NATIONAL NEWS

Tumaas ng mahigit 70% ang mga scam call sa bansa nitong unang quarter ngayong taon.

Batay sa datos ng anti-scam application na Whoscall, umabot sa 351,699 ang nakakatanggap ng scam call, na mas mataas kumpara sa 201,760 na naitala noong huling quarter noong 2024.

Ayon kay Gogolook Philippines Country Head Mel Migriño, Whoscall App Developer, bukod sa text scam, lumipat na ang mga scammer sa scam call o mang-iscam sa pamamagitan ng tawag sa social media platforms tulad ng Viber.

Dahil dito, hinimok ni Migriño ang National Telecommunications Commission at cybercrime investigation and Coordinating Center na i-update ang mga miyembro ng mga platform upang maiwasan.

Pinabulaanan ng Department of Social Welfare and Development ang mga ulatna mayroon silang bagong programa.

Ayon sa DSWD, wala silang programang ‘card program’ na sinasabing nagbibigay ng 10 kilo ng bigas at 5,000 pesos.

Giit pa ng ahensya, isa itong fake news at sakaling makakita ng kahina-hinalang post o mensahe ukol dito ay agad na ipaalam sa kanilang kagawaran.

Pinag-iingat naman ng DSWD ang publiko hinggil dito at nagpaalalang huwag magpapaloko sa mga ulat na hindi naman galing mismo sa opisyal na social media account ng kanilang departamento.

Nasungkit ng Pilipinas ang Destination of the Year sa Routes Asia 2025 awards.

Ayon kay Tourism Secretary Christina Garcia-Frasco, pinapatibay ng parangal ang pangako ng departamento na pahusayin ang aviation partnership; palakasin ang koneksyon at ipakita ang pilipinas bilang isang nangungunang pandaigdigang destinasyon.

Patunay anya ang parangal sa patuloy na pakikipagtulungan ng pamahalaan sa mga strategic partnership.

Ang Routes Asia Awards ay ay isang award-giving body na nakatuon sa kolaborasyon sa pagitan ng mga airlines; airports at opisyal ng turismo.—sa panulat ni Kat Gonzales

Naaresto ng mga otoridad ang ilang empleyado ng Metropolitan Manila Development Authority payroll division matapos mabuking na iligal na binabawasan ang sahod ng kanilang mga tauhan.

Batay sa inisyal na imbestigasyon, kumukuha ang mga supek ng maliliit na halaga sa ilang empleyado at inililipat ito sa kani-kanilang accounts.

Nagawa rin ng mga sangkot na manipulahin ang computerized payroll system ng ahensya.

Mismo namang si MMDA Chairman Don Artes ang tumayong complainant laban sa mga sinasabing suspek habang pinangunahan naman ni mmda general manager procopio lipana ang pag-aresto sa mga sangkot na empleyado.

Sinisimulan na ang inquest proceedings laban sa mga ito at nagsasagawa na ng masusing imbestigasyon ang ahensya.

Tiniyak naman ng MMDA na mananagot sa batas ang mga sangkot na tauhan.—sa panulat ni Kat Gonzales

Maaari pang magpasa ng mga karagdagang ebidensya ang prosecutor ng International Criminal Court laban kay dating Pangulong Rodrigo Duterte.

Ito ang binigyan-diin ni ICC Spokesman Fadi El Abdallah dahil anya paunang ebidensya lamang ang 43 kaso ng pagpatay at para lamang ito sa aplikasyon ng warrant of arrest.

Paliwanag pa ng ICC Spokesman, ang mahigit 40 nabanggit ay isa lamang halimbawa ng mga insidente na nauugnay sa isinampang kaso upang mapanatili ang akusasyong crime against humanity.

Sa orihinal na aplikasyon para sa warrant of arrest ni dating Pangulong Duterte, binanggit ng ICC Prosecutor ang 45 acts of murder, apat na acts of torture at tatlong acts of rape bilang mga base para sa mga krimen laban sa sangkatauhan na mga kaso na kanilang itinutulak laban sa dating pangulo.

Sinusubukan pa rin ni dating Presidential Spokesman Harry Roque na makapasok ng International Criminal Court detention facility upang maka-usap si dating Pangulong Rodrigo Duterte.

Ito’y sa gitna ng kanyang pagnanais na maging bahagi ng defense team ng dating pangulo na kasalukuyang nahaharap sa kasong crimes against humanity.

Binigyan-diin ni Atty. Roque, gusto niyang personal na maka-usap ang dating pangulo dahil ito pa rin ang magdedesisyon kung sino ang mga kukuhanin niyang legal counsels.

Mayroon na anya siyang nakabinbing kaso sa lead counsel ni Duterte na si Atty. Nicholas Kaufman para mabisita ang dating pangulo bilang potential counsel.

Una nang sinabi ni Vice President Sara Duterte na hindi parte ng legal team ang kanyang ama ang dating Palace Spokesman dahil nais anya nilang kunin ang mga abogadong mayroon ang ICC experience at upang makapagfocus si Atty. Roque sa kanyang asylum petition sa The Hague, Netherlands.—sa panulat ni Kat Gonzales

Inatasan ni Pangulong Ferdinand Marcos Jr., ang Regional Tripartite Wages and Productivity Board na repasuhin ang sahod ng mga manggagawa.

Sa press briefing, sinabi ni Presidential Communications Office Undersecretary Claire Castro na nire-review na ang sahod sa 16 na rehiyon, habang may ilang rehiyon na rin ang nagtaas ng sweldo.

Binigyang diin naman ni Usec. Castro na sa usapin ng umento sa sahod, kailangang parehong pakinggan ang employers at mga empleyado para makapagbigay ng rasonableng sweldo.

Ginawa ng Palasyo ang pahayag sa harap ng panawagan ng Trade Union Congress of the Philippines na sertipikahang urgent ang panukalang P200 legislated wage hike.

Ayon kay USEC. Castro, sa ngayon ay wala pang tugon hinggil dito si Pangulong Marcos.

Kumpiyansa ang pamahalaan na mahalaga ang diplomatikong pamamaraan ng Pilipinas sa pagtugon sa usapin sa teritoryo.

Sa bagong Pilipinas Ngayon public briefing, sinabi ni National Maritime Council Spokesman Alexander Lopez na ang diplomatikong hakbang ng pamahalaan ay nagpapatibay hindi lamang sa ugnayan nito sa mga kasalukuyang treaty allies, kundi maging sa pagkakaroon ng bagong kaalyado.

Ayon kay Spokesman Lopez, ang estratehiyang ito ay alinsunod sa direktiba ni Pangulong Ferdinand Marcos Jr., na palakasin ang diplomatic engagement, gayundin ang multilateral at bilateral na pakikipag-ugnayan.

Dagdag pa ng opisyal, patuloy din ang Pilipinas sa pakikipag-usap sa China bilang bahagi ng mga diplomatikong hakbang sa maritime issues. —ulat mula kay Gilbert Perdez (Patrol 13)