NATIONAL NEWS

Iginiit ng International Criminal Court na mahalaga ang panahon na ito para sa mga sinasabing biktima ng ‘war on drugs’ ni dating Pangulong Rodrigo Duterte.

Binigyang diin ni ICC Chief Prosecutor Karim Khan na importante sa mga biktima ang ginawang pag-isyu ng ICC Ng arrest warrant laban sa dating pangulo.

Dagdag pa nito, hindi man ganoon kalakas ang international law, kung magtitipon-tipon naman ang lahat ay mananaig pa rin ang batas.

Matatandaang lumapag na ang sinasakyang eroplano ni dating Pangulong Duterte sa The Hague, Netherlands kaninang mag-a-alas-dose ng hatinggabi (oras sa Pilipinas).  —sa panulat ni Alyssa Quevedo

Umabot sa 580 ang tinalo ng pambato ng Pilipinas sa spelling bee competition sa United Arab Emirates.

Tinanghal na kampeon ang 14 taong gulang na si Elijah Zachary Dizon Mirandilla.

Ayon kay Elijah, inaral niya ang mahigit apatnalibong salita para umangat sa mga kalaban.

Labis naman ang pasasalamat ni Elijah sa magulang na laging nakasuporta sa kaniya.—sa panulat ni Kat Gonzales

Maaaring kwestyunin ni dating Pangulong Rodrigo Duterte ang legalidad ng arrest warrant sa kanya ng International Criminal Court sa pre-trial chamber.

Ayon kay retired Senior Associate Justice Antonio Carpio, posibleng maghain ang dating pangulo ng isa pang motion for reconsideration sa nasabing korte.

Bukod pa rito, binigyan-diin ng dating hukom na, nasa rules din ng ICC ang pagpapiyansa ngunit anya maaaring mahirapana ang dating pangulo na makuha ito dahil sa sa pagiging “flight risk”.

Gayunman, kung sakaling payagang magpiyansa si Duterte, kakailanganin pa rin  nitong manatili sa The Hague, Netherlands.—sa panulat ni Kat Gonzales

Umaaray na ang ilang pork vendors dahil sa ipinatupad na Maximum Suggested Retail Price (MSRP) ng Department of Agriculture.

Ayon sa ilang tindero ng baboy sa San Andres Market, posibleng huminto na sa pagtitinda ang ilan sa kanila kung magpapatuloy ang msrp dahil anila lugi sila rito at maliit ang kanilang kikitain.

Batay din sa monitoring marami pa sa mga tindero rito ang hindi nakasusunod sa itinakdang msrp na 380 pesos kada kilo sa liempo at 350 pesos kada kilo naman sa kasim o pigue.

Sa nasabing palengke, naglalaro pa rin sa 420 hanggang 430 pesos ang kada kilo  ng liempo habang 380 hanggang 390 pesos naman ang kada kilo ng kasim at pigue.

Giit ng mga nagtitinda rito, mataas pa rin ang presyo ng ibinabagsak na kada kilo ng baboy sa kanila ng mga trader.

Mula nang ipatupad ang MSRP noong Lunes ay nangako ang mga magbababoy na sisikapin nila na mapababa ang presyo ng kada kilo ng karneng baboy basta protektahan ang local producers sa pagbaha ng mga imported pork sa merkado. —sa panulat ni Kat Gonzales

Binigyan-diin ni Vice President Sara Duterte na hindi hustisya kundi oppression at persecution ang ginawang pag-aresto kay dating Pangulong Rodrigo Duterte.

Ayon pa sa Bise Presidente, sapilitang dinala ng mga otoridad ang dating pangulo sa The Hague, Netherlands.

Dagdag pa pangalawang pangulo, lantaran itong pagsuway sa soberanya ng bansa.

Samantala, una nang iginiit nang isa pang anak ng dating pangulo na si Veronica Duterte na sapilitan na pinasakay ng eroplano ang kanyang ama at hindi anya inintindi ng pulisya ang kalusugan nito.—sa panulat ni Kat Gonzales

 Naka-heightened alert na ang Philippine National Police kasunod ng pag-aresto kay dating Pangulong Rodrigo Duterte.

Ayon sa PNP, pinaghahandaan lamang nila ang posibleng pagtaas ng tensiyon matapos mahuli ang dating pangulo.

Layon din anila ng pagtataas ng alerto na maiwasan ang pakakaroon ng kaguluhan.

Nabatid na nagtitipon-tipon ang ilang mga taga-sunod at supporter ni Duterte sa iba’t ibang lugar sa bansa bilang pagpapakita ng suporta sa dating pangulo. —sa panulat ni Kat Gonzales

Kinumpirma ng International Criminal Court na nag-isyu sila ng arrest warrant laban kay dating Pangulong Rodrigo Duterte hinggil sa sinasabing crimes against humanity sa ipinatupad nitong war on drugs.

Ayon kay ICC Spokesman Fadi El Abdullah, kapag nasa kanilang kustodiya na si dating Pangulong Duterte ay saka pa lamang itatakda ang initial appearance hearing nito.

Batay sa ulat ng ICC, laman ng isinilbing arrest warrant sa dating pangulo ay para sa mga kasong pagpatay na nangyari nuong November 01, 2011 hanggang nuong March 16, 2019.

Matatandaang inaresto ng mga otoridad si dating Pangulong Duterte pagkalapag na pagkalapag nito sa Pilipinas galing Hong Kong.—sa panulat ni Alyssa Quevedo

Susundan ni Vice President Sara Duterte ang kanyang amang si dating Pangulong Rodrigo Duterte kahit saan man ito dalhin.

Ayon kay Vice President Sara, pupuntahan niya ang kanyang ama kasama ang mga abugado nito at doon sila mag-uusap kung ano ang kanilang gagawin.

Giit pa ni VP Duterte, hindi naging tama ang ginawang proseso sa paghain ng arrest warrant sa kanyang ama at dapat sa korte sa Pilipinas ito dinala kung saan proseso ng bansa ang masusunod sa pagpapatupad ng nasabing warrant.

Dagdag pa ng Bise Presidente, sinabihan niya ang kanyang ama na huwag tumanggap ng pagkain at tubig kahit kanino at kainin na lamang ang inihandang go bag na inihanda ng kanilang kampo.

Matatandaang hindi pinayagang makapasok ang Bise Presidente sa Villamor Air Base.—sa panulat ni Alyssa Quevedo