RONDA PROBINSYA

Dinampot ng mga awtoridad ang tatlong construction workers dahil sa umano’y pagkakasangkot sa kasong pagnanakaw sa Brgy. Calzada-Tipas, Taguig City.

Kinilala ang mga suspek na sina Mark Anthony Bustamante, Josef Sutana at Roland Badjao, pawang nakatira sa Brgy. Mayamot, Antipolo City.

Sa imbestigasyon, nakita sa CCTV ng R. Abalos Construction Inc. ang mga suspek habang ninanakaw ang halos pitong daang piraso ng angle valves na nagkakahalaga ng halos 980,000 pesos.

Ang tatlo ay pawang mga empleyado rin ng nasabing kompanya.

Nahaharap sa kasong qualified theft ang mga naturang suspek.

Arestado ang pitong indibidwal sa ikinasang operasyon ng mga awtoridad sa Merville Access Road, Brgy. 201, Pasay City.

Kinilala ang mga suspek na sina Edward Daraman, Samuel Asa, Raymond Ostomal, Benjie Maramag, Rolando Reyes, Carl Reniel Manatad, at Edwin Eugenio.

Ayon sa pulisya, nakatanggap sila ng sumbong ukol sa illegal gambling activity sa lugar at nang puntahan nila ito ay doon na nila nahuli ang pitong suspek habang nagsusugal.

Narekober sa operasyon ang higit 2,000 pisong bet money at mga cellphone.

Nakatakda namang sampahan ng kaukulang kaso ang mga nasabing suspek.

Naaresto ng mga awtoridad ang Top 18 Most Wanted Person ng Las Piñas City sa ikinasang operasyon sa C-5 Road Extension sa lungsod.

Kinilala ang akusado na si Allan Arcega, apat na pu’t isang taong gulang, at nakatira sa Pulang Lupa Uno sa nasabing siyudad.

Si Arcega ay matagal nang wanted sa batas dahil sa mga kasong may kaugnayan sa iligal na droga at kasong pagnanakaw na parehong nakabinbin sa Las Piñas Regional Trial Court (RTC).

Aabot naman sa 60,000 piso ang itinakdang piyansa ng korte para sa pansamantalang paglaya ng akusado.

Nasawi ang isang magkaibigan matapos masaksak sa isang madugong rambol sa bayan ng Manticao, Misamis Oriental.

Kinilala ang mga biktima na sina Eljan Baculong at Andrew Tacbobo, pawang nakatira sa naturang bayan.

Agad namang nahuli ang dalawang suspek, kabilang ang labimpitong taong gulang na suspek na si alyas “Ronnie.”

Ayon sa hepe ng Manticao Police na si Maj. Renz Marion Serrano, pauwi na sina Baculong at Tacbobo mula sa isang event nang madaanan nila ang pag-aaway ng dalawang grupo ng kabataan hanggang sa masaksak ang mga biktima.

Nahaharap sa kasong homicide ang mga nahuling suspek.

Isang lalaki patay nang masabugan ng granada sa lalawigan ng Cotabato.

Kinilala ang biktima na si Jun Briones Delos Reyes na residente ng Barangay Old Bulatukan, Makilala, Cotabato.

Ayon kay Makilala Chief of Police Major Orphie Julian, umuwing lasing si Delos Reyes at nagtalo pa sila ng kanyang live in partner. Matapos ang ilang minuto ay nakarinig ng pagsabog ang kanilang mga kapit bahay.

Dagdag ni Julian, ang biktima ay nagtamo ng maraming sugat sa kanyang katawan at nakaligtas ang live-in partner nito.

Sa ngayon ay nagpapatuloy pa ang malalimang imbestigasyon ng makilala PNP sa nangyaring pagsabog. —sa panulat ni Kim Gomez

Nahuli ang dalawang “Most Wanted Persons” matapos ang ikinasang magkahiwalay na manhunt operation ng Zambales Police.

Kinilala ang mga suspek na sina John Dumapit, 50 anyos at Christian Meva, 44 anyos na mga pawang residente ng naturang lalawigan.

