RONDA PROBINSYA

Bagsak sa kulungan ang dalawang lalaki matapos mahulihan ng mahigit 40,000 pisong halaga ng hinihinalang shabu sa Bagong Silang St., Brgy Hagonoy, Taguig City.

Kinilala ang mga suspek na sina Fortunato Igdao at Peter James Pesigan na kapwa nadakip sa ikinasang buy-bust operation ng Station Drug Enforcement Unit (SDEU) ng Taguig PNP.

Nasabat sa operasyon ang 40,800 pesos na halaga ng umano’y shabu, isang purse, at dalawang daang pisong buy-bust money.

Kasong paglabag sa dangerous drugs act ang isasampa laban sa mga suspek.

Nagwakas ang maliligayang araw ng dalawang kilabot umanong tulak ng droga matapos masakote sa buy-bust operation ng mga awtoridad sa Bagong Paraiso, Brgy. Bayanan, Muntinlupa City.

Kinilala ang mga suspek na sina Jose Quipia the second at Jessie Orcine, parehong nakatira sa nasabing lugar.

Dalawang sachets ng umano’y shabu na nagkakahalaga ng halos pitong libong piso ang nakumpiska mula kina Quipia at Orcine, maliban sa dalawang daang pisong buy-bust money.

Inihahanda na ang kaukulang kasong isasampa laban sa mga suspek.

Kalaboso ang dalawang lalaki matapos mahulihan ng droga sa isinagawang anti-illegal drug operation ng mga awtoridad sa Bambang Nipeles, Brgy Calzada Tipas, Taguig City.

Sinubukan pang tumakas sa Oplan Sita nina Mark lowie Cuevas at Mark Lester Cuevas pero nahuli rin sila ng mga pulis.

Nakumpiska mula sa mga ito ang dalawang sachets ng hinihinalang shabu na nagkakahalaga ng halos pitong libong piso.

Inihahanda na ang mga kaukulang kasong isasampa laban sa mga suspek.

Tinatayang mahigit 50,000 pisong halaga  ng ipinagbabawal na droga ang nasabat ng mga awtoridad sa magkakahiwalay na illegal drug operations ng mga tauhan ng Southern Police District (SPD).

Sa J.B. Roxas Street, Barangay Olympia, Makati City, huli sina Mark Anthony Mamaid at Roy Benzon Mamaid kung saan nakuha mula sa mga ito ang 500 pisong buy-bust money at mahigit 9,000 pisong halaga ng shabu at marijuana.

Sa Brgy. Putatan, Muntinlupa, arestado rin ang 21 anyos na si Christopher Alcantara matapos mahulihan ng mahigit 40,000 pisong halaga ng umano’y shabu.

Sasampahan ng kaukulang kaso ang mga nasabing suspek.

Nakakulong ngayon ang isang aktibong pulis matapos umanong pagbabarilin ang tatlong estudyante sa Bagumbayan, Sultan Kudarat.

Ayon kay Police Brig. Gen. Alexander Tagum, hepe ng Police Regional Office 12, ang suspek na si Patrolman Roland Lopez, dalawampu’t siyam na taong gulang, ay nakatalaga sa 1st PMFC, South Cotabato Police Provincial Office.

Batay sa imbestigasyon, naganap ang pamamaril sa isang boarding house sa Brgy. Zone 3 sa Koronadal City kung saan nasawi ang estudyanteng si Charmaine Rose Canlas bunsod ng tatlong tama ng baril.

Kasalukuyang nilalapatan ng lunas sa South Cotabato Provincial Hospital ang dalawa pang sugatan na estudyante.

Inaalam pa ng pulisya ang motibo sa naturang pamamaril.

Sugatan ang dalawang indibidwal matapos magsalpukan ang isang SUV at police mobile sa ilalim ng Quezon Boulevard underpass sa Quiapo, Maynila.

