NATIONAL NEWS

Kumpiyansa ang Presidential Anti-Organized Crime Commission na mahuhuli  nila ang libu-libo pang natitirang POGO workers sa bansa at malalansag na ang malilit na POGO hubs sa pagtatapos ng kasalukuyang taon o mas maaga pa.

Ayon kay PAOCC Spokesman Dr. Winston Casio, sa kanilang pagtaya, mayroon pang mahigit 9,000 POGO workers na kanilang tinutunton at tinutugis pa sa ngayon.

Kaya magtutuloy-tuloy aniya ang kanilang operasyon para maaresto ang mga ito at maipasara ang scam hubs ngayong taon.

Sa ngayon, sinabi ni Dr. Casio na mayroong halos siyamnaraang foreign detainees sa PAOCC, habang mayroon namang hawak na mahigit 200 iba pa ang Bureau of Immigration.

Tiwala ang PAOCC Official na bago matapos ang taon, wala ng POGO o scam hubs sa bansa.—sa panulat ni Laica Cuevas ulat mula kay Gilbert {Perdez (Patrol 13)

Tiniyak ng DSWD na mahigpit nilang ipatutupad ang guidelines o panuntunan ng Commission on Elections para sa mga programa ng pamahalaan ngayong eleksyon para hindi masamantala o maabuso ng mga pulitiko at kandidato.

Ayon kay DSWD Assistant Secretary at Spokesperson  Irene Dumlao, mayroon silang mekanismo para maiwasan ang anumang political interference o  pag-epal ng mga kandidato.

Nakasaad aniya sa memorandum ng COMELEC sa DSWD, na dapat walang pulitiko o anumang campaign materials na makikita sa pay out activities ng ahensiya para sa mga programang exempted sa election ban.

Bukod dito, may guidance din silang sinusunod sa proseso ng pagtukoy sa mga benepisyaryo ng programa at sa pamamahagi ng kailangang tulong.

Sakali mang may reklamo sa pay out activities, sinabi ni Asec. Dumlao na may grievance mechanism silang ipinatutupad, i-report o ipagbigay lamang ito sa dswd para agad na matugunan.—sa panulat ni Laica Cuevas

Kasado na bukas, March 14, ang imbestigasyon ng senado sa bumagsak na Cabagan-Santa Maria Bridge sa Isabela.

Alinsunod ito sa inihaing resolusyon ni Senate Minority Leader Aquilino ‘Koko’ Pimentel III.

Sisilipin sa pagdinig ang proseso at protocols ng Department of Public Works and Highways sa mga ipinatatayong imprastraktura mula sa pagpaplano, bidding, pagtatayo, pag-iinspeksyon at testing ng public infrastructure projects.

Aalamin din sa imbestigasyon ang mga hakbang ng DPWH laban sa mga mapagsamantala at abusadong contractors na bigong makatupad sa kontrata ng mga proyekto.

Pangungunahan ng Blue Ribbon Subcommitte, sa pamumuno ni Senator Alan Peter Cayetano ang moto propio investigation. —sa panulat ni Laica Cuevas ulat mula kay Cely Ortega Bueno (Patrol 19)

 Iginiit ng Malacañang na kasama sa prerogative ng pamahalaan na tumalima sa commitment sa International Police Organization o Interpol.

Tugon ito ng Palasyo sa mga usaping nasa kapangyarihan ni Pangulong Ferdinand Marcos Jr. na huwag isuko si dating Pangulong Rodrigo Duterte sa International Criminal Court.

Binigyang-diin ni Palace Press Officer at pco Usec. Claire Castro, hindi lang ito tungkol sa pagsuko ng isang Pilipino dahil ibang usapin kung ang isinuko ay akusado sa krimen laban sa sangkatauhan at mayroong kailangang bigyan ng hustisya.

Kung wala aniyang kasalanan ang dating pangulo, due process na maipagtanggol nito ang kanyang sarili, pero kung guilty, hustisya naman ito para sa mga biktima. —sa panulat ni Laica Cuevas ulat mula kay Gilbert {Perdez (Patrol 13)

Dapat tulungan ng pamahalaan si dating Pangulong Rodrigo Duterte, sa kanyang pagharap sa paglilitis ng International Criminal Court.

Ito ang iginiit ni dating Senator Panfilo Lacson, ang second senatorial candidate mula sa alyansa para sa Bagong Pilipinas.

Ayon sa dating Senador, higit sa pagiging isang dating pangulo ng Pilipinas, Pilipino ang dating presidente na nakatakdang litisin sa International Court.

