NATIONAL NEWS

Malabong pansamantalang malakaya mula sa detention center ng International Criminal Court si dating Pangulong Rodrigo Duterte.

Ito ang iginiit ni International Law Professor Attorney Romel Bagares kasunod ng hirit ng kampo ng dating pangulo at mga taga-suporta nito na ibalik sa bansa si Duterte.

Sa panayam ng DWIZ, sinabi ni Attorney Bagares, na pag-aaralan pang mabuti ng korte ang hirit ng kampo ni Duterte, lalo na’t mabigat ang kinakaharap nitong kaso na crime against humanity.

Nilinaw naman ng abugado na hindi pa itinuturing na akusado si dating Pangulong Duterte.

Samantala, naniniwala rin si Attorney Bagares na wala nang magagawa ang Korte Suprema sa kaso ng dating pangulo.

Hindi man totoong nakakapagpa-”Opo” ang gulay na upo, marami naman itong benepisyo sa katawan ng tao.

Ang upo ay mabisang pampadumi at pampatanggal ng kabag dahil mayaman ito sa fiber na nakakatulong sa paglinis ng bituka.

Bukod dito, nakakapagpababa rin ito ng presyon at blood sugar dahil sa taglay nitong hypotensive effect na nakapagpagaan sa daloy ng dugo.

Pampalakas din ito ng resistensya at mabisang panlaban sa cancer dahil mayaman ito sa  vitamin C, folate, thiamin, niacin, pyridoxine, calcium, iron, zinc, potassium, manganese, at magnesium.

Pampabawas ng pamamaga ng atay, pampapayat, at pampaganda rin ang upo.—sa panulat ni John Riz Calata

 Natapos na ng Commission on Elections ang pag-iimprenta sa halos 69 million ballots na gagamitin para sa 2025 midterm elections.

Ayon sa COMELEC, target nilang masimulan ang distribusyon ng mga nasabing balota sa susunod na buwan kung saan plano nilang unahin ang pagpapadala sa mga malalayong lugar.

Sinabi ni COMELEC Chairman Garcia na wala na silang ibang isyu sa mga balota kundi ang pamamahagi nalang ng mga ito sa iba’t ibang bahagi ng bansa.

Samantala, umabot naman sa anim na milyong balota ang nasayang matapos maglabas ang Korte Suprema ng temporary restraining order na may kaugnayan sa diskuwalipikasyon ng ilang kandidato para sa darating na halalan. —sa panulat ni John Riz Calata

 Nakapagtala ng mahigit apatnaraang kaso ng rabies ang Department of Health noong 2024.

Batay sa datos ng DOH, nagmula ang 45% ng nasabing bilang ng kaso ng ng rabies noong nakaraang taon sa kagat ng alagang hayop; kung saan ang lahat ng ito ay namatay.

Kaugnay nito, sinabi ng ahensya na patunay ito na 100% na nakamamatay ang rabies.

Dahil dito, hinikayat ng DOH ang publiko na iwasan ang paghawak o paglapit sa mga hindi kilalang hayop at pinaalalahanan ang mga pet owner na pabakunahan ang mga alaga taon-taon.

Kabilang sa mga sintomas ng rabies ang lagnat, pananakit ng ulo, pamamaga at pamamanhid ng sugat, takot sa tubig at hangin, pagkairita o pagkabalisa, pagbabago ng isip, at pagkaparalisa. —sa panulat ni John Riz Calata

Naniniwala si dating Vice President Leni Robredo na malaki ang pagkakaiba ng pagkakakulong nina dating senador leila de lima at dating Pangulong Rodrigo Duterte.

Ipinunto ng dating Bise Presidente ang pagkakakulong ni De Lima kung saan halos pitong taon itong napiit sa ilalim ng mahigpit na kondisyon dahil sa pekeng kasong may kinalaman sa droga, habang si Duterte ay nakakulong sa maayos na pasilidad sa The Hague.

Pagkukumpara pa ni Robredo, si Duterte ay may access sa kompyuter at maaaring tumanggap ng dalaw, habang pareho naman itong ipinagkait kay De Lima noong nakakulong pa ito.

Dagdag pa ng dating Bise Presidente na nalagay pa sa panganib ang buhay ng dating senador matapos itong i-hostage sa loob ng kulungan.

Samantala, sinabi ni Robredo na ang pagkakaaresto ni Duterte ay unang hakbang upang makamit ang accountability at hustisya.—sa panulat ni John Riz Calata

Ipinakilala na ni Vice President Sara Duterte ang tatayong lead counsel ni dating Pangulong Rodrigo Duterte sa pagharap nito sa paglilitis ng International Criminal Court kaugnay sa kasong “crimes against humanity”.

Ayon sa Bise Presidente, pangungunahan ni British Lawyer Nicholas Kaufman ang pagdepensa sa kaniyang ama.

Kaugnay nito, kinumpirma ni VP Sara na nakapag-usap na sila ni Atty. Kaufman matapos ang kauna-unahang pagharap ng kanyang ama sa ICC.

Nabatid na kasama rin sa legal team ng dating pangulo ang kanyang dating tagapagsalita na si Atty. Harry Roque at dating Executive Secretary Salvador Medialdea.

Samantala, nakatakdang ganapin ang susunod na pagdinig ng ICC kaugnay sa kaso ng dating lider ng bansa sa September 23, 2025.—sa panulat ni John Riz Calata

Malamig ang naging sagot ni Vice President Sara Duterte matapos tanungin kung tatakbo ba ito sa pagka-presidente sa darating na 2028 elections.

Tanong ng VP Sara, kung may bansa pa ba tayo sa darating na 2028?

Aniya, sa nararanasan ng bansa ngayon ay tila palubog na nang palubog ito.

Sinagot ng Bise Presidente ang katanungan matapos ang pre-trial ng kanyang ama na si dating Pangulong Rodrigo Duterte sa International Criminal Court na nahaharap sa kasong crimes against humanity dahil sa pagpapatupad ng drug war campaign. —sa panulat ni John Riz Calata