NATIONAL NEWS

Hihilingin ng legal team ni dating Pangulong Rodrigo Duterte ang pansamantalang paglaya nito mula sa International Criminal Court detention cell sa Netherlands.

Ayon ito kay dating Labor Secretary Silvestre Bello III na isa sa mga tatayong counsel ng dating pangulo.

Binigyan-diin ni Atty. Bello, wala namang dahilan para i-detain ang dating pangulo habang nililitis ang kaso.

Nabatid na alinsunod sa tuntunin ng ICC, ang isang akusado ay maaaring humiling ng pansamantalang pagpapalaya ngunit depende pa rin ito sa ilang mga kundisyon at pagsasaalang-alang.—sa panulat ni Kat Gonzales

Kinumpirma ng mga eksperto na ligal ang isinilbing warrant of arrest kay dating Pangulong Rodrigo Duterte.

Ayon kay Atty. Ralph Sarmiento, Dean ng College of Law ng University of st. La Salle-Bacolod, walang kwestyon sa bisa ng nasabing warrant.

Alinsunod anya sa paggamit ng hurisdiksyon, maaaring isilbi ang warrant sa mga akusado.

Kaugnay nito, nagdesisyon din ang Korte Suprema na nananatiling obligado ang Pilipinas na makipagtulungan sa mga paglilitis sa ICC sa kondisyon na ang proseso ay sinimulan bago ang pag-withdraw ng Pilipinas at ang mga sinasabing krimen ay nangyari noong panahong miyembro pa ang bansa.

Matatandaang inalis ni dating Pangulong Duterte ang Pilipinas sa Rome Statute, ang kasunduan na nagtatag ng ICC, nang simulan ng korte ang imbestigasyon nito noong 2018 at nagkabisa naman ang withdrawal noong 2019. —sa panulat ni Kat Gonzales

Binalaan ni Vice President Sara Duterte ang publiko sa posibleng pandaraya sa 2025 midterm elections, kasunod nang pagkakahuli sa kanyang ama na si dating Pangulong Rodrigo Duterte.

Ayon sa Bise-Presidente, tanging ang buong administrasyong Marcos lamang ang dapat panagutin sa pagkaka-aresto sa dating pangulo.

Tanggalin man aniya ang kanyang ama sa equation at eleksyon, malakas pa rin ang block voting sa siyam na senatorial candidates ng PDP-Laban.

Una nang hinikayat ni Pangulong Ferdinand Marcos Jr. ang publiko na iboto ang lahat ng kanyang pambato sa alyansa para sa Bagong Pilipinas dahil wala sa mga ito ang sangkot sa pagpatay sa drug war campaign, kurapsyon noong pandemya at suporta sa China sa isyu ng pinag-aagawang West Philippine Sea.

Binasag na ni Senator Ronald Dela Rosa ang katahimikan matapos ang sinasabing pagiging missing in action matapos maaresto si dating Pangulong Rodrigo Duterte.

Ayon sa Senador, sinadya niyang patayin ang kanyang cellphone para tutukan ang inihain nilang petition for certiorari sa Korte Suprema.

Alam na anila na may arrest warrant mula sa International Criminal Court, kaya’t inasikaso na niya ito at hindi na sumama sa thanksgiving event na ginanap sa Hong Kong.

Samantala, iginiit ng Senador na handa syang samahan ang dating presidente sa The Hague, Netherlands para maalagaan ito sa kulungan.

Gayunman, magpapa-aresto lamang aniya siya sa ICC kung may warrant of arrest laban sa kanya.

Sa ngayon, sinabi ni Senador Dela Rosa na nananatili siya sa Pilipinas at abala lamang sa pangangampanya sa kabundukan ng Surigao. —sa panulat ni Laica Cuevas ulat mula kay Cely Ortega Bueno (Patrol 19)

Posibleng sina dating PNP Chief Oscar Albayalde at ngayo’y Senator Ronald Dela Rosa na ang sunod na silbihan ng arrest warrant ng International Criminal Court, matapos ang pagkakadakip kay dating Pangulong Rodrigo Duterte.

