RONDA PROBINSYA

Nakarating na ang abo ng npa leader na si Jorge “Ka Oris” Madlos sa kaniyang pamilya sa Impasuong, Bukidnon.

Pinasalamatan ng pamilya ni Ka Oris ang pamahalaan sa pag-turnover ng abo ni Ka Oris na ibiniyahe pa mula sa Surigao City Patungong Bukidnon.

Ayon kay Army’s 4th Infantry Division Spokesperson Maj. Francisco Garello Jr., isang misa ang isinagawa bago ang simpleng turnover ceremony kung saan nag-abot din ng tulong pinansyal ang militar sa pamilyang naiwan ni Ka Oris.

Samantala, bukod kay Ka Oris ay naibigay na rin sa pamilya ng National Operation Command Staff ng NPA na si Eighfel Dela Peña alyas Pika/Maui ang kanyang abo.—sa panulat ni Angelica Doctolero, sa ulat mula kay Jaymark Dagala (Patrol 9)

Muling nakaranas ng matinding pagbaha ang malaking bahagi ng lungsod ng Davao dahilan para maapektuhan ang daan-daang mga pamilya.

Ayon sa hepe ng City Disaster Risk Reduction Management Office (OCDRRMO) na si Alfredo Baluran, umabot sa halos sampung mga barangay ang naapektuhan mula sa pagtaas ng lebel ng tubig dahil sa walang humpay na pag-ulan.

Nabatid na nasa critical level na ang lugar dahil sa umapaw na tubig sa halos anim na sapa palabas ng Davao river.

Sa ngayon, tumigil na ang malalakas na pagbuhos ng ulan at nakakaranas na ng mainit na panahon ang lungsod pero nanatili pa ring lubog sa tubig baha ang naturang mga barangay.—sa panulat ni Angelica Doctolero

Patay ang isang negosyante matapos pagbabarilin ng kaniyang sariling kapatid sa San Francisco, Quezon.

Kinilala ang biktima na si Nemrod Manguerra, 54-anyos habang kinilala naman ang suspek na si Renerio Manguerara, 52-anyos na kapatid ng biktima.

Sa imbestigasyon ng Quezon Police Provincial Office, pumasok sa loob ng bahay ang suspek nang bigla na lamang nitong binaril ang kaniyang kapatid.

Matapos gawin ng suspek ang krimen ay agad rin itong nagbaril sa sarili dahilan ng kaniyang agarang pagkamatay.

Napag-alaman na matagal na umanong mayroong alitan ang dalawa dahil sa umano sa mana.—sa panulat ni Angelica Doctolero

Isa ang patay habang sugatan naman ang apat na indibidwal matapos maganap ang karambola sa Quezon Province.

Kinilala nasawi na si Leonor Pedro Malbida Jr., habang ang mga sugatan naman ay sina Bobby Escultura, 37-anyos; Leoncio Borre, 49-anyos; Marites Barrios, 54-anyos at Ronilo Petros, 59-anyos.

Base sa imbestigasyon ng mga tauhan ng Quezon Police Provincial Office, minamaneho ng suspek na kinilalang si Sherwin Baisa, 37-anyos ang kaniyang jeep nang mawalan ito ng kontrol.

Dito na nabangga sa nakapark na van dahilan ng pagkakasugat ng ilang mga pasahero.

Sa ngayon, iniimbestigahan pa ng mga otoridad ang nasabing insidente.—sa panulat ni Angelica Doctolero

Patay ang isang construction worker matapos tadtadin ng saksak sa bahagi ng Ragay, Camarines Sur.

Kinilala ang biktima na si Adriano Alcayde, 39-anyos na natagpuang wala nang buhay dahil sa natamong 21 saksak sa bahagi ng kaniyang katawan.

Sa imbestigasyon ng mga otoridad, posibleng pagnanakaw umano ang motibo sa krimen dahil sa pagkawala ng pera ng biktima na pinagbentahan ng copra.

Ayon sa mga otoridad, posibleng kilala ng biktima ang suspek dahil sa naiwang gamit ng biktima sa lugar kabilang na ang cellphone at motorsiklo nito.

Patuloy pang iniimbestigahan ang krimen upang matukoy ang motibo sa panananaksak.

Samantala, isang barangay tanod naman ang nasawi sa kaparehong lugar matapos mabangga ng motorsiklo.

