NATIONAL NEWS

Naniniwala ang mga lider ng Kamara na hindi magtatagal ay haharap na rin si Sen. Ronald “Bato” Dela Rosa sa International Criminal Court kaugnay ng kanyang partisipasyon sa war on drugs campaign na ipinatupad ng administrasyong Duterte kung saan libu-libong biktima ang nasawi.

Ayon kay House Assistant Majority Leader at Tingog Partylist Rep. Jude Acidre, si Dela Rosa ay isa sa mga respondents ng kaso na posibleng susunod na mahahatulan ng ICC.

Iginiit naman ni House Assistant Majority Leader at Ako Bicol Partylist Rep. Jil Bongalon, ang kahalagahan na igalang ang proseso ng batas.

Aniya, isa si Sen. Dela Rosa sa mga pangunahing nagpatupad ng kampanya kontra iligal na droga sa ilalim ng administrasyong Duterte na hindi na nagpakita sa publiko matapos maaresto at dalhin ang dating pangulo sa The Hague, Netherlands.

Kinuwestiyon naman ni deputy majority leader at La Union Rep. Paolo Ortega V, ang biglaang pagkawala ni Dela Rosa, na tahasang nagsabi noon na handa siyang harapin ang ICC.

Binigyang diin ni Cong. Ortega, ang kahalagahang malaman kung nasaan ngayon ang naturang senador.

—sa panulat ni John Riz Calata mula kay Geli Mendez (Patrol 30)

Kumpiyansa ang mga mambabatas sa Kamara na hindi makakaapekto sa impeachment trial ni Vice President Sara Duterte ang pag-aresto kay dating Pangulong Rodrigo Duterte.

Ito ang sinabi ni House Assistant Majority Leader Jil Bongalon, na hiwalay na kaso ang pag-kakaaresto sa dating pangulo mula sa impeachment complaint.

Mawawalan lamang aniya ng mahalagang miyembro ng defense team ang kampo ni VP Sara matapos dahil sa The Hague, Netherlands si dating Pangulong Duterte.

Ipinaliwanag ng mambabatas na hindi pangkaraniwan ang kaso ni Duterte lalo’t siya ang kauna-unahang pilipinong naaresto at lilitisin ng International Criminal Court.

Sinabi ni Bongalon, na kanila nang ipinauubaya sa Korte Suprema ang desisyon sa gagawing hakbang tungo sa pag-abot ng hustisya ng mga pamilyang nawalan ng mga mahal sa buhay.

Tiniyak ng mambabatas ang kahandaan ng prosecution panel dahil regular naman aniya ang pagpupulong para sa nalalapit na paglilitis sa bise presidente.—sa panulat ni John Riz Calata mula kay Geli Mendez (Patrol 30)

Mariing itinanggi ng pambansang pulisya na bagsak ang morale ngayon ng mga pulis at sundalo dahil sa pagkaka-aresto ng ICC kay dating Pangulong Rodrigo Duterte.

Sa isang live discussion sa Malacañang, nanindigan si pnp Spokesperson Bgen. Jean Fajardo na sa katunayan, propesyunal at mataas ang morale ng mga pulis dahil matagumpay na naipatupad ang warrant of arrest laban sa dating pangulo, batay na rin sa utos ng korte o ng ICC sa pamamagitan ng Interpol.

Ayon kay Brig. Gen. Fajardo, hindi rin totoo ang mga kumakalat na impormasyon na may mga pulis na umiiyak habang ipinatutupad ang paghahain ng warrant of arrest kay dating pangulong Duterte.

Paliwanag ni Brig. Gen. Fajardo, maliit lamang ang holding area sa Villamor Airbase kung saan pansamantalang dinala si dating pangulong Duterte. Maraming tao noong panahong iyon, mainit, at lahat ay pawis na pawis.

Ang nakuhanan aniyang video ay isang pulis na nagpunas lamang ng pawis sa mukha na inakala ng mga nakapanood sa video na umiiyak.

Kasabay nito ang panawagan ni Fajardo sa publiko na huwag basta-basta maniniwala sa mga nakikitang video sa social media nang walang kaukulang beripikasyon sa mga awtoridad at iba pang katiwa-tiwalang mga source.—sa panulat ni John Riz Calata ulat mula kay Gilbert {Perdez (Patrol 13)

Itinanggi ng Philippine National Police ang alegasyong nagbitiw sa pwesto ang ilang mga tauhan nito bilang pagsuporta kay dating Pangulong Rodrigo Duterte, matapos arestuhin sa bisa ng warrant of arrest mula sa International Criminal Court.

Ayon kay PNP Spokesperson Brigadier General Jean Fajardo, nirerespeto nila ang iba’t ibang pananaw sa politika ng kanilang mga tauhan ngunit kailangan pa rin aniyang sumunod ng mga ito sa ethical standards.

Samantala, nanindigan ang pambansang pulisya na wala silang ginawang paglabag sa pagsisilbi ng warrant of arrest laban sa dating pangulo.

