Aabot sa 7.6 na milyong pisong tanim na marijuana ang sinunog ng mga otoridad sa Maguing, Lanao Del Sur.
Sinabi ni Lieutenant Colonel Romulus Rabara, Commanding Officer ng 5th Infantry Batallion na mga miyembro ng New People’s Army at isang lumala ang nangangalaga at nagpapalago sa hekta-hektaryang tanim na marijuana.
Ayon sa opisyal, naging malaking tulong ang mga informant ng Maranao sa pagtunton ng nasabing taniman. —sa panulat ni Joana Luna
Patay ang 83 anyos na lolo matapos mahagip ng isang motorsiklo sa barangay Ambalatungan, Cauayan City, Isabela.
Ayon sa imbestigasyon, minamaneho ng suspek na si Frederick Tababa, 28 anyos ang nasabing motor patungong barangay Buenavista nang mahagip nito ang biktmang si Tiburcio Bartolome.
Dinala sa pagamutan ang biktima ngunit binawian ito ng buhay matapos magtamo ng malalang tama sa bahagi ng kaniyang tadyang.
Desidido namang magsampa ng kaso ang pamilya ng nasabing biktima. —sa panulat ni Airiam Sancho
Sinuspindi ng lokal na pamahalaan ng Tacloban ang kanilang COVID-19 Vaccination Drive, gayundin ang mga klase at iskedyul ng trabaho bunsod ng malakas na pag-ulan.
Ayon kay Mayor Alfred Romualdez, patuloy ang pagbuhos ng malakas na ulan na umabot ng 12 oras kaya pansamantala niyang sinuspindi ang mga nasabing aktibidad.
Sinabi rin ni Romualdez na pinoprotektahan niya ang kaniyangmga residente, lalo na ang mga bata mula sa pneumonia na karaniwang sakit sa lungsod tuwing Disyembre dahil sa malamig na panahon. —sa panulat ni Airiam Sancho
Posibleng dumami pagsapit ng kapaskuhan hanggang sa susunod na taon ang mga turista sa Isla ng Boracay.
Ito ang inihayag ng Malay Tourism Officer Felix Delos Santos, matapos bumuhos ang mga domestic tourists mula sa Metro Manila at Western Visayas.
Umabot kasi sa 15,601 o may average na 2,500 hanggang 3,600 na turista ang naitala simula noong December 1 hanggang a-5.
Matatandaang nito lamang buwan ng Nobyembre ay pumalo sa 67,000 ang tourist arrival sa naturang Isla kahit pa nasa gitna parin ng pandemya ang bansa.
Sa ngayon, patuloy na tinututukan ng ibat ibang ahensya ng gobyerno ang pangangalaga sa paligid ng Boracay upang maingatan at mapanatili ang kalinisan at ganda nito. —sa panulat ni Angelica Doctolero
Arestado ng mga otoridad ang isang suspek na kinilalang si Prince Psalmuel Palero, alias Sam Palero, 29-anyos sa buy-bust operation sa Barangay Talisay, Tiaong, Quezon Province.
Ayon sa Quezon Police Provincial Office, nahuli si Palero matapos maaktuhang nagbebenta ng isang pakete ng hinihinalang shabu sa halagang P2, 040 sa isang pulis na nagpanggap na poseur buyer.
Narekober sa suspek ang tatlong pakete pa ng shabu na may bigat na aabot sa 3.44 grams at nagkakahalaga ng mahigit kumulang P70K.
Nasa kustodiya na ng mga otoridad ang suspek at nahaharap sa kasong Ra 9165 o Comprehensive Dangerous Drugs Act of 2002. —sa panulat ni Angelica Doctolero
Nahaharap ngayon sa kasong paglabag sa RA 10863 o paglabag sa Customs Modernization and Tariff Act ang isang negosyante na nahuli sa aktong nagbebenta ng peke at smuggled na sigarilyo sa Bayan ng Tboli, South Cotabato.
