RONDA PROBINSYA

Nahuli sa akto ng otoridad ang siyam na indibidwal na nag-aabutan ng iligal na droga sa Quiapo, Maynila.

Ayon kay Police Lieutant Colonel John Guiagui ng Sta.Cruz Police Station, nakumpiska sa grupo ang siyam na plastic ng hinihinalang shabu na nagkakahalaga ng higit 800,000 piso.

Kaugnay nito, nahuli rin ang umano’y supplier ng nasabing iligal na droga na si alyas Luz at kasamahan niyang si alyas Bilen.

Dismayado naman ang hepe ng nasabing police station nang malamang isa sa mga naaresto ay barangay tanod sa Sampaloc na kinilalang si Bobby Swing.

Samantala, nahaharap sa kasong paglabag sa RA 9165 o Comprehensive Dangerous Drug Act of 2002 ang mga suspek. —sa panulat ni Airiam Sancho

Arestado ang isang family driver sa Cavite matapos umanong tangayin ang sasakyan at pera ng kaniyang amo na aabot sa isang milyong piso.

Ayon kay Cavite CIDG Police Major Adrian Cayabyab, kinilala ang suspek na si Roy Pader, 41 anyos at pitong buwan na nanilbihan bilang drayber sa kaniyang amo.

Natunton ng otoridad ang suspek matapos nitong magpost sa social media kung saan makikita na umiinom ito sa isang night club kasama ang ilang babae.

Naaresto si pader sa isang motel at narekober mula rito ang isang baril at tinangay na sasakyan.

Samantala, tumangging magbigay ng pahayag ang kampo ng biktima. —sa panulat ni Airiam Sancho

Pinaghahandaan na ng lokal na pamahalaan ng Cebu ang pagsasagawa ng traditional Sinulog celebration sa Enero 2022 kung saan plano nito nawalang magaganap na partisipasyon ng ibang mga probinsya.

Ayon kay Cebu Mayor Michael Rama, plano niya na gawing “Sinulog in the Household” ang nasabing tradisyon at religious celebration para kay Santo Niño na angpapayagan lamang makilahokay ang mga bakunadong indibidwal.

Aniya, ang nasabing pag-iingat ay dahil sa banta ng Omicron variant.

Samantala, tiniyak niya na ang naturang akitibidad ay hindi magiging “Super Spreader Event” sa COVID-19.  —sa panulat ni Airiam Sancho

Isang ina ang patay habang sugatan ang asawa nito matapos umanong martilyuhin ng kanilang 16  anyos na anak na lakaki sa bayan ng Anini-Y, Antique.

Ayon sa Anini-Y Municipal Police, nagtungo sa kanilang tanggapan ang lolo ng suspek upang i-report ang krimen na ginawa umano ng grade 11 student.

Batay sa imbestigasyon, nakatalikod umano ang ina ay bigla itong minartilyo sa ulo ng binatilyo sa loob ng kanilang bahay at pag-uwi naman ng ama galing sa trabaho ay sinalubong din ito ng martilyo ng suspek at tinamaan pero nakatakbo.

Agad isinugod sa ospital ang mga biktima pero idineklarang dead on arrival ang ginang matapos mapuruhan sa ulo.

Bagaman saglit na nakatakas ang binatilyo dala ang 14,000 pesos na cash na ninakaw sa kanyang mga magulang, nahuli rin ito matapos maharang sa isang border control checkpoint at kasalukuyang nasa kustodiya na ng DSWD.

Nagalit umano ang suspek dahil hindi siya pinapalabas sa kanilang bahay ng kaniyang ina para sumagot ng kaniyang module sa paaralan.

Patay sa pamamaril ang mag-ina sa lalawigan ng Maguindanao.

Kinilala ang mga biktima na sina Zahariya Bansuan , 48 anyos, at kanyang anak na si Zainudin Bansuan, 16 anyos.

Batay sa ulat, sakay ng motorsiklo ang mag-ina nang dikitan ang mga ito ng riding in tandem na mga suspek at pagbabarilin.

