RONDA PROBINSYA

Tatanggap ng 25 kilong bigas ang mga residente sa siyudad ng Vigan para sa mga fully vaccinated na indibidwal.

Ayon kay Mayor Juan Carlo Medina, ang nabanggit na hakbang ay para mas mahikayat ang  mga hindi pa nagpapabakuna kontra COVID-19.

Dagdag pa ni Medina, kinakailangan na nabakunahan mismo sa lalawigan, nakakumpleto ng bakuna at naninirahan sa Vigan City.

Samantala, target ng lugar na matapos ang pamamahagi ng benepisyo sa lahat ng mga fully vaccinated ngayong Disyembre kung saan patuloy pa din ang kanilang distribusyon. —sa panulat ni Kim Gomez

Inaresto ang dalawang Indian ng isang off-duty na pulis matapos nilang tangkaing looban ang kanilang kapwa mamamayan sa isang junk shop sa Lamesa Ugong, Valenzuela City.

Ayon sa ulat ng pulisya, kinilala ang mga suspek na sina Manjot Singh Buttar at Jagdeep Singh, kapwa Indian national.

Sinabi ni police corporal naka-off duty na si Christian Llagas Fernandez ng District Mobile Force Battalion ng Quezon City Police District (DMFB QCPD) nang mapansin niyang ninakawan ng mga suspek ang isang kapwa Indian.

Narekober ng mga pulis sa mga suspek ang isang punong baril, identification card, 13 piraso ng P100 bill, 12 piraso ng P50 bill, limang P20 bill, isang cellphone, wallet, at isang kulay asul na Honda Click na motorsiklo.

Sa isang pahayag, pinuri ni National Capital Region Police Office (NCRPO) Director Major Gen. Vicente D. Danao Jr. Si Fernandez sa mabilis nitong pagresponde sa krimen. —sa panulat ni Kim Gomez

Nasawi ang 22 anyos na lalaki matapos pagbabarilin sa loob ng isang computer shop sa lungsod ng Caloocan.

Batay sa report ng pulisya, agad na pinagbabaril ng dalawang hindi pa nakikilalang suspek na pumasok sa nasabing shop ang biktimang si Chrisanto Arisme.

Samantala, hinahanap na ng pulisya ang mga suspek habang inaalam ang posibleng motibo sa naturang krimen. —sa panulat ni Airiam Sancho

Binawian ng buhay ang barangay volunteer na isa ring pedicab driver matapos barilin ng isang lalaki sa Malate, Maynila.

Kinilala ang biktima na si Danila Florida.

Ayon sa imbestigasyon, pinagsabihan ni Florida ang isang tindero na umihi sa kaniyang pedicab.

Matapos ay umalis ang tindero, pero binalikan nito kasama ang kaniyang pinsan na bumaril sa biktima sa loob ng pedicab.

Kasong murder ang haharapin ng suspek at pagtatago ng nakamamatay na sandata naman ang kasong isasampa sa nakaalitan ng biktima. —sa panulat ni Airiam Sancho

Nasawi ang isang taong gulang na babae sa Cadiz City, Negros Occidental, matapos na tamaan ng ligaw ng bala.

Ayon sa pulisya, naglalaro ang bata sa loob ng kanilang tahanan kasama ang mga kamag-anak noong December 5 ng hapon nang bigla na lang silang makarinig ng dalawang putok ng baril at nakita na lamang ang biktima na nakahiga sa sahig at may dugo sa ulo.

Dinala ang bata sa ospital pero binawian din ng buhay noong Disyembre 6.

Sumuko naman sa mga otoridad ang suspek na si Nomar Ayan Bero, 46-anyos, at nakuha rin sa kanya ang isang kalibre .38 na baril.

Nangako naman ang PNP na tutukan ang imbestigasyon at titiyakin na bibigyan ng hustisya ang pagkamatay ng bata.

Narekober ng mga otoridad ang ibat-ibang uri ng pampasabog na iniwan umano sa isang sakahan sa Sitio KM. 17, Barangay Rangayen, Alamada, Cotabato.

Sa pahayag ni 34th Infantry Battalion (IB) Commander Lieutenant Colonel Edgardo Vilchez Jr., isang report ang kanilang natanggap matapos mapansin ng isang magsasaka ang tatlong B-40 rockets na nakatago sa ilalim ng mga pira-pirasong tuyong mga kahoy sa nasabing lugar.

Mabilis na rumesponde ang eod team ng 34th IB at matagumpay na iniligpit ang tatlong unexploded ordinance na pinaniniwalaang pagmamay-ari ng isang Moro Guerilla Group. —sa panulat ni Angelica Doctolero

Nareskyu ang 10 kababaihan matapos magsagawa ng operasyon ang mga otoridad sa isang bar na nagsisilbing drug den sa Baguio City.

Ayon sa Regional Special Operations Group ng Police Regional Office Cordillera, nakatanggap sila ng reklamo ukol sa prostitusyon o pagbubugaw na nangyayari sa nasabing bar.

Agad na isinailalim sa surveillance ang naturang lugar at nang makumpirma, ay dito na sumalakay ang mga otoridad.

Napag-alaman na nagtatrabaho ang mga biktima na nasa edad 26 hanggang 40 bilang waitress, entertainer, dancer at cook.

Dahil dito, nahuli sa operasyon ang bar manager na si Louie Macatuno Jamora, 33-anyos at isa pang empleyado na si Roldan De La Cruz Mangila, 38-anyos na nahaharap ngayon sa kasong paglabag sa Republic Act 9208 o ng Anti-Trafficking in Persons Act of 2012. —sa panulat ni Angelica Doctolero

Arestado ng mga otoridad ang isang drug pusher sa ikinasang drug buy bust operation ng mga otoridad sa Barangay Tangos, Navotas City.

Kinilala ang suspek na si Jervy Makabantay alyas “Eneng”, 35-anyos na nakuhanan ng tinatayang nasa 6 gramo ng shabu na may street value na P40,800 kasama ng buy bust money.

Nahaharap ang suspek sa kasong paglabag sa RA 9165 o Comprehensive Dangerous Drug Act of 2002. —sa panulat ni Angelica Doctolero

Nawalan ng tirahan ang siyam na pamilya matapos maabo ang kanilang bahay makaraang masunog dahil sa naiwanang sinaing ng nagngangalang Sito sa Barangay Gatid, Sta Cruz, Laguna.

Ayon sa mga otoridad, mabilis na kumalat ang sunog dahil gawa sa mga light materials ang mga naabong bahay.

Wala namang naitalang nasawi o nasugatan pero aabot sa isang milyon ang danyos sa naganap na sunog. —sa panulat ni Angelica Doctolero

Planong limitahan ng pamahalaang lalawigan ng Quezon ang kapasidad o bilang ng mga indibidwal na maaaring makapasok sa mga mall.

Ayon kay Governor Danilo Suarez, ngayong nalalapit na ang kapaskuhan ay parami na ng parami ang mga indibidwal na nagpupunta sa mall upang makapamasyal kahit pa may panibagong virus na Omicron variant.

Sinabi ni Suarez na malaki ang posibilidad na muling tumaas ang kaso ng COVID-19 sa bansa dahil sa mga pagtitipon lalo na kung hindi mag-iingat ang publiko ngayong kapaskuhan.

Dahil dito, gagawa ang lokal na pamahalaan ng panuntunan para pigilan ang pagdami ng tao sa mall sa partikular na oras at mahigpit na ipatutupad ang physical distancing. —sa panulat ni Angelica Doctolero