NATIONAL NEWS

Hinimok ni Senate President Francis “Chiz” Escudero ang Economic Managers na paghandaan ang mga posibleng epekto ng 17% taripa na ipinatupad ni US President Donald Trump sa mga kalakal ng Pilipinas na darating sa Amerika.

Isa aniya sa posibleng gawin ng Economic Managers ay irekomenda ang pag-amyenda sa National Tariff and Customs Code of the Philippines, na maaaring gawin sa pamamagitan ng executive order habang naka-recess ang kongreso.

Ang mahirap lamang aniya sa ganitong aksyon ay tila nag-gagantihan ang mga bansa sa pamamagitan ng pagpapataw ng taripa sa isa’t isa, na nagdudulot ng pagtaas ng presyo ng mga produkto.—ulat mula kay Cely Ortega-Bueno (Patrol 19)

Inalmahan ni dating Elections Chief Christian Monsod ang dahilan ng Kongreso sa pag-unsyame sa impeachment trial ni Bise Presidente Sara Duterte.

Sinabi ni Monsod na natanggap ng Senado ang articles of impeachment noong Pebrero 5 ngunit wala namang naging pag-usad dito.

Aniya, napakahalagang usapin ng impeachment trial kay Duterte dahil may kinalaman ito sa katiwalian at pandarambong sa pondo ng publiko.

Ilan sa kanila ang nagsasabing ang dahilan ng pagkaantala ay may kinalaman sa kakulangan sa mga detalye at sa pagpaplano ng mga hakbang na susundan.

Iginiit ng Mambabatas na masyadong mababaw ang mga dahilan ng senado dahil kailangan nito ng agarang aksyon.

Gayunpaman, binigyan diin din ng mambabatas na hindi ito isang malaking isyu, ngunit ipinaalalang ang mga ganitong proseso ay nangangailangan ng masusing pagsusuri at tamang dokumentasyon upang matiyak na ang bawat hakbang ay naaayon sa batas.—sa panulat ni Jasper Barleta

Kinumpirma ng Department of Migrant Workers na pansamantalang pinalaya ng Qatari government ang 17 Pilipinong nagsagawa ng political rally sa nasabing bansa.

Sa press briefing sa Malakanyang, nagpasalamat si DMW Sec. Hans Leo Cacdac sa pamahalaan ng Qatar.

Ginawa aniya ng Qatari government ang hakbang habang patuloy na iniimbestigahan ang pagsasagawa ng mga ito ng kilos-protesta matapos maaresto si dating Pangulong Rodrigo Duterte.

Ayon kay Cacdac, unang pinalaya ang 12 lalaking Pinoy habang sunod namang pinalaya ang limang iba pa na pawang mga babae.

Sinabi ni Cacdac na pinatityak din ni Pangulong Ferdinand Marcos Jr. na mabibigyan ng kaukulang tulong ang mga nabanggit na Pinoy, kabilang ang legal assistance habang sinisiyasat ang nasabing kaso.—ulat mula kay Gilbert Perdez (Patrol 13)

Pinasisiguro ni Pangulong Ferdinand Marcos Jr. na available at maibibigay sa mga tao ang pangangailangan sakalit mangyari na ang pinangangambahang 7.2 magnitude quake sa bansa na noon pa iniabiso ng PHIVOLCS.

Ayon kay OCD Director at Undersecretary Ariel Nepomuceno, nais ng pangulo na tuloy-tuloy ang pagbibigay ng mga kakailanganin ng mga maaapektuhan ng kalamidad gaya ng lindol.

Bukod dito, pinagsusumite din anya sila ng short at long-term solution ng chief executive na kung saan ay sa linggong ito nakatakda ang deadline.

Gayunman, bingyan-diin ni Usec. Nepomuceno na hindi madaling gawin ang pagbalangkas o paggawa ng long-term solution ngunit may susundan naman aniya silang roadmap ukol dito.

Dagdag pa ng opisyal na tuloy-tuloy ang kanilang pakikipag-ugnayan sa pangulo sa tuwing may inaasahang kalamidad sa bansa, kabilang na ang the big one, na bagama’t walang makapagsasabi kung kailan ito magpaparamdam ay kailangan na ding paghandaan. —ulat mula kay Gilbert Perdez (Patrol 13)

Tiniyak ng National Security Council na walang intensyon ang pamahalaan na manghamak o mang-atake ng interes ng ibang bansa.

Kasunod ito ng posibleng pagbili ng F-16 fighter jets sa Amerika.

Ayon kay NSC Assistant Director General Jonathan Malaya na maituturing na bahagi ng modernization program ng Armed Forces of the Philippines ang pagbili ng mga fighter jet, at hindi gagamitin laban sa anumang bansa.

