NATIONAL NEWS

Dapat ipakita ni Senator Ronald “Bato” Dela Rosa ang parehong sigasig nito sa pagdalo at pagtugon kapag kailangan at hindi mamili lang.

Ito ang pahayag ni House Committee on overseas Workers Affairs Chairman Jude Acidre ng Tingog Party-List bilang tugon sa biglaang pagdalo ni Dela Rosa kamakailan sa pagdinig ng Senado na pinamumunuan ni Senator Imee Marcos, matapos maglaho ng ilang linggo makaraang arestuhin si dating Pangulong Rodrigo  Duterte kaugnay ng kasong kinakaharap nito sa International Criminal Court.

Ang pagdinig sa Senado ay unang pagkakataon na nakita si Senator Dela Rosa matapos ang ilang linggong pagkawala, na nagdulot ng mga usapin tungkol sa kanyang pinipiling paglutang, kasabay ng tumataas na interes ng publiko sa kanyang papel sa kampanya kontra droga ng administrasyong Duterte.

Nilinaw ni Acidre na tulad ng ibang mga mambabatas, may karapatan at tungkulin si Dela Rosa na dumalo sa mga opisyal na gawain ng mataas na kapulungan, kahit pa panahon ng kampanya.

Ipinunto rin ng assistant Majority Leader ng Kamara na walang ligal na hadlang sa ngayon na pumipigil sa dating PNP Chief na tuparin ang kanyang mga tungkulin bilang mambabatas, at ikinalugod ang kanyang pagbabalik sa mga sesyon ng Senado.

Hinimok ng grupo ng mga magsasaka ang pamahalaan na magpatupad ng mga hakbang upang pigilan ang pagpapataw ng 17% tariff ng Estados Unidos sa mga kalakal ng Pilipinas.

Ayon sa  Federation of Free Farmers, ang mas mataas na taripa ay makakasama sa sektor ng sakahan ng bansa dahil magreresulta ito sa mas mataas na halaga ng mga agricultural export nito.

Giit ng grupo na hindi dapat magpakakampante ang pamahalaan sa ipinataw ng reciprocal tariff kahit pa ang pilipinas ang pangalawang may pinakamababang rate sa mga trade partner ng US.

Kaugnay nito, binigyan-diin ni Agriculture Secretary Francisco Tiu Laurel Junior na sinusuri pa ng kanilang departmento ang epekto ng desisyon ng administrasyong Trump na magpataw ng 17% na taripa sa mga export ng Pilipinas sa US.—sa panulat ni Kat Gonzales

Nakabalik na ng Pilipinas si Vice President Sara Duterte.

Batay sa kanyang tanggapan, lumapag ang sinasakyang eroplano ng pangalawang pangulo sa  Ninoy Aquino International Airport, mag-a-alas diyes ng gabi.

Bukod pa rito, ipinabatid din ng Office of the vice President na tutugunan ni VP Sara ang mga mahahalagang usapin sa mga susunod na araw.

Una rito, sinabi ng Bise Presidente na handa na siyang umuwi ng bansa dahil anya, natapos na niya ang kaniyang kinakailangang gawin sa The Hague, Netherlands para sa kanyang ama na si dating Pangulong Rodrigo Duterte.

Matatandaang noong Marso 12 dumating sa The Hague ang Bise Presidente, isang araw matapos maaresto ang kanyang ama dahil sa kasong crimes against humanity na isinampa sa International Criminal Court. —sa panulat ni John Riz Calata

Ipinauubaya na ng Malacañang sa Department of Foreign Affairs ang pagbibigay ng tulong sa dalawampung undocumented Filipino migrants na nakakulong  sa Amerika.

Ito ay kasunod ng immigration crackdown na ipinapatupad ng administrasyon ni us President Donald Trump para mapa-deport ang mga dayuhang kulang sa dokumento at may mga kaso sa Amerika.

Sinabi ni Palace Press Officer Atty. Claire Castro na ang dfa na ang may hurisdiksyon sa nasabing usapin kaya ito na ang kikilos upang asikasuhin ang mga nakakulong na Pilipino.

Dagdag pa ni Usec. Castro na hihintayin ng Palasyo ang report ng DFA tungkol sa kalagayan ng 20 Vundocumented Filipino migrants.—sa panulat ni John Riz Calata

Pinasinungalingan ng Armed Forces of the Philippines na binuwag na ang Vice Presidential Security and Protection Group.

Ayon kay AFP Public Affairs Chief Col. Xerxes Trinidad, ginawa lamang nilang AFP Security and Protection Group ang VPSPG bilang bahagi ng administrative adjustment at upang pag-isahin ang mga security and protection operation.

Tiniyak din ni Col. Trinidad ang matatag at walang humpay na pagbibigay ng proteksyon ng AFPSPG kay Vice President Sara Duterte.

