NATIONAL NEWS

Naniniwala si Senate Minority Leader Aquilino “Koko” Pimentel na kailangan na ring ipagbawal ang  Philippine Inland Gaming Operators o online gambling.

Ayon kay Senador Pimentel, ito ay matapos magpag-alamang marami sa mga kabataang Pilipino ang exposed sa nasabing gambling platform.

Sinabi ng mambabatas na napakadali para sa mga Pilipino, pati mga bata, ang makapaglaro sa online gambling.

Binigyang-diin ng Senador na hindi maaaring hayaan ng pamahalaan na malulong ang mga kabataan sa PIGO dahil maaari aniya itong makasira sa kinabukasan ng mga ito.—sa panulat ni John Riz Calata

Makakaasa ang mga customers ng tubig sa Metro Manila at ilang kalapit na probinsya na walang ipatutupad na dagdag-singil sa tubig sa tag-init.

Ito ang tiniyak ng Metropolitan Waterworks and Sewerage System sa harap ng inaasahang mataas na demand ng tubig kapag opisyal nang idineklara ang tag-init na panahon.

Sa Bagong Pilipinas Ngayon briefing sinabi ni MWSS Deputy Administrator James Patrick Dizon, na hindi magkakaroon ng pagtaas ng singil sa tubig sa kabila rin ng ipinatupad na adjustment sa tarrif rate ng water concessionaires na Maynilad at Manila Water noong Enero.

Tiniyak ni Dizon na hindi magbabago ang halaga ng babayarang water bill ng mga customer, gayunpaman, pinapayuhan pa rin ang publiko na magtipid sa pagkonsumo para mapanatili ang mababang bayarin sa tubig.

Umapela din ang opisyal sa publiko na inspeksyunin at silipin ang mga linya ng tubig sa kani-kanilang bahay o establisyemento para maagapan at maisaayos agad ang posibleng leak o tagas sa mga sirang linya ng tubig. - sa panulat ni John Riz Calata

Asahan na ang mas mabilis na daloy ng mga bus sa EDSA busway.

Ito ay matapos kumpirmahin ni Transportation Secretary Vince Dizon na 90% ng mga 45-second timers sa EDSA busway terminals ay gumagana.

Dagdag ni Sec. Dizon, upang matiyak na nasusunod ang 45-second lay-by ng mga bus, nagtalaga sila ng Special Action and Intelligence Committee for Transportation Enforcers sa kada North at Southbound station.

Dahil dito, umaasa ang DOTR Chief na susunod ang mga bus operator at driver sa 45-second lay-by.

Kaugnay nito, pinamamadali na ahensya ang pagsasaayos sa mga sira pang station timers. - sa panulat ni John Riz Calata

Nangangailangan ng mahigit 7,000 administrative personnel ang Department of Education sa ilalim ng contract of service.

Alinsunod ito sa DepEd Order Number 002 Series of 2024, na nag-aalis ng administrative tasks sa mga guro.

Ayon kay Education Secretary Sonny Angara, may kabuuang 7,062 na school-based administrative support staff ang ire-renew at tatanggapin sa mga public school.

Sinabi ni Secretary Angara na kukunin ang pambayad para sa mga makukuhang tauhan mula sa inilaang karagdagang pondo ng DepEd para sa Maintenance and Other Operating Expenses o MOOE.

Ang mga administrative personnel ay tutulong sa mga operasyon ng paaralan. - sa panulat ni John Riz Calata

Ibinunyag ng isang Lider ng Kamara na lumawak pa ang tinaguriang “Piattos Gang” o ang listahan ng mga kahina-hinalang pangalan na sinasabing nakatanggap ng confidential funds mula kay Vice President Sara Duterte.

Ayon kay House Deputy Majority Leader at La Union Congressman Paolo Ortega V matapos mabunyag ang pangalan ni Mary Grace Piattos, nadiskubre naman ang mga dagdag na kahina-hinalang pangalan tulad ng Pia Piatos-Lim, Renan Piatos, at Xiaome Ocho, isang pangalang tila hango sa isang modelo ng cellphone.

Giit ni Rep. Ortega, tulad ni Mary Grace Piattos wala ring birth, marriage, o death records sa Philippine Statistics Authority ang mga bagong pangalang ito.—sa panulat ni Kat Gonzales

Binigyang-diin ni Department og Public Works and Highways Secretary Manuel Bonoan na hindi pa nai-tuturn-over sa pamahalaan  ang bumagsak na tulay sa Isabela.

Ayon sa Kalihim, nasa responsibilidad pa rin ng contractor ang nasabing proyekto.

Nasa proseso pa anya ng final testing ang bumagsak na tulay.

Samantala, nagkikipag-ugnayan na ang DPWH sa Association of Structural Engineers of the Philippines upang matulugan silang tukuyin kung ano ang mga dapat gawin sa pagrehabilitate ng tulay.  —sa panulat ni Kat Gonzales

 7 sa 10 Pilipino ang boboto sa mga kandidatong ipinaglalabang tanggalin ang korapsyon sa pamahalaan.

Ayon ito sa commissioned survey ng Social Weather Stations, kung saan 70% ng respondents ang nagsabing sigurado o maaari nilang iboto ang isang kandidatong kontra korapsyon.

Samantala, ang natitirang 30% naman ay maaaring sumaklaw sa mga hindi boboto sa anti-corruption candidates o sa mga naniniwalang hindi ito makakaapekto sa kanilang desisyon.

Consistent ang naturang datos sa resulta ng kaparehong survey noong Enero. —sa panulat ni Roma Molina

Nasagot na ang problema ng mahihirap na lokal na pamahalaan para makakuha ng murang bigas ng National Food Authority o NFA.

Ito’y matapos i-anunsiyo ni Palace Press Officer at PCO Undersecretary Attorney Claire Castro na pinayagan na ng Department of Agriculture at FTI na maaaring utangin muna ng LGU ang bigas ng NFA.

Ayon kay Usec. Castro, binibigyan ang LGU ng isang buwan o 30 araw na pagkakuha sa bigas at bago ito bayaran kapag nabenta.

Isang paraan anya ito para mabilis na maipalabas ng NFA ang bigas.

Gayunman, sinabi ni Castro na hindi pa naman nabanggit ng da kung gaano karaming bigas ang maaaring utangin ng isang lgu at kung paano ang magiging sistema sakaling kumuha pero pagsapit ng isang buwan, hindi lahat ng bigas ay nabenta.

Una nang inihayag ni NFA Administrator Larry Lacson na bagaman nasa 70 LGUs ang naghayag ng interes na kumuha ng NFA rice, napakatumal ng pagpapalabas ng suplay dahil sa mabagal na proseso ng ibang lokal na pamahalaan, habang ang iba ay walang pondo.—ulat mula kay Gilbert {Perdez (Patrol 13)