Sa ngayon, wala pa anyang pormal na pag-uusap sa pagitan ng pamahalaang Pilipinas at Amerika kaugnay ng pagbili sa fighter jets, kaya wala pang detalye kung magkano ang gagastusin ng gobyerno at kung saan kukunin ang ipambibili ng mga air assets.

Naniniwala rina ng opisyal na bahagi pa rin ng pangako ng administrasyong trump ang pagbebenta ng fighter jets, para pagtibayin ang “ironclad committment” ng Maynila at Washington sa usapin ng depensa.

Una nang sinabi ng US state department na inaprubahan nila ang pagbebenta sa Pilipinas ng 20 F-16 fighter jets sa halagang $5.58-B.—ulat mula kay Gilbert Perdez (Patrol 13)

 Natapos na ng Supreme Court ang kanilang oral argument kaugnay sa kontrobersiyal na paglilipat ng siyamnapung bilyong pondo ng PhilHealth sa National Treasury.

Kaugnay nito, inatasan ng kataas-taasang hukom ang lahat ng mga sangkot na partido na magsumite ng kanilang memorandum sa loob ng 30 araw.

Sinimulan ang nasabing oral arguments kaugnay sa usapin nuong Pebrero matapos maghain ng petisyon sa Supreme Court ang ilang grupo at indibidwal upang harangin ang paglilipat ng pondo.

Kasunod nito, naglabas ng temporary restraining order ang Korte Suprema upang ipatigil ang paglilipat ng bilyong pisong pondo.

Nabatid nuong ikatlong araw ng oral argument, iminungkahi ni Associate Justice Antonio Kho Junior na dapat ibalik sa PhilHealth ang naunang 60 bilyong pisong isinauli sa pamahalaan.

Aminado si dating Presidential Spokesman at International Criminal Court accredited Lawyer Harry Roque, na malabong pagbigyan ng ICC ang hihilingin na interim release para kay dating Pangulong Rodrigo Duterte.

Ayon kay Atty. Roque, wala pang napapalaya na directly accused ng crimes against humanity o war cimes.

Gayunman, binigyan-diin ng abugado na maghahain pa rin ang legal team dating pangulo ng interim release para rito.

Samantala, iginiit ng ICC na mayroon silang hurisdiksyon kay dating Pangulong Duterte, ngunit maaari namang kwestyunin sa korte ang ligalidad ng pagsuko sa dating presidente.—sa panulat ni Kat Gonzales

Umakyat na sa 3,085 ang bilang ng mga nasawi sa magnitude 7.7 na lindol sa Myanmar.

Maliban dito, mahigit 4,000 katao rin ang sugatan habang mahigit 300 iba pa ang nawawala.

Ayon sa United Nations, pinalala ng mapaminsalang lindol ang humanitarian crisis sa nasabing bansa, kung saan mahigit 3,000,000 indibidwal ang nawalan ng tirahan at halos 20,000,000 naman ang naapektuhan.

Nagpapatuloy naman ang search and rescue operations sa lugar, ngunit pinangangambahan ng mga awtoridad na madadagdagan pa ang death toll sa malakas na pagyanig.

Ipinauubaya na ng Malacañang sa National Bureau of Investigation ang pasya sa plano nitong makipagtulungan sa Interpol upang pauwiin sa pilipinas ang mga Overseas Filipino na nagkakalat ng fake news.

Ayon kay Executive Secretary Lucas Bersamin, buo ang suporta ng Palasyo sa paghabol at pagpapapanagot sa mga indibidwal o grupo na nagpapakalat ng maling impormasyon at maling balita.

Gayunman, mas mainam aniya na hindi na gumawa ng anumang anunsyo o pahayag ang malacañang hinggil dito dahil posibleng makaapekto ito sa isasagawang operasyon ng NBI.

Iginiit pa ni Executive Secretary Bersamin na dapat lamang na mapanagot ang mga nagpapakalat ng maling impromasyon, lalo’t hindi lamang ang Pilipinas ang nakakaranas nito, kundi ang buong mundo.—ulat mula kay Gilbert Perdez (Patrol 13)

Tiniyak ni Senate President Chiz Escudero na hindi mauuwi sa constitutional crisis ang ginagawang imbestigasyon ng Senate Committee on Foreign Relations sa pag-aresto kay dating Pangulong Rodrigo Duterte.

Ito, aniya ang dahilan kaya’t minabuti niya na ipaubaya sa legal team ng Senado ang hiling ni Senator Imee Marcos na isyuhan ng subpoena ang Executive Officials na hindi sumipot sa ikalawang pagdinig.

Sinopla naman ng Senate President ang sinabi ni senator marcos na nakasalalay ang kalayaan ng Senado sa magiging aksyon sa kanyang naturang hiling.—ulat mula kay Cely Ortega-Bueno (Patrol 19)