Agad namang tumakas ang mga suspek patungo sa Barangay Tulunan Datu Anggal Midtimbang.

Kapwa nagtamo ng tama ng bala sa ulo at likod ang mag-ina na ikinasawi ng mga ito.

Personal na alitan ang tinitingnang motibo ng mga otoridad sa pagpatay sa mga biktima.

Bumagsak sa 10.8 degrees celsius ang temperatura sa La Trinidad, Benguet nitong Martes.

Ito na ang pinakamababang temperatura na naitala sa bansa simula nang ideklara ang panahon ng amihan.

Ayon sa PAGASA, patuloy na mararamdaman ang malamig na temperatura sa bansa dulot ng Northeast Monsoon o Amihan season.

Samantala, naitala rin kahapon ang lowest air temperatures sa Baguio City, Benguet na 13.8 degrees celsius, 18.1 degrees  sa San Jose, Occidental Mindoro at 19.0 degrees celsius sa Basco, Batanes.

Arestado ang tatlong indibidwal matapos maaktuhang nagsusugal sa Brgy. Nalook, Kalibo.

Ayon sa Kalibo PNP, isang concerned citizen ang nagsumbong ukol sa iligal na aktibidad ng tatlong indibidwal na kinilalang sina, Jose Teddy Tomasar, 57 years old; Helen Dela Cruz, 61 years old, at Melyn Cervantes, 59 years old.

Narekober mula sa mga suspek ang isang set ng mga baraha, isang mesa, dalawang upuan at 242 pesos na bet money.

Nahaharap ngayon sa patung-patong na kaso ang mga naarestong suspek.—sa panulat ni Angelica Doctolero

Hindi na papayagan pang pumasok sa mga establisyemento ang mga hindi pa fully vaccinated individuals sa Cebu City simula sa January 1.

Ayon kay Cebu City Mayor Michael Rama, layon ng kaniyang bagong direktiba na mahikayat pa ang mga residente na magpabakuna kontra COVID-19 bago matapos ang taon.

Batay pa sa kautusan, hindi rin papayagan na makapasok sa mga establisyemento ang mga batang may edad 12 hanggang 17 na hindi pa bakunado kahit pa may kasama silang fully vaccinated adults.

Sa kasalukuyan nasa alert level 2 ang Cebu City at mayroong mahigit 400,000 fully vaccinated individuals at mahigit 600,000 naman ang nakatanggap ng first dose. —sa panulat ni Hya Ludivico

10 bahay ang natupok sa sunog na sumiklab sa isang residential area sa San Juan City.

Pahirapan ang naging pagresponde ng mga bumbero kung saan ilan sa kanila ay nabagsakan pa ng lumiliyab na debris.

Tumagal ng mahigit isang oras ang sunog.

Aabot sa 15 pamilya ang apektado ng sunog at wala namang naiulat na nasugatan sa insidente. —sa panulat ni Hya Ludivico

Nasakote ng mga otoridad ang isang lalaking nagpanggap na pulis sa Imus, Cavite.

Ayon kay PLTCol Noel Calaptia, OIC ng Imus City Police Station, nahuli si Leo Mendoza, 41 anyos, matapos magsumbong ang isang concerned citizen na may lalaking nagpaputok ng baril ng tatlong beses sa kanilang lugar.

Nagpakilala umano ang suspek na isa siyang pulis na may ranggong SPO2 ngunit sa imbestigasyon ng pulisya ay wala ang pangalan nito sa personnel accounting information system ng PNP.

Nakumpiska mula kay Mendoza ang ilang set ng police uniform, kalibre 45 na baril at mga ID kung saan nakasuot rin ito ng uniporme ng pulis.

Nahaharap ang suspek sa maraming kaso kabilang na ang paglabag sa Comprehensive Firearms and Ammunition Act, Illegal Use of Insignias at Usurpation of Authority. —sa panulat ni Hya Ludivico