NATIONAL NEWS

Nanawagan sa Kongreso si Surigao Del Sur Rep. Romeo Momo Sr. Na ipasa na ang panukalang “Philippine building act” kasunod ng malakas na pagyanig sa Myanmar at Thailand.

Ayon kay Rep. Momo, ang panukalang batas ang magtitiyak na handa ang mga bago at kasalukuyang imprastraktura sa bansa laban sa natural hazards.

Layon nitong i-update ang standards kaugnay sa planning, design, construction, occupancy, maintenance at demolisyon ng gusali maging ang pag-streamline sa proseso ng mga building permit.

Ipinunto ng Mambabatas, na dapat magsilbing paalala ang nangyari sa dalawang bansa na maghanda sa mga posibleng scenario partikular ang kinatatakutang “The big one” sa metro manila.

Aniya, mahalagang maging alerto ang mamamayan dahil kailangan ang pagkilos at ang kahandaan sa natural disasters o kalamidad gaya ng lindol, baha, at sunog. —ulat mula kay Geli Mendez (Patrol 30)

Welcome para kay Senate Committee on Ways and Means Chairman Sherwin Gatchalian ang ipinatupad na maximum suggested retail price ng Department of Agriculture sa bigas.

Naniniwala si Senador Gatchalian na ang 45-peso per kilo na MSRP ay magsisilbing daan upang magkaroon ng malaking ipon ang maraming Pilipino.

Dagdag pa ng Mambabatas, magiging malaki ang ginhawang hatid ng nasabing price cap sa mga konsyumer na nahihirapan dahil sa mataas na presyo ng mga bilihin.

Kaugnay nito, hinimok ni Senador Gatchalian ang D.A. na magpatupad ng mahigpit na monitoring protocol upang  matiyak na naipatutupad ang msrp sa lahat ng mga retail outlets.

Umaasa naman ang mambabatas na magpapatuloy ang mas agresibong hakbang ng pamahalaan para mapababa din ang presyo ng iba pang mga pangunahing bilihin sa bansa. —sa panulat ni John Riz Calata

Patuloy ang pakikipag-ugnayan  ng Commission on Elections sa mga financial institution para mapigilan ang digital vote-buying.

Sa Bagong Pilipinas Ngayon, sinabi ni Comelec Commissioner Ernesto Ferdinand Maceda na matagal naman na nilang katuwang ang ilan sa mga pangunahing online banking applications sa bansa kaya naglabas na ang mga ito ng advisory tungkol sa transaction limit.

Ayon kay Commissioner Maceda, maaaring ilabas ang transaction cap ilang araw bago ang halalan dahil sa tinatawag na “gapangan” ng mga kandidato.

Dagdag pa ng COMELEC Official na maaaring ituring na kahina-hinala ang digital cash transaction kung nagpadala ang isang mobile number sa iba’t ibang numero nang magkakaparehong halaga ng pera.

Nagpasalamat naman ang poll body sa Bangko Sentral ng Pilipinas sa inilabas nitong memo sa mga bangko para hindi magamit ang kanilang institusyon sa pandaraya. —sa panulat ni John Riz Calata

Ipinauubaya na ng Malacanang sa Kongreso kung gagamitin sa impeachment trial ni Vice President Sara Duterte ang mga bagong nadiskubreng pangalan kaugnay sa confidential funds ng Office of the Vice President.

Kasunod ito ng bagong inilabas na resibo ng Kamara na binansagang “team grocery” dahil sa mga pangalang Beverly Claire Pampano, Mico Harina, at Patty Ting.

Ayon kay Presidential Communications Office Undersecretary Claire Castro, hindi lang naman ang palasyo ang nagtataka kundi maging ang publiko kung bakit may mga ganitong pangalan sa resibong ibinigay ng OVP.