Ayon sa Manila Police District (MPD), kasalukuyang nagpapagaling sa ospital ang mga nasugatan na kinabibilangan ng isang pulis at delivery rider na nadamay lang sa aksidente.

Sa imbestigasyon, reresponde sana ang police mobile nang mangyari ang aksidente sa palusong na bahagi ng underpass kung saan nawasak ang hood ng SUV habang tumagilid naman ang mobile dahil sa lakas nang pagkakabangga.

Patuloy ang imbestigasyon sa naturang aksidente.

Timbog ang isang printing shop owner na namemeke ng vaccination cards sa inilunsad na entrapment operation ng pulisya sa Isabela City, Basilan.

Kinilala ni Isabela City Police Chief, Lt. Col. Julpikar Sitin ang suspek na si Ahamad Jamal Astian, 37 anyos, residente ng barangay Tabuk na naaresto sa kanyang shop.

Inilunsad ang operasyon makaraang makatanggap ng reklamo mula sa Rural Health Unit ng bayan ng Maluso hinggil sa iligal na aktibidad ni Astian.

Karamihan anya sa mga kliyente ng suspek ay mula sa Lamitan City at Maluso.

Nahaharap na si Astian sa kasong Falsification of Public Documents. —sa panulat ni Drew Nacino

Pinawalang sala sa dalawang  kaso ng graft si dating caloocan city second district congresswoman Mitch Cajayon-Uy.

Sinabi ni Cajayon-Uy na unanimous at patas ang desisyon ng second division ng Sandigan Bayan na nag base lamang sa mga inilatag na ebidensya kaugnay sa pagkakasangkot niya sa umano’y maling paggamit ng 10 milyong pisong pondo mula sa PDAF nuong naka puwesto pa siyang kongresista sa Caloocan nuong 2009.

Halos maiyak ang dating kongresista dahil malinaw na vindicated aniya siya sa nasabing kaso na isang political persecution at matinding nakaapekto sa kaniyang pamilya ng halos anim na taon partikular sa kanyang dalawang anak na menor de edad.

Kamakailan lamang ay nagbitiw si Cajayon-Uy bilang Executive Director ng Council for the Welfare of Children ng DSWD at tumatakbong muli sa pagka kongresista sa second district ng Caloocan City. —sa ulat ni Jopel Pelenio (Patrol 17)

Nangako ang Commission on Human Rights (CHR) na sisikaping mabigyan ng hustisya ang krimen kaugnay sa panggagahasa at pagpatay sa isang kinse-anyos na batang babae sa Batangas.

Ayon kay CHR Spokesperson Jacqueline Ann De Guia, gagawa ng sariling imbestigasyon ang konstitusyon upang tumulong sa paghahanap ng katotohanan at hustisya para sa paglabag sa mga karapatan at dignidad ng isang bata.

Matatandaang nadiskubre ang wala nang buhay na katawan at hubo’t hubad na menor de edad sa Barangay Sta. Maria nitong Nobyembre 8 kung saan isang tanod ang hinihinalang sangkot sa krimen. —sa panulat ni Airiam Sancho

Arestado ng mga otoridad ang tatlong mangingisda nang maaktuhan ang mga itong nagsasagawa ng illegal fishing sa cresta de gallo islet sa San Fernando, Romblon.

Ayon sa Philippine Coast Guard (PCG) Sub-Station Cajidiocan, lulan ng motorbanca ang mga mangingisda na gumamit ng air compressor bilang kanilang breathing apparatus sa fishing operation.

Nakumpiska rin sa mga ito ang isang unit ng cylinder tank, six spear guns, tatlong pares ng flippers, hose at tatlumpung kilo ng iba’t-ibang isda na naiturn-over na sa Office of the Municipal Agriculture (OMA).

Ayon sa pcg, nilabag ng mga suspek ang San Fernando Municipal Ordinance no. 35-b at hininintay pa ng organisasyon ang kaukulang kasong ihahain ng OMA.—sa panulat ni Joana Luna