NATIONAL NEWS

Walang nakikitang dahilan ang Malacañang para maalarma sa mga isinasagawang pagtitipon at kilos-protesta ng mga tagasuporta ni dating Pangulong Rodrigo Duterte, kasunod ng pagkaka-aresto nito.

Naniniwala si Palace Press Officer Atty. Claire Castro na nakikisimpatya lamang ang mga pro-Duterte supporters sa dating pangulo.

Sinabi rin ni Presidential Communications Office Undersecretary Castro na karapatan ng mga Duterte ang malungkot kaugnay sa naganap ngunit hindi aniya nila hahayaang dumating sa puntong magsisinungaling na ang mga ito upang maimpluwensyahan ang taumbayan.

Nabatid na naaresto si Duterte matapos ilabas ng International Criminal Court ang arrest warrant laban sa kanya dahil sa “crimes against humanity” matapos ipatupad ang drug war campaign. —sa panulat ni John Riz Calata

Minura ni Davao City Mayor Sebastian “Baste” Duterte si Pangulong Ferdinand Marcos Jr. kasunod ng pagkakakulong ng kanyang ama na si dating Pangulong Rodrigo Duterte.

Kasabay nito, isinumbat ni Mayor Duterte kay Pangulong Marcos ang ginawang pagpapalibing ng nakatatandang Duterte sa “ama ng kasalukuyang pangulo” na si dating Pangulong Ferdinand Marcos Sr. sa libangan ng mga bayani, kung saan ang isinukli lamang aniya ni PBBM ay isuko si dating Pangulong Duterte sa International Criminal Court.

Nabatid na noong August 2016 ay pinahintulutan ng nakaraang presidente na ilipat si Marcos Sr. sa libingan ng mga bayani mula sa mausoleum sa Ilocos Norte.

Samantala, kasalukuyang nasa kustodiya ng ICC ang amang duterte dahil sa kasong “crimes against humanity” matapos ipatupad ng kanyang administrasyon ang drug war campaign. —sa panulat ni John Riz Calata

Hinamon ni House Committee on Overseas Workers Affairs Chairman Jude Acidre ng Tingog Party-List ang mga kaalyado ni dating Pangulong Rodrigo Duterte na huwag haluan ng pulitika ang paglilitis ng International Criminal Court kaugnay ng pagpatay sa libu-libong Pilipino ng ipatupad ang war on drugs campaign.

Ayon sa House Majority Leader, ang simpleng argumento sa kinakaharap na kaso ni Duterte ay pumatay ito kaya’t dapat managot sa batas at hindi dapat gawing pulitika ang issue.

Binatikos din ni Acidre ang mga kaalyado ng dating pangulo sa paggamit ng mga mapanlinlang na pahayag upang ipakita na ang kaso sa ICC ay isang pampulitikang pag-atake, sa halip na kanilang harapin ang ligal na merito ng kaso.

Sinang-ayunan din ng kongresista ang pahayag ni Ruben Carranza, Senior Associate sa International Center for Transitional Justice, na kinastigo ang kampo ni Duterte sa kawalan ng malinaw na legal strategy at sa paggamit ng ICC bilang political battlefield. —sa panulat ni Kat Gonzales

Nananatiling ligtas ang Boracay Island sa kabila ng krimen na naganap sa isang abandonadong kapilya rito.

Ini-ulat na nawawala ang turistang Slovak nuong nakaraang linggo at natagpuan itong patay.

Ayon sa Police Regional Office 6, isolated case lamang ang nangyari kay Michaela Michava.

Hawak na ng otoridad ang isang person of interest na nahuli sa hiwalay na drug buy-bust operation.

Pinaghahahanap pa ang iba pang tao ng nakasalamuha ng turista. —sa panulat ni Kat Gonzales

Matapos ang naging pre-trial chamber ng International Criminal Court sa kaso ni dating Pangulong Rodrigo Duterte, hindi nakaligtas ang presiding judge sa pambabatikos ng ilang Pilipino.

