NATIONAL NEWS

Nilinaw ng Commission on Elections na walang politiko ang kabilang sa mga mamamahagi ng  voter’s information sheets (VIS) sa buong bansa.

Ayon kay COMELEC Chairman George Erwin Garcia, ang mga local officials ng poll body ang mangunguna sa pamimigay ng mga VIS at hindi ang mga kandidato o opisyal ng mga barangay.

Tiniyak ni Chairman Garcia na mahihirapan ang mga politiko na i-reproduce ang VIS na kanilang inimprenta.

Kaugnay nito, sinabi ng Poll Body Chief na makakatanggap ng tig-iisang VIS Ang bawat rehistradong botanteng Pilipino, kung saan maaari itong gamitin bilang gabay sa pagboto. —sa panulat ni John Riz Calata

Iminungkahi ni Senador Alan Peter Cayetano na sibakin na sa pwesto ang kalihim ng Public Works and Highways na si Manuel Bonoan.

Ito ay matapos gumuho ang bahagi ng Cabagan-Sta. Maria bridge sa Isabela.

Kaugnay nito, ipinahayag ni Senador Cayetano, ang nanguna sa pagdinig ng Senate Blue Ribbon Subcommittee, ang kanyang pagkadismaya sa DPWH sa pangangasiwa sa naganap na insidente.

Napansin ng mambabatas na kung hindi pa nagsagawa ng pagdinig ang senado ay hindi pa ipa-prayoridad ng ahensya ang pagguho ng nabanggit na tulay.

Binigyang-diin din ni Senador Cayetano na kung mayroong kailangang managot ay dapat masimulan kay Secretary Bonoan.

 Samantala, inihirit din ng mambabatas na ipa-subpoena ang Kalihim ng DPWH. —sa panulat ni John Riz Calata

Sumipa ang bilang ng kaso ng measles-rubella o tigdas sa bansa mula noong Enero 1 hanggang Marso 1.

Ito ayon sa Department of Health, ay matapos maitala ang 922 cases ng nasabing sakit, na mas mataas ng 35% kumpara sa 683 na kaso sa kaparehong panahon noong nakaraang taon.

Pinakamaraming kaso ang naitala sa National Capital Region, Cordillera Administrative Region, Ilocos, Bicol, Western Visayas, at Soccsksargen region.

Batay sa datos ng DOH, 68% o  625 mula sa kabuuang bilang ng kaso ng measles-rubella ay mula sa mga batang hindi nabakunahan ng kontra-measles.

Ang measles o tigdas ay isang nakakahawang sakit na posibleng maipasa mula sa pag-ubo at pagbahing.—sa panulat ni John Riz Calata

Kinasuhan na at sinibak sa puwesto ng Bureau of Immigration ang tatlong tauhan nito na sinasabing nagpatakas sa South Korean fugitive na si Na Ikhyeon na wanted dahil sa kasong fraud.

Ayon kay Immigration Deputy Spokesman Melvin Mabulac, nakagigimbal ang nangyaring pagpapatakas kay Na kaya gumugulong na ang masusing imbestigasyon.

Binigyang-diin ni Spokesman Mabulac na hindi basta-basta magpapaniwala ang B.I. sa pahayag ng kanilang dating tauhan dahil kita anila sa CCTV footage na hindi kusang tumakas ang puganteng South Korean.

Samantala, nasa kustodiya na ng mga otoridad si Na, matapos muling maaresto sa Barangay Pampang, Angeles City, Pampanga. —sa panulat ni John Riz Calata

Arestado ng mga otoridad ang 49 na dayuhan sa sinalakay na POGO site sa Pasay City.

Ayon sa Bureau of Immigration, dinakip nila ang mga nasabing foreigner matapos makatanggap ng impormasyon na nag-ooperate ang mga suspek ng fraudulent online hub na nagpapanggap bilang lehitimong digital service.

Nagpag-alaman ng ahensya na target ng mga empleyado ng naturang kumpanya ang mga biktima mula sa Pilipinas at iba pang mga bansa, sa pamamagitan ng digital platforms.

Nabisto rin ng mga otoridad na nagtatrabaho ang mga suspek nang walang visa.