Binuo VPSPG noong June 2022 kasabay ng pag-upo ni Sara Duterte bilang Bise Presidente ng bansa. —sa panulat ni John Riz Calata

Pahihintulutan ng Metropolitan Manila Development Authority ang mga provincial bus na dumaan sa Edsa sa Araw ng Kagitingan, April 9 at sa ilang araw sa Semana Santa, April 16 hanggang 20.

Ayon kay MMDA Chairman Romando Artes, papayagang bumyahe ang mga provincial buses sa Edsa sa April 9 mula alas-dies ng gabi hanggang alas-singko ng umaga; bukas naman sa loob ng bente-kwatro oras ang nasabing kalsada para sa provincial buses mula April 16 hanggang 20.

Sinabi ni Chairman Artes na layon ng direktiba na mapabilis ang biyahe ng mga motorista sa mga nasabing okasyon.

Nauna nang sinabi ng MMDA na magtatalaga sila ng mahigit 2,500 personnel sa mahal na araw.—sa panulat ni John Riz Calata

Kumpleto na ang core defense team ni dating Pangulong Rodrigo Duterte para sa kanyang kasong crimes against humanity sa International Criminal Court.

Ito ay ayon sa Lead Legal Counsel ng dating pangulo na si Nicholas Kaufman, kung saan sinabi rin nito na hindi kabilang sa nasabing defense team si dating presidential Spokesman Harry Roque.

Sinabi ni Atty. Kaufman na hindi maaaring makasama sa defense team ni Duterte si Atty. Roque dahil kasalukuyan itong humihirit ng  political asylum sa The Netherlands.

Nanindigan ang Lead Legal Counsel ng dating pangulo na ipaglalaban niya ito hanggang sa dulo.—sa panulat ni John Riz Calata

Idineklara na ng PAGASA ang pagtatapos ng La Niña.

Ayon sa climate monitoring chief ng pagasa na si Ana Lisa Solis, mararanasan ang enso neutral condition ngayong buwan hanggang sa setyembre o nobyembre.

Gayunman, sinabi ni Solis na batay sa latest El Niño-La Niña probabilistic forecast na inilabas ng Climate Prediction Center, posible pa ring mararanasan ang pagpasok ng la niña sa October hanggang December 2025

Bagama’t, nilinaw ni Solis na malayo pa ito at hindi pa tiyak kaya’t kinakailangan pa rin ang patuloy na pag-monitor sa buwanang updates hinggil sa lagay ng panahon.—sa panulat ni John Riz Calata

Po-protektahan ni Pangulong Ferdinand Marcos Jr. ang mga Pilipino laban sa lahat ng uri ng harassment at pambu-bully ng mga dayuhan sa Pilipinas.

Ito ang tiniyak ng Malakanyang kasunod nang pagkakaaresto sa russian-american vlogger na si Vitaly Zdorovetskiy dahil sa pangha-harass ng mga Pilipino para sa social media content.

Sa Bagong Pilipinas Ngayon, sinabi ni Palace Press Officer Claire Castro na malinaw ang mensahe ng pangulo na hindi nito hahayaan ang mga dayuhan na bastusin ang mga pilipino sa sariling bayan.

Ayon kay Usec. Castro, ito ang dahilan kaya mabilis ang naging aksyon ng mga otoridad sa kaso ni Zdorovetskiy.

Muling namang binigyang-diin ni Usec. Castro na bagama’t welcome ang mga turista sa Pilipinas, hindi ibig sabihin nito na pwedeng gawing katatawanan ang mga pilipino at balewalain ang mga batas ng bansa.—ulat mula kay Gilbert Perdez (Patrol 13)

Dapat lang na makasuhan at mapapanagot ang mga nagpapakalat ng fake news.

Ito ang binigyang-diin ni Executive Secretary Lucas Bersamin sa harap anya ng napakasaklap na epekto na idinudulot ng mga kumakalat na pekeng balita at impormasyon.

Ayon kay ES Bersamin, nagdurusa ang buong mundo sa matinding epekto ng panlilinlang na nagmumula sa mga pekeng balita kaya dapat lang aniyang masampahan ng kaukulang kaso ang mga nagpapakalat ng fake news.

Nauna ng sinabi ni Presidential Communications Office Undersecretary Claire Castro na mismong si Pangulong Ferdinand Marcos Jr. ay aminadong naaalarma na sa matinding pagpapakalat ng pekeng balita.

Dahil dito, gumagawa na rin ng hakbang ang national bureau of investigation para makipag-ugnayan sa Interpol upang ma-extradite ang mga fake news peddlers na nasa ibang bansa.—ulat mula kay Gilbert Perdez (Patrol 13)