RONDA PROBINSYA

Hindi na pahihintulutang dumaan sa mass transport route ng Baguio City ang mga driver na hindi pa nabakunahan laban sa COVID-19 simula ngayong araw.

Sa isang advisory, sinabi ni Baguio City Mayor Benjamin Magalong na tanging mga nabakunahang driver ng public utility jeepney, taxi, at UV express ang papayagang makapag-operate sa lungsod.

Layon aniya nito na maprotektahan ang mga pasahero laban sa COVID-19.

Batay sa direktiba, ang mga driver na hindi pa bakunado, residente man o hindi, ay dadalhin sa drive-thru vaccination site sa Baguio Athletic Bowl. —sa panulat ni Hya Ludivico

Tatanggap ng 20,000 peso bonus sa Pasko ang mga empleyado ng Cebu City Hall sa kondisyong dapat ay fully vaccinated na silang lahat kontra COVID-19.

Ito ang tiniyak ni acting mayor Michael Rama bilang paraan upang makahikayat ng mas maraming empleyado na magpabakuna.

Hindi anya ilalabas ang bonus kung hindi pa nila nakikitang bakunado na ang lahat ng empleyado.

Sa datos ng city government, nasa 297,000 individuals na ang fully vaccinated hanggang nitong Lunes.

Target ng lungsod na maturukan ng COVID-19 vaccine ang nasa 700,000 o 70% ng mahigit 900,000 na populasyon. —sa panulat ni Drew Nacino

Sinabi ni Presidential Spokesperson Secretary Harry Roque na wala umanong nakikitang mali ang malacanang sa matatanggap na christmas bonus ng mga bakunadong empleyado sa Cebu City.

Ayon kay Roque, hindi mandato sa batas ang pamamahagi ng mga employer ng christmas bonus sa kanilang mga empleyado dahil ang tanging nakasaad lamang sa batas ay ang pagbibigay ng 13th at 14th month pay para sa mga government employees.

Dagdag pa ng Kalihim na nasa kumpaniya na ang desisyon kung makakatanggap o mabibigyan umano ng christmas bonus ang kanilang mga empleyado o hindi.

Nilinaw naman ni Roque na ang pamamahagi ng christmas bonus sa Cebu City ay isang paraan upang mapataas ang bilang ng mga bakunado sa naturang lalawigan.—sa panulat ni Angelica Doctolero

Binawi ni Mayor Sara Duterte ang kanyang kandidatura sa pagka-alkalde sa lungsod ng Davao.

Unang nagpahayag ng pagbawi ng kandidatura ngayong araw ang kaniyang kapatid na si Vice Mayor Sebastian “Baste” Duterte.

Sinabi ni Sara sa kanyang official Facebook page na si Vice Mayor Baste ang sasalo sa kaniyang iiwang posisyon. Habang, si Atty. Melchor Quitain ang napili sa pagkabise-alkalde sa Davao.

Samantala, hindi pa nagbigay ng karagdagang impormasyon si inday sara patungkol sa pagtakbo nito sa pagka-presidente.—sa panulat ni Joana Luna at Airiam Sancho

Inihayag ng alkalde ng Baguio City na si Benjamin Magalong na hindi papayagang bumiyahe ang mga drayber ng pampublikong sasakyan kung hindi ito bakunado.

Aniya, ang papayagan lamang na mag-operate sa lungsod ng Baguio partikular ang mga jeep, taxi at UV express ay ang mga drayber na fully vaccinated at nakatanggap ng unang dose ng bakuna.

Layunin ng alkalde na maprotekyunan ang mga biyahero laban sa banta ng COVID-19.

Samantala, tiniyak ng otoridad na maipatutupad pa rin ng maayos ang health and safety protocols. —sa panulat ni Airiam Sancho

Tatlong lalaki ang inaresto ng mga tauhan ng Pasig City Police Station dahil sa pagtutulak ng iligal na droga.

Sa ikinasang buy-bust operation ng Eastern Police District (EPD) sa pangunguna ni Director P/Bgen. Orlando Yebra Jr., kinilala ang mga suspek na sina Rod Manuel Solano, 36-anyos; Mark Jore, 34-anyos; at Criss Bellen, 21-anyos.

Nakuha sa mga suspek ang libo-libong halaga ng shabu kabilang na ang limang transparent plastic sachet na naglalaman ng siyam na gramo ng shabu at nagkakahalaga ng mahigit 61,000 piso, isang 500 piso na ginamit bilang buy-bust money, at anim na isang libong boodle money.

