NATIONAL NEWS

Kumpiyansa ang pamahalaan na mahalaga ang diplomatikong pamamaraan ng Pilipinas sa pagtugon sa usapin sa teritoryo.

Sa bagong Pilipinas Ngayon public briefing, sinabi ni National Maritime Council Spokesman Alexander Lopez na ang diplomatikong hakbang ng pamahalaan ay nagpapatibay hindi lamang sa ugnayan nito sa mga kasalukuyang treaty allies, kundi maging sa pagkakaroon ng bagong kaalyado.

Ayon kay Spokesman Lopez, ang estratehiyang ito ay alinsunod sa direktiba ni Pangulong Ferdinand Marcos Jr., na palakasin ang diplomatic engagement, gayundin ang multilateral at bilateral na pakikipag-ugnayan.

Dagdag pa ng opisyal, patuloy din ang Pilipinas sa pakikipag-usap sa China bilang bahagi ng mga diplomatikong hakbang sa maritime issues. —ulat mula kay Gilbert Perdez (Patrol 13)

Magbibigay ng tulong ang Office of the Vice President sa mga Pilipinong naaresto dahil sa pagdaraos ng political demonstration sa qatar noong nakaraang linggo.

Ayon kay Vice President Sara Duterte, makikipag-ugnayan ang kanyang tanggapan sa iba pang ahensya upang talakayin kung anong tulong ang maaaring ipagkaloob sa mga naarestong Pinoy.

Una na ring tiniyak ng Malacañang na hindi papabayaan ng pamahalaan ang mga nasabing Pilipino.

Matatandaang inaresto ang 20 mga Pilipino sa naturang bansa dahil sa hindi awtorisadong political demonstration.

Ibinunyag ng pamahalaan na nangunguna ang National Capital Region sa may pinakamataas na bilang ng insidente ng vote-buying sa bansa.

Ito ang sinabi ni Commission on Elections Commissioner Ernesto Ferdinand Maceda batay sa kasaysayan ng mga nakaraang halalan.

Ayon kay Commissioner Maceda, nasa mahigit dalawampung reklamo ang nakahain sa comelec na may kinalaman sa vote-buying.

Pumapangalawa naman ang Region 4-A o Mega Manila sa mga lugar na may mataas na bilang ng vote-buying incidents.

Sa mga probinsya naman, kabilang sa top five ang Palawan, Abra, at Camarines Sur.

Inaalam na ng mga otoridad sa Qatar kung sino ang event organizer sa isinagawang political demonstration ng mga Overseas Filipino Workers sa naturang bansa.

Kasunod ito ng pagkakaaresto ng halos 200 pilipino sa Qatar dahil sa illegal na pagsasagawa ng kilos-protesta kasabay ng kaarawan ni dating Pangulong Rodrigo Duterte.

Sa panayam ng DWIZ, sinabi ni foreign Affairs Undersecretary Eduardo De Vega, na posibleng managot ang event organizer pero walang umaamin kung sino ang nanguna sa ilegal na demonstrador.

Dagdag pa ng DFA Official na maaaring makulong ng tatlong taon ang mga nagsasagawa ng political rally sa Qatar.

Doble-kayod na rin anya ang pamahalaan para mapalaya ang mga Pilipinong inaresto sa nabanggit na bansa.

Kinumpirma ng Malacañang na hindi dadalo ang mga miyembro ng Gabinete ni Pangulong Ferdinand Marcos Jr. Sa ikalawang pagdinig ng Senate Committee on foreign Relations na pinamumunuan ni Senador Imee Marcos.

Ayon kay Executive Secretary Lucas Bersamin, nasagot na ng mga nasabing ospiyal ang mga mahahalagang katanungan kaugnay sa pag-aresto kay dating Pangulong Rodrigo  Duterte.

Naniniwala anya siya na sapat na ang naging pagdalo ng mga ito nuong March 20 at hindi na kailangan pang dumalo ulit dahil naisapubliko na ang detalye sa naunang imbestigasyon.

Binigyan-diin pa ng Palace Official na ayaw nilang makaimpluwensiya o malabag ang sub-judice rule ng korte suprema sa usapin dahil mayroon ng mga petisyon na inihain kaugnay dito.

Nabatid na itinakda ang ikalawang imbestigasyon, bukas, April 3.—sa panulat ni Kat Gonzales

Kinumpirma ng Department of Foreign na mayroon nang mga nakahandang abugado para sa 17 Plipinong nakakulong sa  Qatar kung sakaling kasuhan ang mga ito.

Gayunman, ayon kay Foreign Affairs Undersecretary Eduardo De Vega, na maaaring mapakawalan na ang mga inarestong Pilipino maliban sa organizer ng sinasabing iligal na rally.

Hinihintay na lamang anya na matapos ang police investigation bago pagdesisyunan kung pakakawalan or sampahan ng kaso ang mga ito.

Binigyan-diin din ng opisyal na bagama’t iligal sa nasabing bansa ang kahit anong political rally, hindi naman nanggulo ang mga inaresto at nagtitipon lamang ang mga ito ng nakasuot ng Duterte shirts.—sa panulat ni Kat Gonzales

Ibinunyag Commission on Election na pinakatalamak ang vote buting incidents sa National Capital Region.

Ayon kay COMELEC Commissioner Ernesto Maceda Junior, 34 na reklamo na ang inihain sa kanilang tanggapan na may kaugnayan sa halalan.

23 anya sa mag kasong ito ay sinasabing may kinalaman sa pagbili ng boto at karamihan dito ay naitala sa Metro Manila.

Kaugnay nito, binigyan-diin ng Comelec Official na tinaguriang “Center of Vote Buying” ang nasabing rehiyon nuong  2023 barangay at sangguniang kabataan elections.

Gayunman, tiniyak ni Commissioner Maceda na tinutugunan na nila ang mga inihaing reklamo.—sa panulat ni Kat Gonzales

Sisikapin ng defense team ni dating Pangulong Rodrigo Duterte na hindi na umabot sa trial ang kasong crimes against humanity ng dating pangulo.

Ayon sa Lead Legal Counsel nito na si Atty. Nicholas Kaufman, kukwestyunin nila ang hurisdiksyon ng International Criminal Court dahil anya kumalas na ang Pilipinas sa rome Statute nuong 2019

Bukod pa rito, tintrabaho na rin ng kanilang grupo ang petisyon ng interim release para sa dating pangulo.

Binigyan-diin ni Atty. Kaufman, na may karapatan si Duterte na mapalaya dahil wala sa mga sinasabing banta ng ICC upang hindi palayain ang isang akusado, ang nangyayari sa kasalukuyan.

Gayunman, walang eksaktong araw na sinabi ang abugado kung kailan nila isusumite ang hiling na interim release para sa dating presidente.—sa panulat ni Kat Gonzales

Pinaghahanda ni Armed Forces of the Philippines Chief of Staff Gen. Romeo Brawner Jr. ang Northern Luzon Command sakaling salakayin ng China ang Taiwan.

Naniniwala si Gen. Brawner na hindi maiiwasang madamay ang Pilipinas kung matuloy man ang nasabing pagsalakay.

Ipinunto ng hepe ng AFP na mayroong tinatayang 250,000 na OFW sa Taiwan na kailangan sagipin sakali mang sumiklab alitan sa pagitan ng dalawang bansa.

Nabatid na kahapon lamang ay naglunsad ng military drills ang China sa paligid ng Taiwan. —sa panulat ni John Riz Calata