RONDA PROBINSYA

Arestado ang dalawang lalaki matapos maaktuhang nagsusugal sa barangay Palatiw, Pasig City.

Kinilala ang mga suspek na sina, Marnel Vinoya Y Bugayon,  31-anyos at John Carlo Borlaza, 25-anyos.

Ayon kay PBGen. Orlando Yebra Jr., nakatanggap sila ng report galing sa isang concerned citizen na gumagawa ng iligal na aktibidad ang dalawang suspek.

Agad na nagsagawa ng surveillance ang mga otoridad dahilan para maaresto ang dalawang suspek.

Narekober sa dalawa ang P170 na ginamit sa sugal at dalawang piraso ng rolling dice.

Sa ngayon dinala muna sa Rizal Medical Center si Bugayon at Borlaza upang isailalim sa drug test bago dalhin sa Pasig City Police Custodial Facility.

Nahuli ng mga tropa ng Eastern Mindanao Command (EastMinCom) ang dalawang amasona sa Sitio New Laslasakan, Barangay Palma Gil, Talaingod, Davao del Norte matapos silang iwanan sa bakbakan ng kanilang NPA leader.

Kinilala ni EastMinCom Commander LtGen. Greg T. Almerol ang dalawang nahuling NPA members na sina: Masarinda Balite alyas Alina, medical/supply officer, at Odessa Dumol.

Ayon kay Lt. Gen. Almerol, nagkaroon ng 20-minutong palitan ng putok sa pagitan ng mga tropa at ng grupo ng NPA, matapos na tumanggi ang kanilang lider na si Lutenant Apoga alyas Macky na sumuko.

Sa kasagsagan ng bakbakan, tumakas si Alyas Macky at Ilan pang mga kasamahan, at naiwan ang dalawang amasona, na  nahuli matapos masugatan ang isa sa kanila.

Patuloy ang pagtugis ng mga tropa sa nagsitakas na terorista, habang ang sugatan na si Balite ay dinala naman sa ospital para ipagamot.

Narekober ng mga tropa sa pinangyarihan ng enkwentro ang 3 M16 rifles, isang M4 rifle, medical kits, at mga personal na gamit ng mga nahuling NPA. —sa ulat ni Jaymark Dagala (Patrol 9)

Aprubado na ng Inter-Agency Task Force ang pagluluwag ng restrictions sa lalawigan ng Apayao sa alert level 2 simula ngayong araw hanggang December 15.

Ipinaliwanag ni Acting Presidential Spokesman Karlo Nograles na ang pagbaba sa alert level 2 mula sa level 3 ay base sa mga pagbabago sa metrics ng pagtukoy sa alert level classification ng mga lugar.

Kabilang sa inalis ang one-week growth rate na basehan para sa paglipat sa alert level 1 patungo sa level 2; escalation mula alert level 1 patungo sa level 2 kung ang total COVID-19 bed utilization ay tataas patungong moderate o high risk;

Ang escalation mula alert level 2 patungong level 3 kung ang case classification at total COVID-19 bed utilization ay kapwa nasa moderate risk o kung ang case classification ay nasa high hanggang critical risk. —sa panulat ni Drew Nacino

Isang doktor ang patay matapos tambangan ng riding-in-tandem sa Cagayan De Oro City, Misamis Oriental, kahapon.

Kinilala ng Cagayan De Oro City Police ang biktimang si Dr. Raul Winston Andutan, director ng Maria Reyna Xavier University Hospital, na pangunahing medical facility sa lungsod.

Tatlong tama ng bala ng kalibre 45 ang tumapos sa buhay ni Andutan na noo’y patungo na sa ospital nang pagbabarilin ng mga hindi nakilalang salarin.

Minamaneho ng biktima ang kanyang toyota fortuner nang matiyempuhan ng riding-in-tandem sa kanto ng 12^th at 29^th streets sa barangay Nazareth.

Samantala, bumangga naman ang SUV ng doktor sa isang laundry shop kung saan isang bystander ang nasaktan.

Inaalam na ng pulisya ang motibo sa pamamaslang at sino ang mga nasa likod ng krimen. —sa panulat ni Drew Nacino

Patay ang isang pulis matapos pagbabarilin ng riding-in-tandem sa lalawigan ng Maguindanao.

Kinilala ang biktima na si Corporal Henry Mangaser Olindo, 44-anyos, nakatalaga sa Municipal Police Station ng Lumbatan Lanao Del Sur.

Batay sa ulat, lulan ng motorsiklo ang biktima nang dikitan at pagbabarilin siya ng mga suspek.

Agad namang tumakas ang suspek patungo sa bayan ng Ampatuan.

Pinaniniwalaang mga miyembro ng liquidation squad ng Bangsamoro Islamic Freedom Fighters (BIFF) ang pumaslang  kay Olindo.