Bahala na aniya ang mga Kongresista at Senador na magpasya kung gagamitin itong ebidensya sa oras na magsimula ang impeachment proceedings laban kay VP Sara. —sa panulat ni John Riz Calata

Tumanggi nang dumalo ang ilang Cabinet Officials sa susunod na pagdinig ng Senado kaugnay sa pagkaka-aresto ni dating Pangulong Rodrigo Duterte na kasalukuyang nakapiit sa The Hague, Netherlands.

Sa ipinadalang liham ni  Executive Secretary Lucas Bersamin kina Senate President Chiz Escudero at senador Imee Marcos, ipinunto niya ang executive order 464 o executive privilege na nagpapahintulot na huwag isapubliko ang mga napag-usapan sa pagitan ng pangulo, cabinet officials, at presidential advisers.

Dagdag pa ni Sec. Bersamin na naibahagi na ng mga opisyal ng gabinete sa unang pagdinig ng senado ang lahat ng kanilang nalalaman kaugnay sa nasabing isyu.

Ikinalungkot naman ni Senador Marcos, na siyang Chairperson of the Senate Committee on Foreign Relations, ang hindi pagdalo ng mga nasabing opisyal dahil marami pa rin aniyang katanungan hinggil sa usaping pag-aresto sa dating pangulo.

Binigyang-diin din ng mambabatas na hindi “free pass” Ang EO 464 upang hindi basta-basta sumipot ang mga opisyal ng pamahalaan sa pagdinig ng mataas na kapulungan ng Kongreso. —sa panulat ni John Riz Calata

Pumalo na sa 16.63 trilyong piso ang pagkakautang ng Pilipinas ayon sa pinaka huling datos ng Bureau of Treasury sa buwan ng Pebrero 2025.

Ayon sa kagawaran, tumaas ng 1.96% kumpara sa 16.31 trilyong pisong pagkakautang ng bansa noong Enero 2025.

Ang pagtaas ng utang ay sanhi ng net issuance ng domestic at external loan upang pondohan ang mga proyektong pang-imprastraktura at mga programang panlipunan.

Samantala, ang 67.5% ng domestic debt habang ang 32.5% naman ay mula sa mga foreign debt.

Inaasahang magpapatuloy ang mga hakbang ng pamahalaan upang mapababa ang debt-to-GDP ratio at masigurong tama ang pamamahala ng utang. —sa panulat ni Jasper Barleta

Ipinag-utos ni Land Transportation Office Chief Assistant Secretary Vigor Mendoza II ang pag-iisyu ng nasa 11.8 milyong plaka para sa susunod na apat hanggang limang buwan.

Kasunod ito ng direktiba ni Transportation Secretary Vince Dizon na pabilisin ang pag-isyu ng mga motor plates.

Isa ito sa tinalakay ni LTO Chief Mendoza sa idinaos na seminar sa plate and registration management information system.

Ang nasabing seminar ay dinaluhan ng mga pangunahing opisyal ng ahensya na layong maisaayos ang proseso ng pagpaparehistro ng sasakyan at paglabas ng mga plaka.

Dagdag pa ni LTO Chief Assec. Atty. Mendoza, mahalaga ang ipnanukalang “PRMIS”  Para mas maging sistematiko at transparent ang registration.

Makatutulong din ito upang mapabilis ang pag-isyu ng plaka para sa mga bagong biling sasakyan.

Nanawagan si dating Presidential Spokesman Harry Roque sa pamahalaan ng Qatar na magkaroon ng maximum tolerance sa mga Pilipinong inaresto matapos magkilos-protesta.

Binigyan-diin ng dating Palace Official, na ipinakita lamang ng mga pilipino sa nasabing bansa ang kanilang pagmamahal kay dating Pangulong Rodrigo Duterte na kasalukuyang nakakulong sa The Hague, Netherlands.

Giit pa ni Atty. Roque, hindi lamang matanggap ng mga naarestong taga-suporta ng dating pangulo ang nangyaring pag-aresto rito.—sa panulat ni Kat Gonzales