RONDA PROBINSYA

Tuloy pa rin ang bakunahan laban sa COVID-19 at Microchipping Activity para sa mga alagang hayop sa lungsod ng Valenzuela City.

Ito’y sa kabila ng paggunita sa ika-398 taon na pagkakatatag ng lungsod kung saan dapat na walang pasok ang mga opisina.

Kaugnay nito, sisimulang lagyan ng RFID Microchip ang mga alagang hayop tulad ng aso para sa Valenzuela City Pets Application Program (ValPets).

Samantala, pinapayuhan ng nasabing lungsod na pumunta lamang ang mga residente nito sa vaccination centers upang makapagpabakuna. —sa panulat ni Airiam Sancho

Arestado ang isang barbero matapos tangkaing saksakin ang kustomer nito na nagpagupit sa barbershop sa Barangay Gulang-Gulang, Lucena City.

Sa kuha ng CCTV, nakitang nagtatalo ang 23 anyos na barbero at lalaking kustomer na isang empleyado sa gobyerno.

Ayon sa pulisya, hindi pumayag ang barbero na ayusin ang gupit ng nagreklamong kustomer dahil hindi nasunod ang i-style na gusto nito.

Nagulat na lamang ang mga taong nakakita sa pagtatalo ng dalawa nang kunin ng barbero ang gunting at sugurin ng saksak ang kustomer na nagawang makaiwas.

Nagtamo ng sugat sa kamay ang biktima habang naaresto ang suspek at nahaharap sa kasong attempted homicide. —sa panulat ni Airiam Sancho

Sugatan ang siyam na menor de edad matapos sumabog ang pinaglalaruang granada sa Barangay Candadam, Leyte.

Ayon sa imbestigasyon, walang ideya ang isang walong taong gulang na nakapulot ng isang bomba sa videoke bar nang bigla itong sumabog habang pinaglalaruan nila ng kaniyang mga kasama.

Ayon sa Bomb Squad, ang nasabing bomba ay 40mm grenade na karaniwang nakikita sa taas na bahagi ng high powered automatic rifle o ‘grenade launcher’

Samantala, dinala ang mga biktima sa Immaculada Conception Hospital sa Baybay City. —sa panulat ni Airiam Sancho

Arestado ng mga tauhan ng Quezon City Police District (QCPD) ang pitong indibidwal dahil sa iligal na droga.

Kinilala ang mga suspek na sina, Rogelio Marquez, alyas Asiong, 38-anyos; Fernando Abuid, alyas Bok, 39-anyos; Jeffrey Dormile, 21-anyos; Ambrocio Fernandez, 57-anyos; Helen Aguirre, 49-anyos; Jericho Soriano, alyas Ken, 21-anyos,  at Moctar Abas, 31-anyos.

Ayon sa mga otoridad, aabot sa isang milyong piso ang halaga ng shabu na nakumpiska sa mga suspek na may timbang na 120 gramo kasama ng 20 gramo pa ng shabu na nagkakahalaga ng mahigit P81,000 at dalawang cellular phone.

Nahaharap sa kasong paglabag Republic Act 9165 o Comprehensive Dangerous Drugs Act of 2002 ang pitong suspek. —sa panulat ni Angelica Doctolero

Na-trap ang ilang residente sa lungsod ng Davao nang makaranas ng pagbaha bunsod ng malakas na pag-ulan sa ilang lalawigan sa Mindanao.

Ayon sa ulat, umakyat sa bubong ang mga residenteng na-trap sa hindi pa humuhupang baha kahit pa tumigil na ang pag-uulan.

Pinangangambahan namang manatili o tumaas pa ang tubig baha sa barangay Matina at makaka kasabay nang pag-apaw ng Davao River.

Samantala, patuloy naman ang isinasagawang rescue operations ng mga otoridad sa nasabing mga barangay. —sa panulat ni Joana Luna

Nasabat ng Pasay Police Drug Enforcement Unit ang 57.91 gramo ng hinihinalang shabu na aabot sa P393,000 sa lungsod ng Pasay.

Sa ikinasang buy-bust operation ng mga otoridad, nahuli ang tatlong suspek na kinilalang sina Danica Mae Caingat Y Olayao, Danilo David Y Agollo at Angillaine Khell Y Tengco. Nang pagbentahan nila ng iligal na gamot ang mga operatibang nagsasagawa ng operasyon.

Bukod dito, nakumpiska rin ng otoridad ang pinatuyong dahon ng marijuana na nagkakahalaga ng P6,000, iba pang drug paraphernalia, maging kalibre 45 baril at isang magazine.

Haharap sa kasong paglabag sa Republic Act 9165 o Comprehensive Dangerous Drugs Act of 2002 at Illegal Position of Firearms ang tatlong suspek. —sa panulat ni Joana Luna

Hawak na ng Laurel Municipal Police Office ang isa sa mga testigo sa panggagahasa at pagpatay sa isang 15 anyos na dalagita sa Laurel, Batangas.

Batay sa impormasyong ipinarating ng Laurel PNP sa Kampo Crame, lumutang si Jayvie San Vicente kasama ang kaniyang mga magulang sa himpilan ng pulisya para sumuko.

Inamin din ng binata na siya ang gumahasa at pumatay sa 15 anyos na dalagita na natagpuang hubo’t hubad at wala nang buhay sa isang talahiban sa bahagi ng Sta. Maria noong gabi ng Lunes, Nobyembre a-8 matapos magtungo sa bahay ng kaniyang kaklase para kunin ang kanilang module.

Binawi rin ni San Vicente ang naunang pahayag nito laban sa barangay tanod na si Rufo sanggalang na siyang unang itinurong suspek na ngayo’y hawak pa ng mga pulis.

Kaugnay nito, inatasan ni Philippine National Police (PNP) Chief P/Gen. Guillermo Eleazar ang mga imbestigador sa kaso na tiyaking walang butas ang kasong kanilang isasampa laban sa mga suspek upang mapanagot sila sa batas at maihatid ang katarungan sa pamilya ng biktima. —sa ulat ni Jaymark Dagala (Patrol 9), sa panulat ni Hya Ludivico

Unti-unti nang sumigla ang mga negosyo sa lungsod ng Baguio.

Ayon sa City Tourism Officer ng nasabing lugar na si Alec Mapalo, malaki ang naging pagbabago sa turismo kasunod ng pagpayag ng lungsod na magpapasok ng mga fully vaccinated na turista.

Kapansin-pansin aniya ito sa mga recreation concessionaires sa Burnham Park maging sa mga restawrant kung saan dama ang epekto ng pagdating ng mga bumibista.

Samantala, paalala ng lokal na pamahalaan na kailangan pa ring sundin ang health and safety protocols gaya ng pagpaparehistro sa visita application website para sa schedule ng pagpunta sa naturang lugar.—sa panulat ni Airiam Sancho

Unti-unti nang isinasara ang ilang quarantine facility sa Pasig City dahil sa patuloy na pagbaba ng mga kaso ng COVID-19.

Ang gym sa Rizal Hizal High School na nasa full capacity noong Agosto ay lumuwag na rin.

Mula sa dating 450 na mga pasyente, nasa 25 mga pasyente na lamang ang nananatili sa centralized quarantine facility ng lungsod.

Sa kabila ng pagbaba ng mga kaso, sinabi ni Anna Galutera, Facility Manager, na hindi isasara ang centralized facility.

Ayon sa lokal na pamahalaan, nasa 8.34% ng 102,498 total beds sa lungsod ang okupado. —sa panulat ni Hya Ludivico