Dagdag pa ni Brig. Gen. Fajardo na ipinagkaloob nila ang kahilingan ni Duterte kaya nagtagal ng dalawang oras bago ito maisakay sa eroplano papunta sa The Hague, The Netherlands.—sa panulat ni John Riz Calata

Naniniwala ang Malacañang na lubos na mauunawaan ng taumbayan ang naging aksiyon ng pamahalaan kay dating Pangulong Rodrigo Duterte kung malalaman ang proseso kung paano nagsimula at humantong sa pagka-aresto nito.

Ayon kay Palace Press Officer at PCO Undersecretary Claire Castro, hindi lang dapat ang nakakaawang kalagayan ng dating pangulo ang makita bilang naratibo, na aniya’y bahagi na lamang ng dulo ng kuwento.

Sinabi ni Usec. Castro na dapat ay masimulan at makita ng taumbayan ang buong larawan para maunawaan kung bakit nauwi sa ganitong sitwasyon ang mga kaganapan.

Dapat din aniyang maunawaan kung bakit kailangang tumugon ang bansa sa obligasyon nito at commitment sa interpol.

Kumbinsido si Usec. Castro na kapag nakita ng publiko ang kabuuan ng pangyayari ay magiging positibo ang kanilang pananaw sa ginawa ng administrasyon. —sa panulat ni John Riz Calata

Nagbabala si dating Senador Antonio ‘Sonny’ Trillanes IV sa mga gustong maging pinuno ng bansa, kasunod ng pagkakaaresto ni dating Pangulong Rodrigo Duterte sa bisa ng inilabas na warrant ng International Criminal Court.

Ayon kay Trillanes, dapat ay maging aral ang nangyari sa dating pangulo.

Aniya, dapat gamitin ng sinumang magiging lider ng bansa ang kapangyarihan nito para sa ikabubuti at ikauunlad ng mamamayan.

Samantala, umaasa si Trillanes na dadalhin si Duterte sa The Hague Penitentiary Institution o Scheveningen  prison matapos maibigay sa ICC.—sa panulat ni John Riz Calata

Iginiit ng Department of Justice na ligal ang pagkakaaresto ni dating pangulong rodrigo duterte.

Sinabi ni Justice Spokesman Mico Clavano na naaayon sa Rome Statute at International Police ang iba’t ibang rules and protocols for arrest na isinagawa kay Duterte.

Binigyang-diin ni Spokesman Clavano na isandaang porsyentong ligal ang pagkakaaresto ng dating pangulo dahil nasunod din ang local rules of arrest.

Nabatid na dinakip si Duterte matapos maglabas ng warrant issue ng International Criminal Court at kalauna’y dinala sa The Hague, The Netherlands upang harapin ang mga kasong may kaugnayan sa drug war ng kanyang administrasyon. —sa panulat ni John Riz Calata

Pinuna ng tiyuhin ni extrajudicial killing victim Kian Delos Santos ang mga nagsasabing nilabag ng International Police ang karapatan ni dating Pangulong Rodrigo Duterte matapos dalhin sa The Hague, The Netherlands para sa posibleng paglilitis kaugnay sa ‘crimes against humanity.’

Ayon kay Randy Delos Santos, napakabigat isipin na tila si Duterte pa ang nagmumukhang biktima at hindi binibigyan ng karapatang pantao.

Ikinumpara ni Delos Santos ang kanyang pamangkin sa dating pangulo kung saan aniya hindi  ito binasahan ng miranda rights ngunit ang dating pangulo ay mayroong mahuhusay at  edukadong abogado; at binasahan ng karapatan.

Gayunman, nagpapasalamat si Delos Santos dahil malapit nang mapasakamay ng mga biktima ng Duterte administration drug war ang hustisya. —sa panulat ni John Riz Calata

Pinasinungalingan ng Armed Forces of the Philippines ang mga alegasyon na nagkaroon ng kaguluhan, kung saan ang ilan sa kanilang mga tauhan ay nagbitiw sa pwesto, kasunod ng pagkaka-aresto ni dating Pangulong Rodrigo Duterte.

Ayon kay AFP Spokesperson Col. Francel Margareth Padilla, ang pagkakaaresto ni Duterte ay isang executive issue at hindi nila saklaw.

Aniya, sumusunod sila sa Chain of Command at mga demokratikong institusyon ng bansa.

Binigyang-diin ng AFP Official na sa kasalukuyan ay nakatuon ang kanilang atensyon sa pagpapanatili sa pambansang seguridad at kaayusan sa bansa.—sa panulat ni John Riz Calata

Hiniling ni dating Pangulong Rodrigo Duterte na maka-usap ang  isang Consular Officer ng Philippine Embassy sa Netherlands.

Ayon sa Philippine Embassy sa The Hague, nakatanggap sila ng tawag mula sa isang International Criminal Court Detention Officer na ipinapaalam ang kahilingan ng dating pangulo.

Kaugnay nito, ipinarating din anya ng dating pangulo na sumailalim siya sa medical check-up at nakatanggap ng medical care.

Ipinapabatid pa anila ni Duterte na nasa mabuti siyang kalagayan.

Kinumpirma rin ng embahada na naka-usap na ng dating opisyal ang isa mga legal counsel nito na si Atty. Salvador Medialdea.

Samantala, humiling na ang embassy ng consular visit sa Registry of the ICC para sa maasistehan ang dating pangulo sa hiling nitong mapuntahan siya ng kanyang pamilya at legal counsel.—sa panulat ni Kat Gonzales