Kinilala ang biktima na si Malver Sebello, 62-anyos na agad na dinala sa ospital pero ideklarang dead on arrival ng mga doktor.

Sa ngayon, nasa kustodiya na ng mga otoridad ang suspek na posibleng maharap sa kasong reckless imprudence resulting to homicide.—sa panulat ni Angelica Doctolero

Pinag-aaralan ng pamahalaan ng Cagayan na alisin ang mandatoryong paggamit ng face shield sa lalawigan.

Ayon kay Cagayan Governor Manuel Mamba, isasangguni nila ito sa Provincial Inter-Agency Task Force.

Kaugnay nito, pag-uusapan din ang pag-alis ng COVID-19 test requirement, sa halip ay pruweba na kumpleto na ng bakuna ang ipeprisintasa mga papasok sa lalawigan

Sa huling tala, mayroong higit pitong daang (704) aktibong kaso ng COVID-19, habang nasa apat na put pitong libo (47, 969) ang mga gumaling at mahigit dalawang libo (2,073) ang namatay sa sakit sa naturang lugar. —sa panulat ni Airiam Sancho

Nasamsam ng mga otoridad ang ibat-ibang klase ng baril at bala sa bahagi ng Sitio Salimbal, Barangay Tignapoloan, Cagayan De Oro City.

Natunton ang lugar matapos makatanggap ng report ang mga otoridad mula sa isang residente.

Kabilang sa mga nasamsam ang isang improvised shotgun, .45 caliber sidearm, .38 caliber revolver handgun, tatlong retractable rifle grenades, anim na 20-gauge live shot pellets, at anim na caliber .38 cartridges.

Inaalam na ngayon ng mga otoridad kung sino ang responsable sa mga nasamsam na iligal na mga armas. —sa panulat ni Angelica Doctolero

Inisyuhan ng ordinance violation receipts dahil sa paglabag sa City Ordinance Number 832 o Social Distancing ang limang indibidwal sa Valenzuela City.

Kinilala ang limang inaresto na sina, Alfonso Banate Jr., 53-anyos, Robert Ferrer, 40-anyos, Joaquin Cabagnot, 65 taong gulang, Roland Nazaral, 42-anyos, at Ely Roxas, 66 na taong gulang.

Ayon kay Valenzuela Police Chief Col. Ramchrisen Haveria Jr., nakatanggap ang mga operatiba ng station intelligence section ng impormasyon mula sa isang concerned citizen hinggil illegal cockfighting activity na kilala bilang “tupada” sa isang bakanteng lote sa Dumpsite, Pinalagad Brgy. Malinta sa nabanggit na lungsod.

Agad na ikinasa ang operasyon at nahuli ang mga naturang suspek habang nakatakas naman ang iba pa.

Nakuha sa mga naaresto ang isang panabong na manok na may tari at 1,100 piso na ginamit bilang bet money sa magkakaibang denominasyon. —sa panulat ni Angelica Doctolero

Bukas na muli ang mga sinehan sa Tagbilaran City simula ngayong araw.

Mababatid na isinailalim sa Alert level 2 ang lalawigan ng Bohol, kung saan pinahihintulutan ang mas maraming bilang ng mga kustomer sa mga establisyemento.

Kabilang sa mga sinehan na bukas na muli sa publiko ang Screenville Cinemas of Island City Mall at Alturas Mall.

Sa labas ng Screenville Cinemas nakapaskil ang listahan ng safety protocols bilang paalala sa moviegoers.

Nakasaad rin dito na dapat fully vaccinated na at magprisinta ng vaccination card ang mga manonood.

Sasailalim rin ang mga moviegoer sa temperature check at mahigpit na ipagbabawal ang pagkain sa loob ng sinehan. —sa panulat ni Hya Ludivico

Napinsala ang ilang mga bahay sa Pasilmanta Island sa Zamboanga City dahil sa pananalasa ng isang buhawi.

Kabilang sa mga napinsala ang limang bahay, dalawang bangka at isang madrasa na ginagamit na paaralan sa isla.

Wala namang napaulat na nasaktan sa pagdaan ng malakas na hangin.

Sa ngayon ay nananatili sa kanilang mga kamag-anak ang mga residente na nawalan ng tirahan. —sa panulat ni Hya Ludivico