NATIONAL NEWS

Magtutuloy tuloy ang pagsasagawa ng Metropolitan Manila Development Authority ng mga road clearing at cleaning operations ngayong Semana Santa.

 Layon ng ahensyang siguruhing may maayos na daraanan ang mga sasakyan sa ibang mga ruta, dahil magkakaroon ng mga road-reblocking sa mga pangunahing kalsada.

Ayon kay MMDA Chairman Atty. Don Artes, bukod sa mahigit na 2,000 Traffic Personnel na ipakakalat, ay maglalaan din ng mahigit sa apat na raang assets kabilang ang mga tow trucks, motorcycles, patrol cars at iba pa.

Kaugnay nito, sisiguruhin din ng MMDA na aktibo ang kanilang Command Center sa lungsod ng pasig para sa bente kwatro oras na real-time CCTV surveillance upang ma-monitor ang sitwasyon sa buong Metro Manila sa kasagsagan ng Semana Santa.

Kasado na ngayong buwan ang taas-sahod sa dalawang rehiyon sa bansa.

Batay sa inilabas na wage order, epektibo na simula noong Abril 5 ang umento sa sahod para sa mga minimum wage earners at kasambahay sa Bicol region.

Sa ilalim nito, 415 pesos na ang daily minimum wage rate sa rehiyon habang 6,000 pesos naman ang buwanang minimum wage rate para sa mga kasambahay.

Ipatutupad naman sa Abril 15 ang ikalawang tranche ng taas-sahod sa Central Luzon.

Dahil dito, magiging 500 hanggang 550 pesos na ang minimum wage sa non-agriculture sector sa Bataan, Bulacan, Nueva Ecija, Tarlac at Zambales sakaling makumpleto ang dalawang tranche ng umento sa sweldo.

Nasa P485 hanggang P520 pesos naman ang minimum wage rates sa agriculture sector sa rehiyon habang P435 hanggang P540 pesos naman sa retail at service establishments.—sa panulat ni Kat Gonzales

Gagawa ng kasaysayan ang Pilipinas para sa Inaugural National Pavilion nito sa World Art Dubai 2025.

Tampok sa nasabing event ang 11 Filipino-owned galleries at companies, na kumakatawan sa 45 artist mula sa Pilipinas; UAE; Italy; Switzerland; Canada, at United states.

Layon ng exhibit na i-highlight ang Contemporary Filipino Art.

Pinangunahan ng Filipino Artist at Gallerist na si Carlo Garrido ang nasabing programa sa pakikipagtulungan na rin sa tribe, isang grupo ng mga Filipino creative na nakatira sa UAE.

Ang tribe ay tumatakbo bilang isang Subcommittee ng Philippine Business Council Dubai at Northern Emirates, na nagsusumikap na magbigay ng isang pandaigdigang plataporma para sa Sining ng Filipino.

Inaasahang dadalo na ngayong araw sa ikatlong pagdinig ng House Tri-Committee ang mga vlogger at Social Media Influencers na inimbitahan ng komite kabilang na sina Jose “Jay” Yumang Sonza; Krizette Laureta Chu; Mark Lopez; Mary Jane Quiambao Reyes; at dating Press Secretary at Vlogger na si Atty. Trixie Cruz-Angeles.

Ang nasabing pagpupulong ay pangungunahan ni Laguna Rep. Dan Fernandez, ang Chairman ng House Committee on Public Order and Safety.

Inaasahan rin ang pagdalo ng mga kinatawan ng mga ahensya ng gobyerno at ang mga miyembro ng mga social media platforms gaya ng Google, Meta, at Tiktok upang sagutin ang mga nakalatag na tanong ng mga mambabatas.

Layon ng panel na matukoy ang pananagutan ng ilang mga content creator at influencers sa pagpapakalat ng fake news, kung ang kanilang mga content ay ginagamit  para linlangin ang publiko at putaktehin ang mga kalaban sa politika; kung papaano pinopondohan ang ganitong uri ng organisasyon; maging ang mga hakbang na gagawin laban sa pagkalat ng mga maling impormasyon nang hindi nalalabag ang freedom of speech.

