NATIONAL NEWS

Inalis na ng Philippine Health Insurance Corporation ang 45 araw kada taon na benefit limit para sa ilang mga karamdaman o kondisyon.

Ayon sa PhilHealth, tatanggalan ng 45-day benefit limit ang mga medical conditions at surgical procedures na kasama sa PhilHealth all case rates, gayundin ang Z Benefits at sustainable related goals-related benefits.

Kaugnay nito, hindi naman kabilang sa nasabing bagong patakaran ang benepisyo para sa hemodialysis patients.

Binigyang-diin ni PhilHealth acting President at Chief Executive Officer Edwin Mercado, na layon ng bagong kautusan na patuloy na mabigyan ng serbisyong pangkalusugan nang walang pag-aalala sa gastusin ang mga Pilipinong nangangailangan ng mahaba-habang pagpapa-ospital.

Kaugnay nito, pinaalalahanan ni PhilHealth Spokesman Dr. Israel Pargas ang mga ospital na sumunod sa bagong patakaran dahil mahigpit anila itong babantayan.

Hinimok din ni Dr. Pargas ang mga pagamutan na tiyaking sumusunod sila sa itinatakdang treatment practice guidelines.—sa panulat ni John Riz Calata

Nangatwiran ang Department of Social Welfare and Development kung bakit tumaas ang bilang ng mga pilipinong nagutom sa unang quarter ng 2025.

Ayon kay DSWD Assistant Secretary Irene Dumlao, isa sa mga dahilan ng pagtaas ng hunger rate sa bansa ay ang pagputok ng Bulkang Kanlaon.

Gayunman, sinabi ni Asec. Dumlao na kinikilala nila ang mga pagsubok na nagaganap sa bansa kung kaya’t ginagawa na aniya nila ang lahat ng hakbang upang mapunan ang mga pangangailangan ng mga pinakamahihirap na sektor.

Nakikipagtulungan na rin aniya ang DSWD sa iba pang mga ahensya ng pamahalaan, partikular na sa Department of Education upang maisama ang kanilang programa sa pagtugon sa problema sa kagutuman, sa pamamagitan ng feeding program.

Nabatid na sa pinakahuling survey na inilabas ng social weather system, 27.2% ng mga Pilipino ang nagsabing nakaranas sila ng gutom sa unang quarter ng taon. —sa panulat ni John Riz Calata

Pinaghahandaan na ng Metropolitan Manila Development Authority ang matinding daloy ng trapiko sa Semana Santa.

Ayon sa MMDA, mahigit dalawang libong kawani nito ang ide-deploy sa iba’t ibang pangunahing kalsada sa Metro Manila.

Bukod sa pagtiyak ng maayos na daloy ng trapiko, tutulong din ang ahensya sa mga pasaherong buntis, nakatatanda at mga pasaherong may bitbitin upang maging mabilis ang kanilang pagsakay at pagbaba sa mga transport terminal.

Tiniyak naman ng mmda na maaayos ang kanilang mga kagamitan tulad ng mga ambulansya na ide-deploy din sa iba’t ibang bahagi ng Edsa.

Nagbabadya sa mga susunod na linggo ang mas mataas na singil sa kuryente.

Ito’y makaraang dumoble nitong Marso ang power rates sa Wholesale Electricity Spot Market (WESM) bunsod ng mababang supply at mataas na demand dahil sa umiinit na panahon.

Sa datos ng Independent Electricity Market Operator of the Philippines (IEMOP), sumirit sa 95.5% o P5.34 centavos per kilowatt-hour ang presyo ng kuryente sa wesm kumpara noong isang buwan kumpara sa p2.73 centavos noong Pebrero.

Ito na sa ngayon ang pinaka-mataas na lebel ng power rate sa nakalipas na pitong buwan o simula noong agosto kung saan naitala ang P5.94 centavos per kilowatt-hour.

Tinukoy ni IEMOP Corporate Planning and Communications Manager Arjon Valencia na dahilan ng increase sa demand ay ang matinding init na naranasan noong unang linggo ng Marso.

Sa kabila nito, tiniyak ng Department of Energy ang sapat na supply ng kuryente ngayong dry season at hindi inaasahan ang yellow at red alerts status sa mga susunod na linggo basta’t hindi papalya ang mga power plant.

Mas bumagal ang inflation rate o galaw ng presyo ng mga bilihin at serbisyo sa bansa nitong Marso.

Batay sa datos ng Philippine Statistics Authority, sumadsad sa 1.8% ang inflation noong nakaraang buwan, na mas mababa sa 2.1% na naitala noong Pebrero.

Paliwanag ni PSA National Statistician at Undersecretary Dennis Mapa, isa sa tinitignang dahilan ng pagbagal ng inflation ay ang paggalaw ng presyo ng food at non-alcoholic beverages kabilang ang bigas at karneng baboy.

Samantala, bumagal din ang antas ng inflation sa National Capital Region sa 2.1% nitong marso mula sa 2.3% noong Pebrero.

Nanganganib numipis ang power supply sa bansa sa kalagitnaan ng tag-init kasabay ng inaasahang paglakas ng konsumo sa kuryente at posibleng pagpalya ng ilang planta.

Ito’y batay sa power outlook report ng isang energy-focused non-government group.

Ayon sa Institute for Climate and Sustainable Cities (ICSC), posibleng kapusin ang power reserves sa Luzon at Visayas grids sa Mayo at Hunyo dahilan upang mapilitan ang National Grid Corporation of the Philippines na magpatupad ng alert status.

Inihayag ni ICSC Chief Data Scientist Jephraim Manansala na bagaman mayroong normal reserves ang Luzon ngayong buwan, simula naman sa Mayo ay maaaring maranasan na ang yellow alerts.

Gayunman, maaaring sa Hunyo pa maramdaman ang mas mahigpit na supply kung saan posible ang pagpapatupad ng mga red alert kaya’t isa sa nakikita nilang solusyon ay higpitan ang pag-export ng kuryente mula Luzon patungong Visayas.

Samantala, maaari namang mapanatili ng Mindanao ang normal reserves at maaaring mag-export ng kuryente sa Visayas upang maiwasan ang red alert status.

Posibleng idiskwalipika ng Commission on Elections ang mga kandidatong gumagamit ng jingle ng mga artista at musikero nang walang pahintulot.

Ito mismo ang kinumpirma ni COMELEC Chairman George Erwin Garcia matapos ibunyag ng lola amour na ginagamit ang kanilang kantang “raining in manila” bilang campaign jingle nang walang permiso.

Maliban sa disqualification, sinabi ni Chairman Garcia sa DWIZ, na maaaring sampahan ng kaso ang mga kandidatong lumabag sa mandato ng ahensya.

Binalaan naman ng Poll Body Chief ang mga kandidatong na iwasang magnakaw o mamirata upang hindi ma-disqualify sa 2025 midterm elections.

Iminungkahi ng isang eksperto na dapat magkaroon na ng psychological test ang mga motoristang kukuha ng driver’s license.

Sa kabila ito ng kaliwa’t kanang road rage sa iba’t ibang lugar sa bansa.

Sa panayam ng DWIZ, sinabi ni Doctor CAmille Garcia, na sa halip na renewal sa mga lisensya, isailalim na lamang sa psychological test at drug test ang mga motorista kada tatlong taon upang maibsan ang away kalsada.

Dismayado rin si Dr. Garcia sa mga pilipinong inuuna ang pagvi-video sa halip na awatin.

Pinayuhan naman ng eksperto ang mga motorista na maging mahinahon sa pagmamaneho at maging defensive driver.