Nakakulong na ngayon ang mga suspek na nahaharap sa kasong paglabag sa RA 9165 o Comprehensive Dangerous Drugs Act of 2002.  —sa panulat ni Angelica Doctolero

Patay matapos magbigti ang isang lalaking estudyante dahil umano sa selos sa kaniyang nobya sa Cordon, Isabela.

Ayon sa ina ng biktima, nagpaalam umano ang kaniyang anak dahil mayroon itong mahalagang lakad.

Nang makabalik ang biktima ay agad itong nagkulong sa loob ng kaniyang kuwarto.

Dito na nagtaka ang ina ng biktima kaya’t pinuntahan niya ang kaniyang anak sa loob ng kuwarto at natagpuan nalamang itong wala nang buhay.

Base imbestigasyon ng mga otoridad, posibleng ang nobya ng biktima ang dahilan ng pagpapakamatay nito dahil sa natagpuang nakasulat na pangalan sa pader ng silid ng biktima.

Patuloy pang iniimbestigahan ang pangyayari habang naglunsad ng hotline number ang Isabela Government para sa mga may tanong tungkol sa men­tal health, kailangan ng counseling, may kina­haharap na suliranin, o nanganganib mag-suicide.

Maaaring tumawag sa National Center for Mental Health 24/7 crisis hotlines sa cellphone na: (0917-899-8727 o 0908-639-2672) o telephone number na: (1553). —sa panulat ni Angelica Doctolero

17 katao ang arestado sa inilunsad na buy-bust operation ng PDEA sa gitna ng birthday party sa isang resort sa bayan ng Mabini, Davao De Oro.

Kabilang sa mga natimbog sa Sea Eagles Beach Resort sa barangay Pindasan ang birthday celebrant at negosyanteng si Revsan Ethelbert Elizalde, residenteng Catalunan Pequeño, Davao City.

Ito’y matapos magbenta umano si Elizalde ng party drug na ecstasy sa isang PDEA agent na nagpanggap na buyer.

Tinatayang isa punto limang milyong pisong halaga ng mga drogang kinabibilangan ng shabu at ecstasy ang nasabat mula sa mga suspek.

Napag-alaman din ng mga otoridad na imbitado si Davao City Public Information Chief Jefry Tupas sa party pero nilinaw na hindi siya kabilang sa mga inaresto bagaman kakilala niya si Elizalde.

Aminado naman si Tupas na umalis na siya sa party kasama ang boyfriend nang ilunsad ang operasyon. —sa panulat ni Drew Nacino

Umakyat na sa 106 ang kaso ng Delta Variant ng COVID-19 sa Baguio City matapos na maitala ang 30 mga bagong kaso sa unang linggo ng Nobyembre.

Sa pinakahuling Biosurveillance Report ng Philippine Genome Center, maliban sa Delta Variant, ang Alpha variant cases sa lungsod ay nasa 116 na habang ang Beta variant ay nananatili sa bilang na 52.

Dahil dito, umabot na sa 274 ang kabuuang bilang ng variants of concern sa lungsod.

Paliwanag Ni Baguio City Mayor Benjamin Magalong, ang pagtaas ng kaso ng COVID-19 variants sa siyudad ay tumagal ng isa hanggang tatlong linggo.

Kaugnay nito, pinayuhan ng alkalde ang mga mamamayan na maging maingat at sumunod sa mga ipinatutupad na public health standards.—sa panulat ni Hya Ludivico

Nananatiling nasa kritikal ang COVID-19 reproduction number sa bayan ng Pudtol, Apayao at Santa Ana, Cagayan.

Ayon sa OCTA Research Group, nasa 3.80 ang reproduction number sa Pudtol habang 2.17 naman sa Sta. Ana hanggang nitong Nobyembre 5.

Bukod dito, nasa 100 percent na rin ang healthcare utilization rate sa Santa Ana hanggang nitong Nobyembre 4 at ikinukonsiderang kritikal na rin.

Pumalo naman sa 128.05 ang Avergae Daily Attack (ADAR) sa Pudtol at 51.01 naman sa Santa Ana hanggang nitong Nobyembre 5.

Sa inilabas na datos ng OCTA, nasa downward trend na ang Dumaguete at lubang na parehong areas of concern kamakailan.—sa panulat ni Hya Ludivico