Hindi aniya dapat kalimutan ng pamahalaan ang obligasyon nito na suportahan ang lahat ng Pilipino, kahit na ang mga hinatulan o nahaharap sa kaso sa labas ng hurisdiskyon ng bansa.—sa panulat ni Laica Cuevas

Nanindigan ang Malacañang na trinato nang tama si dating Pangulong Rodrigo Duterte matapos itong arestuhin ng mga otoridad.

Ayon kay Palace Press Officer Claire Castro, hindi totoong pinabayaan ang kalusugan ng dating pangulo at mayroon itong kasamang nurse, doktor at maging mga abogado.

Ipinunto pa ni Atty. Castro na binigyang halaga pa rin ang pagiging dating pangulo ni Duterte nang hulihin ito.

Matatandaang sa serye ng Instagram story ni Veronica Duterte, ilang beses nitong sinabi na pinagkaitan ng proper medical attention ang kanyang ama. —sa panulat ni Laica Cuevas

Tumanggi ang Malacañang na pangunahan ang desisyon ng Korte Suprema sa inihaing petition for writ of habeas corpus ng kampo ni dating Pangulong Rodrigo Duterte.

Ayon kay Palace Press Officer at PCO Usec. Atty. Claire Castro, tanging korte suprema lamang ang makasasagot sa bagay na ito.

Gayunman, sinabi ni Usec. Castro na base sa ilang mga nagdaang katulad na kaso, kapag ang isang taong may kaso ay nadala na sa ibang bansa, nagiging moot and academic na ang petisyon.

Matatandaang naghain ng petition for writ of habeas corpus si dating Presidential Legal Counsel Atty. Salvador Panelo sa ngalan ni dating presidential daughter Kitty Duterte para hilingin sa kataas-taasang hukuman na ibalik sa Pilipinas ang dating pangulo. —sa panulat ni Laica Cuevas

Tiniyak ng Malacañang na mabibigyan ng tulong ng pamahalaan si dating Pangulong Rodrigo Duterte kaugnay ng kinakaharap nitong kaso sa International Criminal Court.

Ayon kay Palace Press Officer at PCO Usec. Claire Castro, ginagarantiyahan ng batas ang pagbibigay ng legal aid sa sinumang Pilipino na nahaharap sa mga krimen sa ilalim ng international law.

Tinukoy ng opisyal ang Republic Act 9851 patungkol sa crimes against international humanitarian law, genocide at iba pang krimen laban sa sangkatauhan.

Sa ilalim nito, sinisiguro na mapo-protektahan ang lahat ng karapatan ng akusado sa patas na paglilitis.

Sinabi ni Usec. Castro na kung magkakaroon ng paglilitis sa kaso ng dating pangulo sa ICC, hindi ito pababayaan ng pamahalaan.

Sa ngayon, wala pang impormasyon ang palasyo kung nakikipag-ugnayan na sa gobyerno ang kampo ng dating presidente.—sa panulat ni Laica Cuevas

Inilabas na ng International Criminal Court ang 15 pahinang warrant of arrest laban kay dating Pangulong Rodrigo Duterte.

Kinakasuhan ng warrant si dating Pangulong Duterte ng crime against humanity.

Salig sa dokumento, kuntento ang mga judge na mayroong reasonable grounds para sabihing ang presidente ang nanguna sa tinatawag na Davao Death Squad at namahala sa law enforcement agencies ng Pilipinas nang maupo bilang lider ng bansa.

Ayon sa mga hukom, may sapat na ebidensya para posibleng panagutin si dating PRRD dahil sa pagpatay ng DDS sa 19 na drug dealers o magnanakaw sa Davao City at 24 na sinasabing kriminal sa ilalim ng kanyang pangangasiwa sa mga otoridad.

Iginiit din ng judges na bagama’t kumalas na ang Pilipinas sa ICC noong 2019, nangyari ang mga sinasabing krimen na laman ng warrant noong miyembro pa ang bansa ng International Tribunal, kaya’t may hurisdiksyon pa ang korte sa mga nabanggit na kaso. —sa panulat ni Laica Cuevas

Nananatiling generally peaceful at under control ang sitwasyon sa buong Pilipinas kasunod ng pagkaka-aresto kay dating Pangulong Rodrigo Duterte.

Tiniyak ng Philippine National Police ang kanilang commitment sa publiko para sa kapayapaan at seguridad sa buong bansa.

Ayon sa pnp, itinaas ang alert status sa heightened alert simula alas-singko ng hapon, kahapon, bilang bahagi ng standard security measures.

Idineploy ang mga pulis sa key areas para masiguro ang kaligtasan ng publiko at kahandaan para sa anumang development kaugnay sa usapin.—sa panulat ni Laica Cuevas