RONDA PROBINSYA

Isang rider at pedestrian ang nasawi sa magkahiwalay na road accidents sa bayan ng Tagkawayan, Quezon.

Kinilala ng Tagkawayan Municipal Police ang mga biktimang sina cenon panaligan, singkwenta’y dos anyos at Felipe Zara, sisenta’y tres anyos.

Tumatawid si panaligan sa Quirino Highway sa Barangay Poblacion nang mahagip ito ng van na patungong Bicol na minamaneho ni Nicolas Oredo Jr.

Naisugod pa sa Maria Lourdes Eleazar General Hospital ang biktima subalit binawian din ng buhay.

Binabagtas naman ng rider na si Zara ang national highway nang tamaan ng nakalas na gulong mula sa isang truck sa Barangay Bagong Silang.—sa panulat ni Drew Nacino

Malaya nang makapapasok ng Ilocos Sur ang mga fully vaccinated na residenteng magbabalik lalawigan.

Inanunsyo ni Governor Ryan Singson na hindi na nila hahanapan ng negatibong resulta ng COVID-19 test at wala na ring quarantine protocols basta fully vaccinated ang mga uuwing residente.

Ang tangi anyang ipakikita nila ay vaccination card upang mabatid na bakunado na ang mga ito kontra COVID-19.

Gayunman, kailangang sumailalim sa 14-day quarantine at antigen test ang mga nakatanggap pa lamang ng first dose.

Samantala, hinihintay na ang guidelines ng provincial government ng Ilocos Sur bago ipatupad ang nasabing polisiya. —sa panulat ni Drew Nacino

Isang kandidato sa pagka-konsehal sa San Simon, Pampanga ang nasawi matapos pagbabarilin pasado alas siyete kaninang umaga.

Nakilala ang biktimang si Rogelio Jon Salvador na buma-biyahe sakay ng kanyang SUV nang paputukan ng mga suspek na lulan naman ng isang sasakyan at binabagtas ang kabilang direksyon.

Ayon sa saksi, pinagbabaril ng mga suspek ang sasakyan ng biktima nang magpang abot sa San Simon-Baliwag Road sa Barangay San Miguel.

Nasawi rin ang driver ng kandidato habang isinugod sa ospital ang isa pang sakay ng SUV.

Iniimbestigahan na ng mga otoridad ang nsabing insidente partikular ang motibo rito.

Dinampot ng mga awtoridad ang dalawang lalaking nagsusugal matapos mahulihan ng umano’y shabu sa Osmeña Highway Northbound, Barangay Bangkal sa Makati.

Kinilala ang mga suspek na sina Orlando Bestrollo Jr. at George Paez, pawang mga nakatira sa Maricaban, Pasay City.

Ayon sa mga pulis, nagpapatrulya sila sa lugar nang mamataan ang mga nagsusugal na lalaki at nang makita sila ay agad na nagtakbuhan ang mga ito.

Tanging sina Bestrollo at Paez ang nahuli kung saan nasabat mula sa mga ito ang bet money na isang libong piso at hinihinalang shabu na tinatayang nagkakahalaga ng 43,000 pesos.

Naniniwala naman ang mga pulis na ginagamit na rin ngayon na pantaya ng mga sugarol ang ipinagbabawal na gamot.

Tinatayang 75,000 pesos na halaga ng hinihinalang shabu ang nasabat ng mga awtoridad sa ikinasang operasyon sa Brgy. Ligid-Tipas, Taguig City.

Kinilala ang mga nadakip na suspek na sina Alhazram Bansuan, Anna Marie Fallet, at Angelic Reyes.

Nakumpiska mula sa kanila ang 11 gramo ng halaga ng hinihinalang shabu na nagkakahalaga ng higit 74,000 pesos at 500 pisong buy-bust money.

Nakatakdang sampahan ng kaukulang kaso ang mga suspek.

Nadakip ng mga elemento ng Southern Police District (SPD) ang tatlong lalaki na sangkot umano sa laganap na kalakalan ng iligal na droga sa 4th Estate Subd., Brgy. San Antonio, Paranaque City.