Dahil dito, pinapurihan ni BI Commissioner Joel Anthony Viado ang B.I. at National Bureau of Investigation dahil sa isinagawang operasyon. —sa panulat ni John Riz Calata

Muling pinatutsadahan ni Senador Ronald “Bato” Dela Rosa si Pangulong Ferdinand Marcos Jr. sa ginanap na prayer rally para kay dating Pangulong Rodrigo Duterte.

Tinumbok ni Senador Dela Rosa sa kanyang pasaring ang pakikipag-ugnayan ng pamahalaan sa ICC dahilan upang maaresto si Duterte dahil sa “crimes against humanity” Matapos ipatupad ang drug war campaign noong ito ay pangulo ng Pilipinas.

Iginiit ng mambabatas na wala nang hurisdiksyon ang International Criminal Court sa bansa dahil hindi na ito miyembro ng pandaigdigang korte.

Binigyang-diin ni Senador Dela Rosa na bilang dating hepe ng pambansang pulisya ay alam niya ang papel ng interpol sa mundo kaya hindi aniya siya maloloko ng pangulo.

Nabatid na naaresto si Duterte matapos ilabas ng ICC ang arrest warrant laban sa kanya.—sa panulat ni John Riz Calata

Tinabla ni Prosecutor General Richard Fadullon ang pahayag ni Atty. Salvador Medialdea sa International Criminal Court na kinidnap ng mga awtoridad si dating Pangulong Rodrigo Duterte.

Ito ay matapos arestuhin si Duterte sa bisa ng arrest warrant na inilabas ng ICC laban sa dating pangulo.

Sa panayam ng DWIZ, binigyang-diin ni Prosecutor General Fadullon na maituturing na “misinformation” ang mga sinabi ni Atty. Medialdea sa harap ng korte.

Kaugnay nito, pinasinungalingan din ni Prosecutor General Fadullon ang iginiit ni Senador Bong Go na hindi pinayagan si Duterte na makipagkita sa mga doktor nito noong siya ay arestuhin.—sa panulat ni John Riz Calata

Kumpyansa  si dating Senador Antonio Trillanes IV na hindi makikialam ang law enforcement agencies, partikular na ang Philippine National Police, sa tensyon sa politika sa bansa.

Ayon kay Trillanes, sa panayam ng DWIZ, ito ay matapos ang pagkakaaresto ni dating Pangulong Rodrigo Duterte sa bisa ng arrest warran ng International Criminal Court.

Kaugnay nito, sinabi ng dating Senador na tiwala siyang patuloy nang mare-recover ng pulisya ang magandang imahe nito sa taumbayan.—sa panulat ni John Riz Calata

Naniniwala si dating Senate President Franklin Drilon na posibleng makaapekto sa resulta ng darating na halalan ang pagkaka-aresto kay dating Pangulong Rodrigo Duterte, partikular na sa mga manok ng administrasyon at oposisyon.

Ayon kay Drilon, sa panayam ng DWIZ, ito ay dahil wala pang malinaw na desisyon ang International Criminal Court sa may 12 dahil sa September pa ang susunod na pagdinig ni Duterte sa ICC.

Dahil dito, sinabi ni Drilon na pagalingan nalang ang dalawang kampo sa pagpapaliwanag sa publiko kung may basehan o wala ang pagkaka-aresto ng dating pangulo.

Samantala, naniniwala ang dating lider ng Senado na hindi na mangingialam ang Korte Suprema kaugnay sa nasabing usapin. —sa panulat ni John Riz Calata

 Tinapatan ni dating Senador Antonio Trillanes IV ang mga haka-hakang dumarami na naman ang mga drug syndicates matapos ang termino ni dating Pangulong Rodrigo Duterte.

Sa panayam ng DWIZ, sinabi ni Trillanes na “fake news” ang nasabing naratibo.

Binigyang-diin ng dating mambabatas na mas maraming droga ang pumapasok sa bansa noong nakaraang administrasyon.

Samantala, itinanggi rin ni Trillanes ang pahayag ni Senador Ronald “Bato” Dela Rosa na “betrayal to the max” ang pag-aresto kay Duterte. —sa panulat ni John Riz Calata