NATIONAL NEWS

May  legal  at  diplomatikong  tungkulin  ang  pamahalaan  na  makipagtulungan  sa  mga  pandaigdigang  ahensya  tulad  ng  International  Criminal  Police  Organization  o  Interpol  kapag  naglabas ng  warrant of arrest ang International  Criminal  Court laban  kay  dating  Pangulong  Rodrigo  Duterte.

Ito ayon kay Manila 3^rd District Representative Joel Chua at binigyan-diin na kahit umatras  na  ang  Pilipinas  sa  ICC  nananatili  itong  miyembro  ng  Interpol  at  may  obligasyong  sumunod  sa  international  protocols.

Ipinunto ng Kongresista na humingi  ng  tulong  ang  Pilipinas  sa  Interpol  para  hanapin  si  Alice  Guo  at  iba  pang  personalidad  na  sangkot  sa  operasyon  ng  pogo  at  kalakalan  ng  ilegal  na  droga  na  nasa  ibang  bansa.

Hindi naman  anya tama  kung  gagamitin  lamang  ng  Pilipinas  ang  Interpol  para  sa  sariling  interes  at  tanggihan  ang  hiling  na  kooperasyon  mula  sa  pandaidigang  ahensya.

Kaugnay nito, sinabi ng mambabatas na posibleng   pangunahan  ng  Department  of  Justice;  Philippine  National  Police; Department  of  the  interior  and  Local  Government,  at  National  Bureau  of  Investigation   ang  pakikipag -ugnayan  sa  Interpol. —sa panulat ni Kat Gonzales

Pinabulaanan ng Philippine National Police ang balitang nagpakalat sila ng libu-libong tauhan na upang magsilbi ng warrant kay dating Pangulong Rofrigo Duterte.

Ayon kay PNP Spokesperson Brig. Gen. Jean Fajardo, ang deployment ng kanilang tauhan ay bahagi pa rin ng seguridad para sa papalapit na 2025 national elections.

Wala pa rin anyang ginagawang koordinasyon ang interpol sa pambansang pulisya.

Paliwanag pa ng PNP official, kapag may arrest order mula sa isang foreign jurisdiction, kinakailangan pa itong dumaan sa Interpol at ang Interpol naman ang siyang magpapalabas ng blue notice o red notice, na nagsisilbing international alert upang ipagbigay-alam sa law enforcement agencies, na ang isang indibidwal ay may kinakaharap na arrest order.

Matatandaang, napabalitang naglabas na ng warrant of arrest ang ICC laban sa dating pangulo kaugnay sa sinasabing magudong kampanya ng kanyang kanyang administrasyon kontra droga. —sa panulat ni Kat Gonzales

Nagkomento na ang Office of the Solicitor General kaugnay sa petisyon na kumukwestyon sa ligalidad ng 2025 General Appropriations Act.

Sa argumento ng OSG, nanindigan itong walang nilalabag na batas ang 2025 GAA kaugnay sa mga sinasabing blangkong item at hindi pagbibigay ng subsidy sa PhilHealth.

Iginiit ng OSG na kumpleto ang nilalaman ng 2025 national budget na inaprubahan ng Senado at Kamara.

Bukod pa rito, ipinunto pa ng ahensya na hindi nangangahulugang tinanggalan ng right to health ang publiko matapos hindi bigyan ng pondo ang PhilHealth dahil anila ang pagsusulong ng karapatan sa kalusugan ay maaaring gawin sa pamamagitan ng iba pang programa at proyekto ng pamahalaan.

Matatandaang hiniling nila Davao City 3rd District Rep. Isidro Ungab at dating Executive Secretary Vic Rodriguez na ideklara ng Supreme Court ang panukalang pondo bilang unconstitutional.—sa panulat ni Kat Gonzales

Mas kaunting bagyo ang inaasahang mararanasan ng bansa para sa taong 2025.

Ito ang inanunsyo ng PAGASA batay sa climatological o normal average condition ng Pilipinas.

Sa press briefing sa Malacañang, sinabi ni Assistant Weather Services Chief Analisa Solis, na anim hanggang labingtatlong bagyo ang maaaring pumasok sa bansa ngayong buwan hanggang sa Agosto.

Dagdag pa nito, mula sa labing-anim hanggang labing-siyam ang nakikita nilang bilang ng bagyo na papasok sa bansa para sa buong taon, mas mababa ito kumpara sa average na labingsiyam hanggang dalawampung bagyo kada taon.

Sa ngayon, sinabi ni Chief Solis na may la niña alert at patungo ito sa neutral condition.

Kung iko-konsidera aniya ang trend sa nakalipas na 65 araw, bumababa ang bilang ng bagyo na 16 lamang hanggang 19 batay sa average days ng bagyo kapag walang El Niño. —sa panulat ni Alyssa Quevedo

Itinanggi ng Engineer na original designer ng bumagsak na Cabagan-Santa Maria Bridge sa Isabela na hindi design flaw o maling disenyo ang dahilan ng pagbagsak nito.

Ayon kay Engineer Alberto Cañete, naka-ayon ang nasabing imprastraktura sa Bridge Code of the Philippines.

Nakalagpas pa anya ang truck sa siyam na arko bago ito gumuho sa ika-sampung arko.

Binigyan-diin pa ni Engineer Cañete, na kung tunay na mali ang disenyo ng tulay, agad na itong babagsak sa unang arko pa lamang.

Ipinunto pa ni Engineer Cañete na idinisenyo ang nasabing tulay sa ilalim ng 1997 code, gayunman, nagsimula ang paggawa nito nuong 2014, at nuong 2015, ay mayroon ng mga panibagong pamantayan na ipinakilala, na nagpataas ng requirements para sa disenyo ng tulay. —sa panulat ni Alyssa Quevedo

Hiniling ni dating Pangulong Rodrigo Duterte sa mga OFW sa Hong Kong pagawaan siya ng monumento katabi ni Dr. Jose Rizal.

Sa gitna ito ng ulat na may inilabas nang arrest warrant ang ICC laban sa kaniya.

Ayon sa dating Pangulo Duterte, wala na siyang magagawa kung hulihin siya ng otoridad at tatanggapin na lang niya ang magiging kapalaran.

Giit pa ni Duterte dapat siyang pagawan ng monumento ng mga OFW sa tabi ni Rizal.

Gayunman, nandigan ang dating pangulo na wala siyang kasalanan at ginawa lamang niya ang dapat gawin ng isang pangulo. —sa panulat ni Kat Gonzales

Mariing pinabulaanan ng isang Lider ng Kamara ang alegasyong sinadyang pabagalin ng mababang kapulungan ang pag-usad ng impeachment complaint laban kay Vice President Sara Duterte sa Senado.

Ginawa ni House Assistant Majority Leader at Tingog Party-List Rep Jude Acidre ang pahayag bilang reaksyon sa alegasyon ni Senator Cynthia Villar na pinatagal ng kamara ang pagpapasa ng articles of impeachment.

Paliwanag ni Cong. Acidre, masusing pinag-aaralan at hindi maaaring madaliin ang proseso ng impeachment sa mababang kapulungan.

Resbak pa ng Assistant Majority Leader kay Senator Villar at ibang senador na naging kongresista rin na dapat batid ng mga ito bilang dating miyembro ng Kamara ang kumplikadong proseso ng impeachment.

Dagdag pa ni Cong. Acidre na napadali ang transmittal ng articles of impeachment sa senado dahil 215 na miyembro ng Kamara ang pumirma at hindi na ito dumaan pa sa House Justice Committee. —sa panulat ni Kat Gonzales