Patay ang isang konsehal sa bayan ng Sarrat, Ilocos Norte matapos na pagbabarilin ng dalawang salarin na sakay ng motorsiklo nitong Lunes ng umaga.

Kinilala ang biktima na si Apolonio Medrano, 69-anyos, dating pulis at konsehal ng Sarrat na nakatakda sanang tumakbo muli sa darating na eleksyon.

Batay sa paunang imbestigasyon, kakatapos lamang dumalo ng flag raising ceremony ni Medrano at pasakay na ng kanyang sasakyan nang bigla na lamang lapitan ng mga suspek at pagbabarilin.

Isinugod pa sa ospital ang konsehal na nagtamo ng limang tama ng bala ngunit idineklarang dead on arrival.

Patuloy ang imbestigasyon ng Sarrat Municipal Police upang matukoy ang pagkakakilanlan ng mga salarin at motibo sa pagpaslang sa biktima. —sa panulat ni Hya Ludivico

Nareskyu ng mga tauhan ng Philippine Coast Guard (PCG) ang limang mangingisda matapos lumubog ang bangkang kanilang sinasakyan sa karagatang bahagi ng Labor Island sa Surigao City.

Base sa report ng PCG, isang boat operator at apat na kasamahang mangingisda  ang nailigtas matapos hampasin ng malakas na alon ang bangkang kanilang sinasakyan.

Ayon sa PCG, sinuspindi na ang biyahe ng mga sasakyang pandagat dahil sa gale warning signals pero hindi umano nakinig ang mga mangingisda.

Dahil dito, nagbabala ang naturang ahensya sa publiko partikular na sa mga mangingisda na sumunod sa abiso ng PAGASA at  iwasan munang pumalaot lalo na kung masama ang panahon upang maiwasan ang insidente. —sa panulat ni Angelica Doctolero

Aabot sa mahigit P13-M ang nasabat ng mga otoridad sa isang lalaking suspek sa Barangay Tungkil, Bayan ng Minglanilla, Southern Cebu.

Kinilala ang suspek na si Eric Bacaresas Lapena, 39-anyos na nahuli ng mga operatiba ng Minglanilla Police Station sa koordinasyon ng Philippine Drug Enforcement Agency-Central Visayas.

Nabatid na aabot sa 1.875 na gramo ng shabu ang nakuha mula sa suspek na kilala umanong naglalako ng ilegal na droga sa nabanggit na lugar.

Nahaharap ngayon sa kasong paglabag sa RA 9165 o Comprehensive Dangerous Drugs Act of 2002.

Samantala, pinuri naman ni Police Brig. Gen. Roque Eduardo Vega, Hepe ng Police Regional Office-Central Visayas, ang Minglanilla Police sa pagkakadakip sa suspek na itinuturing pa lang high value target dahil sa Police drug watchlist. —sa panulat ni Angelica Doctolero

Patay ang isang tricycle driver at pasahero nito matapos salpukin ng isang SUV at mahulog sa ilog sa Malabon.

Kinilala ang mga biktima na si Norberto Pinuela,  65-anyos, driver ng tricycle, at pasahero niyang si Novelina Esto, 54-anyos habang kinilala naman ang suspek na driver ng SUV na si Kim Russel Sioco.

Base sa nakuhang CCTV ng mga otoridad, binabaybay ng mga biktima ang Lambingan Bridge sa Barangay Concepcion nang biglang mapunta sa kanilang linya ang kasalubong na SUV.

Dito na sila nasalpok kung saan, sa lakas ng pagkakabangga ay nawasak ang harapan ng suv habang humiwalay naman ang sidecar ng tricycle, at tumilapon sa ilog si Pinuela.

Nakita na lamang ang bangkay ni Pinuela kinaumagahan sa bahagi na ng katabing bayan ng Navotas.

Nakadetine na sa himpilan ng pulisya ang suspek na si Sioco na mahaharap sa reklamong Reckless Imprudence Resulting to Multiple Homicide.  —sa panulat ni Angelica Doctolero

Tatlo ang patay, makaraang pagbabarilin ng mga naka-bonnet na salarin sa isang bahay sa Barangay Inayawan, Cebu City.

Kinilala ang mga biktimang sina Jake Bas, 26-anyos; Ernie Sales, 39-anyos at Mark Pepito Aventurado, 16-anyos.

Ayon sa Cebu City Police, naganap ang insidente sa bahay ni Sales, na nagsilbing drug den at lugar kung saan nagsasagawa ng mga transaksyon ang mga drug dealer.

Maaari ring ginantihan lamang ang mga biktima ng mga karibal na grupo lalo’t sangkot ang grupo ni Bas sa ilang serye ng pamamaril sa inayawan.

Batay sa imbestigasyon, madalas tawagan si Bas ng ilang nakakulong na drug personalities kung may ipatutumbang pusher na hindi nakapag-remit ng pera. —sa panulat ni Drew Nacino

Nasamsam ng mga tauhan ng 7th Infantry Battalion sa ilalim ng Joint Task Force Central ng Philippine Army ang ibat-ibang klase ng mga baril at bala matapos madiskubre ang mga taguan ng armas ng mga hinihinalang Lawless Element or Terrorist Groups sa Sultan Kudarat.