Kinilala ang suspek na si Saipoden Gulac Comayog na nakuhanan ng aabot sa 250 na reams ng mga assorted brands ng smuggled na sigarilyo.
Ayon kay Police Major Hezron Parangan, Hepe ng T’boli PNP, nakatanggap sila report kaugnay na iligal na bentahan ng mga peke at smuggled na sigarilyo sa nabanggit na lugar.
Dito na sila nagsagawa ng operasyon at doon naaktuhan ang suspek na ngayon ay nasa kustodiya na ng T’boli PNP Police Station. —sa panulat ni Angelica Doctolero
Pinaslang nitong Miyerkules ng gabi ang pampanga based newsman na si Jesus “Jess” Malabanan.
Sa isinumiteng report sa Calbayog Police Station, sinabi ng Presidential Task Force on Media Security na dakong alas-6:30 kahapon ng gabi nang pagbabarilin ng motorcycle-riding gunmen si Malabanan.
Isinugod pa sa ospital ang biktima ngunit idineklara dead on aarival.
Mariing kinondena naman ng Pampanga Press Club ang panibagong insidenteng ito ng pagpaslang sa isa na namang miyembro ng mass media.
Hiling naman ng Grupong Unified-Batman-Bataan Tri-Media Association sa Philippine National Police (PNP) ang mas malalim na imbestigasyon upang matumbok ang tunay na motibo at utak sa pagpaslang kay malabanan.
Si Malabanan ay ang correspondent ng Manila Standard Today at Stringer ng Reuters sa Pampanga. —sa ulat ni Jaymark Dagala (Patrol 9)
Nasawi ang isang tricycle driver, at isang buntis maging ang sanggol nito matapos na mabangga ng isang pick-up truck sa bayan ng Dueñas, Iloilo.
Batay sa imbestigasyon ng Dueñas PNP, nag-overtake ang pick-up sa kaharap na malaking truck ngunit bigla itong nawalan ng kontrol.
Tumilapon ang mga sakay ng traysikel at napinsala ang malaking bahagi ng isang vulcanizing shop.
Agad namang dinala sa ospital ang tricycle driver na nagtamo ng malubhang sugat sa ulo, ngunit idineklara itong dead on arrival.
Hindi na rin naisalba ang buhay ng ginang at maging ang sanggol na nasa sinapupunan nito.
Nakatakdang sampahanan ng kasong Reckless Imprudence Resulting in Multiple Homicide, Multiple Serious Physical Injuries and Damage to Property ang driver ng pick-up truck.
Nasunog ang 100 residential area sa San Andres Bukid kung saan isa ang nasugatan.
Nangyari ang insidente mag aala sais ng gabi kahapon sa 1164 Onyx Street, Brgy 775 Zone 84, San Andres Bukid Manila.
Ayon sa ulat ng Bureau of Fire Protection (BFP), nasa 50 hanggang 100 pamilya ang naapektuhan at nawalan ng bahay matapos matupok ng apoy.
Samantala, patuloy namang inaalam pa ng BFP ang pinagmulan ng sunog at kabuuang pinsala nangyaring sunog.
Aabot sa 8.5 million pesos na halaga ng umano’y ecstasy ang nasabat ng mga awtoridad sa Manila Doctor Village, Almanza Uno, Las Piñas City.
Naaresto rin ang suspek na si Ana Fe Morilla, alyas Jonah Ileve, residente ng Guava St. sa nasabing lungsod.
Sa pangunguna ng mga ahente ng PDEA o at iba pang police units. Nadakip si Morilla at nakuha rito ang halos 5,000 tableta ng ecstasy.
Nabatid na binantayan ng mga awtoridad ang kahina-hinalang package na nakaimbak sa isang courier service at si Morilla ang nag-claim dito matapos magsumite ng pekeng ID.
Agad na pinosasan si Morilla at ngayo’y nahaharap sa kaukulang kaso. —sa ulat ni Gilbert Perdez (Patrol 13), sa panulat ni Airiam Sancho