RONDA PROBINSYA

Arestado ang isang babae sa bataan nang madiskubre ng Bureau of Customs Port of Clark (BOC-Clark) ang nasa tatlong milyong piso ng hinihinalang shabu na nakasilid sa isang maleta.

Ayon sa Philippine Drug Enforcement Agency-Region 3 (PDEA-3) kinilala ang suspek na si Arlyne Gemzon kung saan ang naturang maleta ay naka-consign sa kaniya galing sa South Africa.

Idineklarang mga damit lang ang laman ng padala ngunit nagpositibo ito sa iligal na droga pagdating sa x-ray, scanning at K9 sweeping operations.

Nang haluhughugin rin ang nasabing maleta ay nadiskubre ang mahigit apat na raang gramo (470) ng hinihinalang shabu.

Nahaharap naman ang suspek sa kasong paglabag sa Comprehensive Dangerous Drugs Act of 2002 at Customs Modernization and Tariff Act.—sa panulat ni Airiam Sancho

Binawian ng buhay ang isang negosyante matapos pagbabarilin ng riding in tandem sa loob ng kaniyang sasakyan sa Cebu City.

Kinilala ang biktima na si Jimmy Hernandez, residente ng Mandaue City.

Batay sa imbestigasyon ng otoridad, sakay ng SUV si Hernandez kasama ang kaniyang asawa at kasambahay nang tapatan sila ng hindi pa nakikilalang riding in tandem at pagbabarilin ang biktima sa Barangay Lipata, Minglanilla.

Samantala, personal na galit at away sa negosyo ang mga hinihinalang motibo ng mga otoridad sa posibleng ugat ng krimen.—sa panulat ni Airiam Sancho

Sampung establisyemento sa itinuturing na Nightlife Capital na Smallville Complex sa Mandurriao ang ipinasara ng Iloilo LGU dahil sa paglabag sa health protocols.

Ayon kay Jeck Conlu, tagapagsalita ng COVID-19 team ng Iloilo City government, maliban sa paglabag sa health protocols, ay pinatawan ng closure order ang ilang establishments dahil sa hindi pag-secure ng business permit.

Una rito, muling pinayagan ang night life sa naturang siyudad at inalis na rin ang liquor ban.—sa panulat ni Hya Ludivico

Plano na ng Zamboanga City Inter-Agency Task Force  na payagan ang mga batang lumabas ng kanilang mga bahay ngayong malapit na ang pasko at bunsod na rin ng patuloy na pagbaba ng COVID-19 cases sa bansa.

Kinumpirma ni Mayor Maria Isabelle Climaco – Salazar na ang pagsasailalim sa lungsod sa alert level 2 mula sa level 3 ang naging daan upang payagan ang mga bata na lumabas.

Magkakaroon na anya ang mga menor de edad ng pagkakataong maranasang makapamasyal at masilayan ang mga christmas decorations sa lungsod.

Batay sa Zamboanga Task Force COVID-19 data tracker, nasa 368 na lamang ang aktibong kaso ng COVID-19 sa lungsod.—sa panulat ni Drew Nacino

33 bangkay, kabilang ang isang fetus,  na hindi na-claim mula pa noong nakalipas na taon ang inilibing na sa mass grave sa Barangay Talabaan, Zamboanga City.

Ayon kay Mayor Maria Isabelle ‘Beng’ Climaco-Salazar, ang mga bangkay ay binigyan ng disenteng libing at misa.

Karamihan anya sa mga bangkay ay biktima ng krimen kung saan ang iba ay nakita pa sa mga liblib na lugar.

Walang nagtungo na kahit isang kaanak ng mga biktima kaya’t umabot na ng mahigit isang taon sa pribadong morge ang mga bangkay.—sa panulat ni Drew Nacino

Makakatanggap ng food packs ang mga residenteng magpapabakuna mula sa Rural Health Unit sa Bayan ng Paluan sa Occidental Mindoro.

Nabatid na tuloy-tuloy ang pagbabakuna sa ilalim ng ipinatupad na National Vaccination Drive kung saan, dinagsa ng mga residente ang  Municipal Gym sa nabanggit na lugar upang magpabakuna kahit ang kanilang mga Barangay ay malalayo o nasa mga bundok.

Bukod pa dito, marami rin ang nag-volunteer na Health workers para tumulong sa pagbabakuna lalo’t limitado lamang ang mga staff ng Rural Health Unit.

Kabilang sa ipinamigay na food packs ay may lamang 3kls bigas, canned goods at noodles upang mas mahikayat ang mga residente na magpaturok ng bakuna.

Sa ngayon, 24 na araw nang 0 reported COVID Case ang Bayan ng Paluan. —sa panulat ni Angelica Doctolero

Tinatayang dalawa punto apat na milyong pisong halaga ng smuggled na sigarilyo ang nasabat ng mga otoridad sa North Cotabato.

Tatlo katao naman ang inaresto ng Police Regional Office-12 na nagbenta ng kontrabando sa isang pamilihan sa bayan ng libungan.

Noong isang Linggo ay nakatanggap ang pro-12 ng tip na may ‘imported’ umanong mga sigarilyong itinitinda sa naturang pamilihan kaya’t agarang nagkasa ng entrapment operation ang mga otoridad.

Sa loob lamang ng isang buwan ay umabot na sa 4,800 rim ng smuggled na sigarilyo ang narekober mula sa mga bayan ng makilala at aleosan ang nai-turn-over na sa Bureau of Customs.—sa panulat ni Drew Nacino

Arestado ang dalawang lalaking suspek umano sa pagpatay sa Isnag Kapitay sa Barangay sa Lipa City, Batangas.

Sa bisa ng Search Warrant naaresto sa Barangay 8 ang mga suspek na kinilalang sina Wilson Manalo Alyas “Asi” at Adrian Taparo Cristobal na kabilang sa Bautista Gun-for-hire Criminal Group na nag-ooperate sa nabanggit na lugar.

Base sa imbestigasyon ng Lipa City Police Station, si alyas “Asi” ang itinuturong pumaslang kay Barangay Captain Cesar Dimayuga Catibog noong Hunyo a-9, 2021 matapos bumaba mula sa Barangay patrol na kaniyang sinasakyan.

RA 10591 o ang Comprehensive Firearms and Ammunition Regulation Act ang kasong isinampa sa dalawang suspek sa Lipa City Prosecutor’s Office. —sa panulat ni Angelica Doctolero

Ligtas na sa toxic red tide ang ilang coastal waters sa Visayas.

Ayon sa  Bureau of Fisheries and Aquatic Resources (BFAR) , kabilang dito ang baybaying dagat ng Daram Island,Maqueda, Cambatutay, Irong-Irong at San Pedro Bays sa Western Samar, Cancabato Bay sa Tacloban, Leyte at Coastal Waters ng Biliran Island.

Gayunman, nananatiling positibo sa red tide toxin ang ilang Coastal Waters sa bansa.

Kabilang dito ang Coastal Waters ng Bataan, Dauis at Tagbilaran City sa Bohol, Matarinao Bay at Guiuan sa Eastern Samar, Coastal Waters ng Baroy sa Lanao del Norte, Dumaguillas at Lianga Bay sa Zamboanga del Sur.

Batay sa laboratory result, nakitaan pa rin ng presensiya ng paralytic shellfish poison sa mga lamang dagat doon na mapanganib kainin. —sa panulat ni Hya Ludivico