Ito, ayon kay ICC Assistant to Counsel, Atty. Cristina Conti, ay dahil ang pangalan ng tatlong nabanggit ang nakapaloob sa dokumento ng ICC.

Malinaw aniya na ang dating pangulo ang puno’t dulo ng sinasabing madugong drug war campaign, ngunit hindi rin maiaalis na isa si Senador Dela Rosa sa mga pinaka responsable sa krimen habang pinangalanan din si dating PNP Chief Albayalde sa mga may pananagutan.

Kumbinsido rin ang tumatayong abugado ng mga biktima ng extrajudicial killings na marami pang mauungkat na ebidensya at impormasyon sa pagkakasangkot ng dalawang dating hepe ng pulisya, sa oras na magsimula ang paglilitis sa dating presidente.

Samantala, sinabi pa ni Atty. Conti na may tatlo pang PNP officials na liable sa giyera kontra droga ng nakaraang administrasyon.

Matatandaang sa dokumento mula sa Office of the Prosecutor ng ICC na unang inilabas ng isang dating senadot noong July 2024, pinangalanan din bilang suspek sina dating CIDG Chief Romeo Caramat Jr., dating National Police Commission Commissioner Edilberto Leonardo, at dating PNP Intelligence Officer Eleazar Matta. —sa panulat ni Laica Cuevas

 Nasabat ng National Bureau of Investigation ang animnaraang milyong piso ng luma o expired na karne na ibinibenta pa sa merkado.

Ayon sa NBI-Central Luzon, sinalakay nila ang isang cold storage facility sa Meycauayan, Bulacan, matapos ang impormasyon na ibinebenta pa ang mga sirang karne ng baboy, manok, at baka.

Sinabi ni Atty. Isaac Carpeso Jr., Regional Director ng NBI-Central Luzon, tumambad sa kanila ang kahon-kahong produkto na karamihan ay 2020 hanggang 2022 ang expiration date.

Nadiskubre ng ahensya na nire-reprocess, nire-repack, at nire-relabel pa ang mga produkto para magmukhang bago at inaalok sa malalaking pamilihan.

Para naman sa mga produktong panis na, giniginiling anila ito at ginagawang siomai at hotdog.

Mahaharap sa reklamong paglabag sa Consumer Act of the Philippines in Relation to Food Security Act ang may-ari ng nasabing cold storage facility. —sa panulat ni Laica Cuevas

Itinanggi ng Korte Suprema na naglabas na ito ng temporary restraining order para sa inihaing petisyon nina dating Pangulong Rodrigo Duterte at Senator Ronald Dela Rosa.

Sa 94 na pahinang petisyon, hiniling ng petitioners sa Supreme Court na harangin ang pakikipagtulungan ng pamahalaan sa International Criminal Court at sa imbestigasyon nito sa drug war campaign ng nakaraang administrasyon.

Ayon kay SC Spokesperson, Atty. Camille Ting, bigo ang petitioners na mag-establish ng “clear and unmistakable right” para sa agarang pag-i-isyu ng TRO.

Gayunman, posible pa rin aniya ang paglalabas nito.

Mayroong sampung araw ang respondents, kabilang na si Executive Secretary Lucas Bersamin para mag-komento sa petisyon matapos matanggap ang notice. —sa panulat ni Laica Cuevas

Kumbinsido si Senate President Francis Escudero na rerespetuhin ng International Criminal Court ang mga karapatan ni dating Pangulong Rodrigo Duterte, dahil ginagarantiyahan ito sa ilalim ng rule of law.

Ayon sa Senate Leader, ang maayos at mapayapang pagsisilbi ng warrant of arrest laban sa dating pangulo ay patunay na sumusunod ang Pilipinas sa mga nilagdaang international agreement.

Pagpapakita rin aniya ito ng maturity at propesyunalismo  ng lahat ng panig, mula sa mga law enforcement agencies, kay dating Pangulong Duterte, mga abugado nito at mga taga-suporta.

Para kay Senate President Escudero, mas makabubuti para sa mga Pilipino na magkaisa sa kabila ng magkakaibang paniniwala para maisulong ang katarungan at mapanagot ang sinumang may sala.—sa panulat ni Laica Cuevas ulat mula kay Cely Ortega Bueno (Patrol 19)