NATIONAL NEWS

May libreng sakay din ang Light Rail Transit Authority sa LRT line 2 para sa mga pasahero bilang paggunita sa ika-83 anibersaryo ng Araw ng Kagitingan sa darating na Miyerkules, Abril 9.

Maaaring i-avail ang libreng sakay sa LRT-2 mula ala syete ng umaga hanggang alas nuebe ng umaga at mula ala singko ng hapon hanggang ala siyete ng gabi.

Maliban dito, magkakaloob din ng isang linggong libreng sakay ang LRTA sa mga war veteran at isa nilang companion bilang bahagi ng Philippine Veterans Week.

Ipatutupad ito simula bukas, Abril 5 hanggang 11.

Magkakaloob ang MRT-3 ng isang linggong libreng sakay para sa mga beteranong sundalo at isa nilang kasama.

Ito’y bilang bahagi ng pakikiisa sa Philippine Veteran’s Week at pagdiriwang ng Araw ng Kagitingan.

Ipatutupad ang libreng sakay simula Abril a-singko hanggang a-onse, sa buong oras ng operasyon ng MRT-3, mula 4:30 am hanggang 10:30 pm sa North Avenue station, at mula 5:05 am hanggang 11:09 pm sa Taft Avenue station.

Para ma-avail ang libreng sakay, kinakailangan lamang na magpakita ng mga beterano ng valid identification card mula sa Philippine Veterans Affairs Office sa security personnel ng mga istasyon.

Iniulat ng isang Chinese state media na tatlong Pilipino ang inaresto sa Beijing dahil sa hinihinalang espionage o pang-eespiya.

Batay pa sa naturang report, nadiskubre ng state security authorities ng China ang kaso ng Filipino espionage.

Lumabas sa imbestigasyon na matagal nang nagmamanman ang Philippine Intelligence Agencies at nangangalap ng impormasyon kaugnay sa military deployments ng nasabing bansa.

Sa ngayon, wala pang pahayag hinggil dito ang Philippine Embassy sa China, Department of Foreign Affairs, Department of National Defense, National Security Council, Armed Forces of the Philippines, at Philippine National Police.

Dumami pa ang mga bansang pinatawan ni US President Donald Trump ng taripa mula sa mga  exporting companies.

Ito’y matapos i-anunsyo ni President Trump na magpapataw sila ng taripa upang makabangon muli ang mga magsasaka sa Amerika.

Ayon sa Presidente, ang nasabing taripang ipinataw ay base sa tarrif na sinisingil ng mga bansa sa US.

Kalahati lamang anya ang sinisingil nilang taripa sa Amerika kaya hindi ito maituturing na pang-tapat o ganti.

Kabilang naman sa mga bansang pinatawan ng taripa ang China na 34%; Vietnam, 46%; Taiwan, 32%; Japan, 24%; Pilipinas, 17% at ang Singapore na pinatawan ng 10% tariff.

Tiniyak ng pamahalaan na walang magaganap na rotational brownouts ngayong tag-init.

Ito’y kahit may nakaambang yellow at red alert sa suplay ng kuryente.

Sinabi ni Energy Assistant Secretary Mario Marasigan, na ang yellow alert ay indikasyon lamang ng pagnipis ng reserbang kuryente ngunit hindi ito nangangahulugan ng power interruption.

Habang ang red alert naman ay nangangahulugan ng mas kritikal na suplay ng kuryente, kaya’t kinakailangang patakbuhin ang iba pang planta o ipatupad ang mga mitigating measures.

Kaya naman, ipinunto ng opisyal na isa sa mga hakbang na inihahanda ng Department of Energy ay ang interruptible load program kung saan ang malalaking establisyemento na may sariling generator ay maaaring gumamit ng kanilang sariling power supply upang maibigay ang suplay ng kuryente sa ibang lugar na nangangailangan nito.

Layon nito na maiwasan ang posibleng rotational brownouts sakaling magkaroon ng red alert.—ulat mula kay Gilbert Perdez (Patrol 13)

Blangko pa rin ang Philippine Embassy sa Yangon, myanmar sa kinaroroonan ng mga nawawalang Filipino matapos ang magnitude 7.7 na lindol noong Biyernes.

Ayon sa embahada, nakipag-pulong na ang kanilang composite team sa mga opisyal na nangangasiwa sa search and rescue maging sa Mandalay General Hospital.

Ito’y upang mabatid kung mayroong mga na-rescue o narekober na dayuhan sa gumuhong Sky Villa building sa Mandalay City.

Nakausap na rin ng team ang 11 Pilipinong nakaligtas sa pagguho ng nasabing gusali.

Nagpapatuloy ang search and retrieval operations sa naturang lugar.

Nilangaw o walang dumalo na resource person sa panibagong hearing ng Committee on Foreign Relations kaugnay sa pag-aresto kay dating Pangulong Rodrigo Duterte.

Tanging dumating lang sa hearing si Attorney Alexis Medina mula sa academe at dalawang abogado ng Securities and Exchange Commission (SEC).

Nagbiro si Senador Imee Marcos na kakanta at sasayaw na lang ni Senator Ronald Bato Dela Rosa dahil hindi sumipot ang mga imbitadong executive officials.

Inirekomenda naman Senador Dela Rosa na ipa-subpoena ang mga opisyal matapos tumangging dumalo sa pagdinig.

Una nang lumiham si Executive Secretary Lucas Bersamin kina senate president francis chiz escudero at  Senador Marcos na hindi padadaluhin ang mga imbitadong executive officials.

Katwiran ni Bersamin na nasagot na ng mga opisyal ng gobyerno ang mga tanong hinggil sa pag-aresto kay dating Pangulong Duterte. —ulat mula kay Cely Ortega-Bueno (Patrol 19)

Tumaas ng mahigit 70% ang mga scam call sa bansa nitong unang quarter ngayong taon.

Batay sa datos ng anti-scam application na Whoscall, umabot sa 351,699 ang nakakatanggap ng scam call, na mas mataas kumpara sa 201,760 na naitala noong huling quarter noong 2024.

Ayon kay Gogolook Philippines Country Head Mel Migriño, Whoscall App Developer, bukod sa text scam, lumipat na ang mga scammer sa scam call o mang-iscam sa pamamagitan ng tawag sa social media platforms tulad ng Viber.

Dahil dito, hinimok ni Migriño ang National Telecommunications Commission at cybercrime investigation and Coordinating Center na i-update ang mga miyembro ng mga platform upang maiwasan.

Pinabulaanan ng Department of Social Welfare and Development ang mga ulatna mayroon silang bagong programa.

Ayon sa DSWD, wala silang programang ‘card program’ na sinasabing nagbibigay ng 10 kilo ng bigas at 5,000 pesos.

Giit pa ng ahensya, isa itong fake news at sakaling makakita ng kahina-hinalang post o mensahe ukol dito ay agad na ipaalam sa kanilang kagawaran.

Pinag-iingat naman ng DSWD ang publiko hinggil dito at nagpaalalang huwag magpapaloko sa mga ulat na hindi naman galing mismo sa opisyal na social media account ng kanilang departamento.