Ayon sa report ng pulisya, nagkasa ng manhunt operation ang Iba Municipal Police Station laban kay Dumapit makaraang mag-isyu ng warrant of arrest si Judge Marifi Chua ng Regional Trial Court Branch 70 ng Iba, Zambales noong Enero 18, 2017.

Ang mga naaresto ay kasalukuyang nakakulong na sa himpilan ng pulisya sa Iba at Sta. Cruz. —sa panulat ni Kim Gomez

Pinuri ng Department of Health (DOH) ang lokal na pamahalaan ng Marikina matapos maabot ang target population na 100% sa pagbabakuna kontra COVID-19.

Binigyang puri rin si Marikina Mayor Marcy Teodoro sa pagpayag sa mga residente mula sa mga kalapit na lungsod at lalawigan na ma-inoculate sa Marikina City ng isagawa ang Bayanihan, Bakunahan program nuong November 29 hanggang December 1.

Natanggap ni Teodoro ang certificates of recognition at appreciation sa awarding ceremony na dinaluhan ng mga opisyal ng DOH-NCR at Marikina Inter-Agency Task Force Against COVID-19.

Samantala, nakamit din ng Marikina City ang herd immunity nito noong unang linggo ng Disyembre matapos mabakunahan ang nasa mahigit 4,000 indibidwal. —sa panulat ni Kim Gomez

Huli sa pot session ang ilang drug addicts sa Parañaque City at Muntinlupa City.

Kinilala sina Angelo Mactal alyas ‘Kalbo’, at Carlito Velasco alyas ‘Tolits’, makaraang maaktuhang gumagamit ng shabu sa loob ng kanilang pamamahay sa Father St., Brgy.  Baclaran.

Sa magkaparehong pangyayari, sa Muntinlupa City, nagsagawa ang mga pulis ng Station Drug Enforcement Unit nang mahuli ang tatlong 3 drug suspects na aktong nagpa-pot session sa Brgy. Alabang, Muntinlupa City.

Ayon sa pulisya, kinilala ang mga suspek na sina Cleto Gorgonia, Cecill Solomon at Babylyn Solomon Y Ibañez.

Nakuha sa mga suspek ang plastic sachet ng shabu, aluminum foil strip, isang improvised plastic straw tooter, at ilang disposable lighter na may improvised aluminum foil burner.

Nakatakdang sampahan ang mga suspek sa kasong paglabag sa  RA 9165 o Comprehensive Dangerous Drugs Act of 2002 na ngayon ay nakaditine sa custodial facility ng Parañaque at Muntinlupa City Police. —sa panulat ni Kim Gomez

Arestado ng pulisya ang tatlong menor de edad at isang construction worker na umano’y tumangay ng motorsiklo at iba pang personal na gamit sa Pateros.

Ayon kay Pateros Police Chief Colonel Aldrine Gran, kinilala ang mga suspek na sina Harold Castro, 18 anyos at tatlong menor de edad na may edad 15 hanggang 17.

Kakasuhan ang mga suspek ng paglabag sa Republic Act 10883 o ang new Anti-Carnapping Act of 2016 at Robbery sa Rizal Prosecutor’s Office.

Nakakulong ngayon si Castro sa Pateros Police Custodial Facility habang dinala ang mga menor de edad sa Department of Social Welfare and Development (DSWD). —sa panulat ni Kim Gomez

Tatanggap ng 25 kilong bigas ang mga residente sa siyudad ng Vigan para sa mga fully vaccinated na indibidwal.

Ayon kay Mayor Juan Carlo Medina, ang nabanggit na hakbang ay para mas mahikayat ang  mga hindi pa nagpapabakuna kontra COVID-19.

Dagdag pa ni Medina, kinakailangan na nabakunahan mismo sa lalawigan, nakakumpleto ng bakuna at naninirahan sa Vigan City.

Samantala, target ng lugar na matapos ang pamamahagi ng benepisyo sa lahat ng mga fully vaccinated ngayong Disyembre kung saan patuloy pa din ang kanilang distribusyon. —sa panulat ni Kim Gomez