Partikular na kinuwestyon ng mga Pilipino ang kredibilidad ni presiding Judge Iulia Motoc ng Romania, sa pamumuno sa pagdinig dahil hindi ito nakakapagsalita ng Ingles na wikang naiintindihan anila ng dating pangulo.

Batay sa mga dokumento ng ICC ang nasabing hukom ay bihasa sa limang wika, ang kanyang sariling wika na Romanian; English; French; Spanish At Italian.

Sa paglilitis, isinasalin sa Ingles ang mga sinasabing ng hukom para kay dating Pangulong Duterte at sa kaniyang legal counsel na si dating Executive Secretary Secretary Salvador Medialdea.

Bukod pa rito, mayroon ding kumalat na fake news kung saan ang nasabing hukom at ang kapwa hukom nitong si Socorro Flores Liera ng Mexico ay sinasabing kakilala at nakasama ni First Lady Liza Araneta-Marcos.

Gayunman, napag-alaman na ang kasama ng unang ginang sa larawan ay mga kapwa Pilipino.

Hindi rin pinalampas ng ilang Pilipino maging ang Linkedin at Facebook page ni presiding Judge Motoc.—sa panulat ni Kat Gonzales

Mariing pinabulaanan ng isang retired International Criminal Court Judge Raul Pangalangan ang sinasabi ng kampo ni dating Pangulong Rodrigo Duterte na iligal ang pagkakaaresto dito.

Ayon kay retired ICC Judge Pangalangan, lehitimo ang pag-aresto sa akusado sa ilalim ng international criminal law.

Ito anya ay upang makadalo ang sinasabing akusado sa korte at litisin dahil hindi pinapayagan ng international court ang “Trial in absentia”.

Binigyan-diin pa ni Atty. Pangalangan na kinakailangan dalhin ang sinasabing akusado kahit pa sa pamamagitan ng pag-aresto, upang legal na matupad ang hustisya. —sa panulat ni Kat Gonzales

Ibinunyag ni dating Philippine National Police Chief Oscar Albayalde na pinaghahandaan niya na rin ang sinasabing pag-aresto sa kaniya ng International Criminal Court.

Binigyan-diin ng dating opisyal, wala siyang magagawa kung mismong pamahalaan na ang magbibigay sa kaniya sa international court.

Gayunman, kumpiyansa pa rin anya siya na hindi hahayaan ng administrasyon na hulihin siya ng ICC ng walang due process.

Samantala, inamin ng dating hepe ng pambansang pulisya na naaapektuhan din ang kanyang pamilya sa pagkakaaretso kay dating pangulong Rodrigo Duterte.

Nabatid na pinalitan ni Albayalde si dating PNP Chief Ronald Dela Rosa ng magretiro ito sa serbisyo. —sa panulat ni Kat Gonzales

Hinimok ni House Assistant Majority Leader at Zambales Rep. Jay Khonghun si Senator Ronald “Bato” Dela Rosa, na harapin ang mga alegasyon sa International Criminal Court kaugnay sa ipinatupad na kampaniya kontra iligal na droga noong siya pa ang hepe ng Philippine National Police o PNP sa ilalim ng administrasyong Duterte.

Ginawa ang paghimok kasunod narin ito ng mga patutsada ng senador sa administrasyong Marcos.

Una nang humingi ng proteksiyon sa Senado si Senador Dela Rosa sakaling ipag-utos ng ICC ang pag-aresto sakaniya.

Sinabi ni Cong. Khonghun, na bilang opisyal ng gobyerno si Dela rosa, tungkulin nito na harapin ang mga inihaing kaso laban sa kaniya.

Matatandaang nanawagan rin ang Makabayan Bloc sa marcos administration na makipag-ugnayan sa ICC  at sundin ang obligasyon ng bansa sa Interpol tungo sa pagkamit ng hustisya at pananagutan. —sa panulat ni John Riz Calata mula kay Geli Mendez (Patrol 30)