay paraan rin upang mamonitor ang mga tinatamaan ng virus na hindi pa bakunado. —sa panulat ni Hya Ludivico

Nasa 37,000 Sinovac COVID-19 vaccines sa Quezon Province ang hindi umano nagagamit dahil ayaw ng mga residente na magpaturok nito.

Sinabi  ni Dr. Tiong Eng Roland Tan, Assistant Department Head ng Integrated Provincial Health Office ng lalawigan, na problema ang vaccine hesitancy at pagpili ng brand ng bakuna sa probinsiya.

Aniya, nag-aalisan ang mga residenteng pumipila para magpabakuna kapag nabatid ng mga ito na Sinovac ang ituturok sa kanila.

Samantala, sinabi naman ni Vaccine Czar Sec. Carlito Galvez Jr., na malaki ang kontribusyon ng Sinovac vaccines sa isinasagawang pagbabakuna sa bansa.

Giit ni Galvez, kung hindi bumili ang pamahalaan ng Sinovac ay posible aniyang hanggang ngayon ay wala pa sa kalahati ang bilang ng mga nabakunahan kontra COVID-19. —sa panulat ni Hya Ludivico

Patay ang isang 33 anyos na lalaki matapos pagtatagain ng sariling ama sa lalawigan ng Misamis Oriental.

Kinilala ang biktma na si Marjun habang ang suspek naman ay si Enerio.

Ayon sa imbestigasyon, nag-iinuman lang ang mag-ama kasama pa ang isang anak nito nang magkainitan umano dahil hindi raw patas ang pagtrato ng ama sakanilang magkapatid.

Nagalit naman ang ama nito ng maghagis ng bato si Marjun sa kanilang bahay dahilan upang kunin niya ang palakol at pagtatagain ang anak hanggang sa masawi.

Nais naman ng ina ni Marjun na huwag ng makulong ang asawa ngunit ayon sa pulisya magsasampa pa rin sila ng kaso at hahayaan na ang korte mismo ang magdesisyon. —sa panulat ni Airiam Sancho

Binawian ng buhay ang isang ina matapos na iligtas ang nalulunod na anak sa Buwaya River, Barangay Poblacion, Ilocos Sur.

Kinilala ang biktima na si Jona Alcantara Munar, 33 anyos.

Ayon sa imbestigasyon, kasama ni Munar ang kaniyang mga anak at pamangkin na magswimming nang mapansin nito na nalulunod na ang isa sa kaniyang mga anak.

Nagawang iligtas ng biktima ang kaniyang anak ngunit siya ay nalunod rin.

Matapos na maiahon ng mga rumespondeng miyembro ng salcedo Municipal Police Station, BFP at MDRRMC si Munar ay agad itong isinugod sa ospital ngunit idineklarang dead on arrival.—sa panulat ni Airiam Sancho

Aabot sa 15 pasahero ang sugatan, matapos mahulog ang sinasakyang truck sa bangin, na halos sampung metro ang lalim sa Tabuk, Kalinga Province.

Ayon kay Provincial Director Police Colonel Davy Vicente Limmong, nawalan ng preno ang truck na minamaneho ni Noriel Aragon habang pababa sa pakurbang bahagi ng kalsada sa Barangay Nambaran kaya dumiretso ito sa bangin.

Ani Limmong, lulan ng truck ang 15 indibidwal kabilang ang pitong menor de edad.

Nagtamo ng head-injury si Melnard Bawagan, 30 anyos, habang galos at sugat naman ang tinamo ng iba pang pasahero at driver ng truck.—sa panulat ni Joana Luna