Patuloy naman ang imbestigasyon ng mga otoridad sa naganap na pamamaril. —sa panulat ni Hya Ludivico

Isinara na muna ang St. Dymphna Isolation Facility sa Imus City dahil sa kawalan ng pasyente.

Ayon kay Dr. Ferdinand Mina, Officer-In-Charge ng Imus City Health Office, naka-home quarantine na lamang ang natitirang 12 aktibong kaso kung saan 10 dito ang walang sintomas habang dalawa ang mild cases.

Wala na ring naitalang moderate, severe, at kritikal na kaso ng COVID-19 sa lungsod.

Sinabi pa ni Mina na isa hanggang dalawa na lamang ang average na bilang na kaso ng COVID-19 kada araw sa siyudad.

Tiniyak naman ni Mina na handa pa rin ang isolation facility ng lungsod at COVID-19 wards sa mga ospital sakaling magkaroon muli ng mga pasyente. —sa panulat ni Hya Ludivico

Inalis na ng Inter-Agency Task Force (IATF) ang travel restrictions sa Laguna sa ilalim ng Alert level 2.

Sa guidelines na inilabas ng IATF, pinapayagan nang lumabas at makapagbiyahe ang mga edad 18 hanggang 65 gayun din ang mga nasa 17 taong gulang.

Nabatid na papayagang makalabas ang mga nabanggit na edad kung kukuha ng essential goods at services.

Bukod pa dito, pinapayagan na ring mag-total operation ang mga establisimiyento at aktibidad ng mga business enterprise sa 70% capacity para sa mga fully vaccinated.

Magkakaroon narin ng outdoor venue capacity para naman sa mga bakunado at hindi pa bakunado.

Pinahihintulutan na rin ng IATF na magbukas ang mga tourist attraction sa lalawigan tulad ng museums, parks, public gardens, at social events tulad ng wedding receptions, birthdays, maging ang personal care services at family reunions.

Layunin nitong makabawi sa naluging puhunan at muling maitaas ang ekonomiya sa naturang lugar matapos ang halos 2 taon na pagkakasara ng mga negosyo. —sa panulat ni Angelica Doctolero

Arestado dahil sa kasong Murder ang limang lalaki sa Laguna matapos masangkot sa brutal na pagpatay sa isang piloto ng Philippine Airline noong buwan ng Hulyo,2021 sa Lungsod ng San Pablo, Laguna.

Ayon sa mga tauhan ng PNP Region 4-a, kinilala ang biktima na si Jeffrey Palcis, 41-anyos na dating Konsehal at Board Member ng Laguna.

Kinilala naman ang mga suspek na sina Rolando Cuevas alyas “Bancunyo”; Jherico Demesa; isang alyas “Mayor”; isang Jhon at Peter Doe na nahaharap sa patung-patong na mga kaso.

Patuloy pang iniimbestigahan ang pangyayari upang linawin ang motibo at kung sino ang dapat na managot o responsable sa pagpaslang sa naturang piloto. —sa panulat ni Angelica Doctolero

Arestado ang isang Cult Leader ng isang religious group sa bayan ng Asturias sa Cebu bunsod ng alegasyong panggagahasa sa dalawa nitong miyembro.

Ayon sa National Bureau of Investigation-Central Visayas (NBI 7),  may dalawang kaso ng rape si Tedorico Feriol na kilala ring Brod Doring, tatay at master sa nasabing organisasyon.

Ipinabatid ni Agapito Gierran ng NBI 7, nasa 17 taong gulang naman ang isa sa mga biktima na nagsilbi kay Feriol habang 32 anyos naman isa.

Ani Gierran, sa inilabas na imbestigasyon ng NBI, lumutang pa ang ibang biktima ng suspek na pawang mga kababaihan .

Aniya, nagpapanggap umanong faith healer ang suspek para makakuha ng mga kababaihan na magpapagaling sa kanya.

Ibinahagi ng dating alkalde ng bayan ng Candaba, Pampanga na si Jerry Pelayo ang malaking problema na idinudulot ng online sabong sa mahihirap nilang kababayan.

Aniya, ikinabahala ng kanilang pamilya ang masamang epekto na dulot nito matapos magpakamatay ang isa nilang kaanak na umano’y nabaon sa utang dahil sa “talpakan”.

Nauwi rin sa pagnanakaw ang lalaki nilang kasambahay na apat na taon nang naninilbihan sa kanilang pamilya dahil sa nasabing sabong.

Binigyang diin naman niya na karamihan sa mga mananaya sa e-sabong ay mga mahihirap na nagbabakasakaling manalo at kumita ng pera kung saan aniya ang ibinigay na 4Ps o ayuda ng gobyerno ay ginamit lamang bilang pantaya.

Samantala, sinabi naman ni Pelayo na posibleng mapigilan ang e-sabong kung ito ay gugustuhin.   —sa panulat ni Airiam Sancho