NATIONAL NEWS

Tinatayang 115,000 Pilipino ang namamatay kada taon dahil sa mga sakit na dulot ng pag-inom ng alak, paninigarilyo at vape.

Batay ito sa Global Burden study ng Institute for Health Metrics and Evaluation.

Lumabas din sa naturang pag-aaral na ang alak, vape at sigarilyo ay nagdudulot ng ‘widespread disabilities’ at nababawasan din nito ang productivity.

Kaugnay nito, umapela si Philippine Medical Association President Dr. Hector Santos sa Department of Health na isulong ang pangangailangan na palakasin ang mga batas upang maprotektahan ang mga kabataan mula sa naturang epidemic.

Hinimok din ng mga doktor at health advocates sa ilalim ng sin tax coalition, ang mga kandidato na iprayoridad ang pagpapaigting sa health tax policies, na bahagi ng kanilang campaign slogan na “tax yosi, vape, at alak now.”

Kinumpirma mismo ni Department of Migrant Workers Secretary Hans Leo Cacdac na 20 Pilipinong crew members ang lulan ng isang cargo vessel na naharang sa South Korea, matapos masabat ang limampung kahon o dalawang toneladang bigat na cocaine.

Kasalukuyang iniimbestigahan na ng mga awtoridad sa south korea ang mga trabahador na Pilipino, at inaalam pa kung may pagkakasangkot ang mga ito sa insidente.

Napag-alamang nakatago sa compartment ng engine room ng M/V Lunita ang tone-toneladang ilegal na droga.

Ayon sa ulat ng Federal Bureau of Investigation, ang barko ay nagmula sa Mexico at dumaan sa Ecuador, Panama, at China bago dumating sa South Korea.

Samantala, naglaan naman ang shipping company ng abogado para sa mga Pilipinong trabahador habang nakahanda na ring tumulong ang Pilipinas para sa mga nasabing crew members.

Iginiit ng Land Transport Franchising and Regulatory Board na wala pa silang natatanggap na direktiba mula sa department of transportation kaugnay sa pagbabalik-biyahe ng mga unconsolidated jeepney.

Ito’y matapos ang mga ulat na sinabi ni Transportation Secretary Vince Dizon na nagbigay na siya ng direktiba upang makabyahe ulit ang mga jeep na hindi nagpa-consolidate.

Binigyan-diin ni LTFRB Spokesman Atty. Ariel Inton, na posibleng nasa ilalim pa ito ng pag-aaral nang komite.

Samantala, mariin namang tinutulan ng mga transport group na sumailalim sa PUV Modernization ang desisyon ng Kalihim.

Giit ng Liga ng Transportasyon at Operators ng Pilipinas (LTOP), hindi lamang dapat ang 14%  ng mga tsuper at operator na hindi nagconsolidate ang pakikinggan ng departamento kundi maging sila ding mayorya na sumunod na programa.

Nagsanib-pwersa ang Presidential Task Force on Media Security (PTFOMS) at Philippine National Police (PNP) sa paglulunsad ng Media Security Vanguard.

Layon nito na palakasin ang seguridad ng mga mamamahayag sa gitna ng mga banta at hamon na kanilang kinakaharap.

Alinsunod din ito sa direktiba ni Pangulong Ferdinand Marcos Jr. na iprayoridad ang kaligtasan ng mga mamamahayag na may malaking papel na ginagampanan ngayong panahon ng eleksyon.

Binigyang diin ni PTFOMS Executive Director Undersecretary Jose Torres Jr., na mahalagang hakbang ang nasabing programa, na nagpapakita ng masigasig na pagtupad ng task force sa layunin nitong paunlarin at tiyakin ang kaligtasan ng mga kasapi ng media.

Sinabi naman ni Presidential Communications Office Sec. Jay Ruiz na magtatalaga rin ng mga espesyal na grupo na sinanay upang agarang tumugon sa mga pangangailangan ng mga mamamahayag, at maglulunsad ng mga workshop at seminar upang mabigyan sila ng sapat na kaalaman at kakayahan para sa kanilang proteksyon habang ginagampanan ang kanilang tungkulin.

Inaasahang magiging sandigan ang Media Security Vanguard ng mas ligtas at mas maayos na kapaligiran para sa mga mamamahayag sa buong bansa.

Binigyan-diin ng armed Forces of the Philipppine na wala pa silang natatanggap na official report kaugnay sa napabalitang mga Pilipinong inaresto sa cina dahil sa sinasabing pang-eespiya ng mga ito.

Ayon kay AFP Public Affairs Office Chief Col. Xerxes Trinidad, na pa tuluyang nabeberipika ang ulat mula sa isang Chinese state-run news outlet.

Kailangan anya muna nilang magkatanggap ng mga formal report upang marespondehan at makagawa ng mga kinakailangang hakbang para sa tatlong inarestong Pilipino.

Sa kasalukuyan, ipinauubaya muna ng AFP sa Department of Foreign Affairs ang nasabing usapin.—sa panulat ni Kat Gonzales

Nagbabala ang Malakanyang sa mga kandidato na sinasabing gumagamit ng Emergency Cell Broadcast System (ECBS) para sa pangangampanya.

Ginawa ni Palace Press Officer Usec. Claire Castro ang pahayag kasunod ng mga ulat na may ilang kandidato na sinasabing gumagamit ng sistemang ito upang magpadala ng mensahe sa publiko, para sa kanilang pansariling interes.

Iginiit ni Usec. Castro na ang naturang sistema ay dapat gamitin lamang sa mga emergency gaya ng mga kalamidad at hindi dapat inaabuso.

Kaugnay nito, nagsasagawa na aniya ng imbestigasyon hinggil dito ang Department of Information and Communications Technology at National Telecommunications Commission.

Ang ECBS ay isang mahalagang instrumento ng pamahalaan sa pagbibigay ng agarang babala tuwing may sakuna tulad ng lindol, bagyo, o iba pang panganib.—ulat mula kay Gilbert Perdez (Patrol 13)

 Magkakaloob ng 30 araw na bakasyon ang Department of Education sa mga guro sa pagtatapos ng school year 2024-2025.

Batay sa DEPED Department order no. 9, series of 2025, papayagan ang mga guro na magkaroon ng 30-day  ”uninterrupted and flexible” vacation mula April 16 hanggang June 1, 2025, na maaaring tuloy-tuloy o hati-hatiin hanggang sa makumpleto.

Kasama rin dito ang mga guro mula sa Alternative Learning System at Arabic Language and Islamic Values Education.

Binigyang diin naman ni Education Secretary Sonny Angara, na ang bakasyong ito ay isang ‘well-deserved opportunity’ para sa mga guro, maging sa mga mag-aaral upang makapag-relax matapos ang academic year.

Tiniyak ng Department of Transportation na makakabalik muli ang mga unconsolidated jeepney operators at drivers sa mga ruta nito.

Ayon kay Transportation Secretary Vince Dizon, nagbigay na siya ng direktiba hinggil sa hinaing ng mga nagproprotestang drivers.

Gayunman, humingi ng kaunti pang oras si Secretary Dizon para makahanap ng paraan para maging legal ang mga operasyon ng mga ito.

Una nang nangako ang Kalihim na titignan nito ang mabagal na proseso ng franchise consolidation ng mga Public Utility Vehicle matapos mapag-alaman na wala pa sa kalahati ng mga PUV sa bansa ang ‘fully complied’ na sa modernization requirement.