Nilinaw ng Kamara na ang imbestigasyon ay isang hakbang upang makagawa ng angkop na regulasyon na may kaakibat na parusa sa mga indibidwal na sadya at paulit-ulit na nagpapakalat ng mga maling impormasyon.—ulat mula kay Geli Mendez (Patrol 30)

Kinumpirma ni Palace Press Officer Undersecretary Claire Castro na ibinasura na ng Qatari government ang kaso ng 17 Pilipino na inaresto matapos nagsagawa ng illegal na demonstrador.

Ayon kay Undersecretary Castro, nakausap na ni Pangulong Ferdinand Marcos Jr. ang Qatari Ambassador na si Ahmed Bin Saad Al-Homidi upang i-abswelto ang 17 Pinoy.

Sinabi anya ni Al-Homidi na reflection ito ng matatag na pagkakaibigan ng dalawang bansa.

Matatandaang inaresto ang 17 OFW noong March 27 sa Qatar matapos mag-kilos protesta bilang suporta sa panawagan ng mga Pilipino sa iba’t ibang bansa na pauwiin na sa Pilipinas si dating Pangulong Rodrigo Duterte na nakakulong sa Netherlands. —ulat mula kay Gilbert Perdez (Patrol 13)

 Iginiit ni former National President Integrated Bar of the Philippines, Attorney Domingo Cayosa na hindi dapat gamiting dahilan ng Senado ang midterm elections para makailang-ulit na i-unsyame ang impeachment trial ni Vice President Sara Duterte.

Sa panayam ng DWIZ, sinabi ng Abogado, na isa sa nakikita nitong dahilan ng pag-unsyami sa impeachment trial ni VP Sara ay ang usaping politika.

Isa rin sa nakikitang anggulo ng Law Expert ang paparating na midterm elections sa mayo lalo na’t takot ang ilang Senador na mabahiran ang kanilang posisyon hinggil sa impeachment. —sa panulat ni Jasper Barleta

Muling nagsulputan ang mga kahina-hinalang pangalan na sinasabing nakatanggap ng 612.5 million pesos na confidential funds ng Office of the Vice President at Department of Education.

Kabilang sa mga ito ang mga pangalang tila katunog ng mga sikat na artista at high-profile personalities, tulad nina Honeylet Camille Sy, Feonna Biong, Feonna Villegas, Fiona Ranitez, Ellen Magellan, Erwin Q. Ewan, Gary Tanada, at Joel Linangan.

Ayon kay House Deputy Majority Leader Paolo Ortega V, kung paulit-ulit na gumamit ang OVP at DEPED ng mga gawa-gawang pangalan ay dapat mayroong journal kung saan nakasaad ang tunay na pangalan ng mga nakatanggap ng confidential funds.

Nabatid na nitong mga nagdaang linggo lamang ay natuklasan din ang iba pang mga pangalan na hango sa chichirya, cellphone, prutas, at grocery items. —sa panulat ni John Riz Calata

Umabot sa 125 Pilipino na hinihinalang na-recruit na magtrabaho sa scam hub sa ibang bansa  ang naharang ng Bureau of Immigration noong 2024.

Ayon sa B.I., madalas na idinadala ang mga nasabing biktima patungong Malaysia, Cambodia, Laos, at Myanmar.

Karamihan anila sa mga biktima ay pinilit ng kanilang mga recruiter na magpanggap bilang trabahador ng mga Business Process Outsourcing o call center upang makalabas ng bansa.

Kadalasan din anilang nare-recruit ang mga biktima sa pamamagitan ng mga social media advertisement na nag-aalok ng mataas na sahod, gayundin sa Telegram at Facebook.

Sinabi ng ahensya na kabilang sa mga target ng mga trafficker ang mga college graduate mula sa National Capital Region at mga kalapit na lugar, na nasa edad 22 hanggang 40.—sa panulat ni John Riz Calata