Sa pahayag ni Lt. Gen. Alfredo Rosario, Jr., commander ng AFP- Western Mindanao Command, nahukay ng kanyang mga tauhan ang mga nasabing armas na ibinaon sa Sitio Kanalan, Barangay Marquez, Esperanza na sinasabing pag-aari ng mga kasapi ng isang mass organization matapos isumbong ng mga concerned citizen.

Kabilang sa mga nasamsam ang 34 na 12-gauge shotgun, isang m79 grenade launcher, isang springfield rifle, isang cal. 22 rifle, dalawang single-shot pistol, isang cal. 45 pistol, isang uzi pistol, dalawang IED detonator, at iba’t ibang klase ng mga bala.

Inilalagay sa ilalim ng kustodiya ng 7IB para sa pag-iingat ang mga baril at bala na nasamsam sa nabanggit na lugar. —sa panulat ni Angelica Doctolero

Aabot sa 235 na bahay ang naabo sa naganap na sunog sa Isabela City, Probinsya ng Basilan.

Ayon Basilan Provincial Government sa lugar, aabot sa 500 pamilya ang nawalan ng matutuluyan kasunod ng naganap na sunog.

Dahil dito, nananawagan sa publiko ang lokal na pamahalaan ng Isabela na tulungan ang mga biktima ng sunog, na ngayo’y nangangailangan ng mga damit, pagkain , malinis na tubig at hygiene kit.

Sa ngayon ay patuloy pang iniimbestigahan ng mga Arson Investigator ng Bureau of Fire Protection at ng Basilan PNP ang naganap na sunog. —sa panulat ni Angelica Doctolero

Arestado dahil sa pagbibit ng iligal na droga ang pitong indibidwal sa Brgy. Talaba 2, Bacoor City, Cavite.

Kinilala ang mga suspek na sina Aladin alyas “Kokey” Mamaralo y Emtruso, 38-anyos; Mae Escito y Bacarin, 26-anyos; at Richard Reyes y Orya, 26-anyos; Rene Angue y Taopo, 39-anyos; Jhonnete, Ma­nganti y Apines, 24-anyos; Bernadine Martinez y Ramirez, 29-anyos; at Lorna Jakuya y Rosales, 42-anyos.

Hinuli ang mga suspek matapos ikasa ang magkasunod na Buy-Bust Operation ng mga ope­ratiba ng Drug Enforcement Unit at PDEA 4A sa nabanggit na lugar kung saan, nakumpiska ang nasa P194-K na halaga ng shabu.

Nasamsam din sa mga suspek ang 18 gramo ng shabu, mark money na ginamit sa anti-drug operation at coin purse na pinaglagyan ng shabu.

Isinailalim na sa drug test ang mga suspek habang pina-chemical analysis naman ang shabu na gagamiting ebidensya sa pagsasampa ng kasong paglabag sa RA 9165 laban sa mga responsable.  —sa panulat ni Angelica Doctolero

Arestado ng mga otoridad ang tatlong indibidwal kabilang na ang isang babae sa ikinasang drug buybust operation sa Rosario Village, Barangay Sta. Lucia, Pasig City.

Kinilala ang mga suspek na sina, Christopher De Guzman Y Tura, 45-anyos; Evangeline Lozada Y Rodriguez, 48-anyos at Melchor Cañeda, 29-anyos.

Ayon sa mga otoridad, naaresto ang mga suspek sa pinagsanib pwersa ng mga tauhan ng DDEU, DID, DSOU, EPDHPT, 7th MFC-RMFB NCRPO at DECU-EPD na pinangunahan ni PMAJ. Darwin Guerrero.

Nakuha sa mga suspek ang 11 heat sealed transparent plastic sachet na naglalaman ng white crytalline o pinaghihinalaang shabu na may timbang na 57.6 grams at nagkakahalaga ng halos 390,000 piso.

Nasamsam din sa kanila ang isang black pouch, isang 500 peso bill na ginamit sa buybust operation at anim na pirasong tig P1,000 bilang boodle money.

Iniimbestigahan na ngayon ang mga inarestong suspek kung gumagamit din ang mga ito ng iligal na droga habang inaasikaso narin ang kasong isasampa laban sa tatlong suspek.

Arestado ng mga tauhan ng Philippine Coast Guard (PCG) ang 18 mangingisda dahil sa kanilang iligal na paghuhuli sa Naic, Cavite.

Ayon sa PCG, naaktuhang nagsasagawa ng illegal fishing ang mga mangingisda sa karagatang sakop ng maritine security patrol kung saan,  gumagamit ang mga suspek ng air compressor sa nasabing bisinidad.

Ayon sa PCG, labag sa batas ang ginagawang iligal na paghuhuli ng mga suspek dahil bukod sa delikado ito ay hindi din nito natatantya ang paghuhuli sa mga isda.

Nakakulong na ngayon at nahaharap sa paglabag sa Municipal Ordinance No. 12 ang mga naarestong suspek.