Ayon sa SPD, nakilala ang mga suspek na sina Jayson Bufete, Vincent Bufete at Mark Vincent Rionesto, kapwa nakatira sa Brgy. Marcelo Green.

Bukod sa 1,000 pisong buy-bust money, nakumpiska rin mula sa mga suspek ang mahigit 30,000 pisong halaga ng umano’y shabu.

Naghihimas na ngayon ng malamig na rehas na bakal ang mga suspek at nakatakdang sampahan ng kaukulang kaso.

Nagpahayag ng suporta sa BBM-SARA Uniteam ang apatnapu’t apat (44) na alkalde mula sa lalawigan ng Cebu bilang opisyal nilang pambato sa nalalapit na 2022 national elections.

Ginawa ang hakbang kasabay nang pagdalo nina presidential aspirant Ferdinand “Bongbong” Marcos, Jr. at vice-presidential bet Inday Sara Duterte sa regional planning conference ng League of Municipalities of the Philippines (LMP) sa pangunguna ni Chapter President Mayor Ma. Esperanza Christina Frasco.

Matatandaang sinelyuhan na rin ang alyansa ng pamunuan ng Partido Federal ng Pilipinas (PFP), Lakas-CMD, Hugpong ng Pagbabago (HNP) at Puwersa ng Masang Pilipino (PMP) para isulong ang BBM-SARA Uniteam sa nalalapit na eleksyon.

Kaagad namang nagpasalamat si Marcos sa mga alkalde sa Cebu na sama-samang nagpahayag ng suporta sa kandidatura nilang dalawa ni Inday Sara.

Sinabi ni Frasco na wala nang iba pang presidential candidate ngayon ang may kakayahan at karanasan na katulad ni Marcos.

Subok na aniya ang track record ni BBM matapos nitong maglingkod bilang gobernador, bise-gobernador, kongresman, at senador.

Halos 80,000 pisong halaga ng hinihinalang shabu ang nasabat mula sa isang kilabot umanong tulak ng droga sa buy-bust operation sa JB Roxas Street, Barangay Olympia, Makati City.

Kinilala Makati Chief of Police Col. Harold Dipositar ang suspek na si Petersymon Obusan, residente ng Sta. Mesa, Maynila.

Nakumpiska mula sa suspek ang isang motorsiklo, bag, buy-bust money na nagkakahalaga ng limandaang piso at higit 77,000 pesos na halaga ng hinihinalang shabu.

Kasong paglabag sa Comprehensive Dangerous Drugs Act ang isasampa laban sa suspek.

Arestado ang dalawang lalaki dahil sa umano’y pagkakasangkot sa kalakalan ng iligal na droga sa Magsaysay Road 16, Brgy. New Lower Bicutan sa Taguig.

Kinilala ni Southern Police District Director Brig. Gen. Jimili Macaraeg ang mga suspek na sina Datu Ilo Dalgan at Haris Lasdon.

Maliban sa buy-bust money na isang libong piso at timbangan, nasabat din mula sa kanila ang ilang gramo ng hinihinalang shabu na nagkakahalaga mahigit 400,000 piso.

Inihahanda na ang kaukulang kasong isasampa laban sa mga suspek.

Natapos ang maliligayang araw ng dalawang lalaki na matagal nang nagtatago sa batas matapos madakip sa Brgy. San Dionisio, Parañaque City.

Kinilala ng Southern Police District (SPD) ang mga nahuli na sina alyas “Kaloy” na Top 12 sa listahan ng mga most wanted persons at alyas “Hanz” na Top 13 sa wanted list.

Ang dalawa ay may nakabinbin na dalawang bilang ng kasong rape sa isang korte sa Parañaque kung saan walang inirekomendang piyansa ang hukom para sa pansamantalang kalayaan ng mga ito.

Nasa custody na ng Parañaque City Police Station si alyas “Kaloy” habang dinala naman sa Bahay Pag-Asa si alyas “Hanz” na isang menor de edad.