NATIONAL NEWS

Ipinag-utos ni Land Transportation Office Chief Assistant Secretary Vigor Mendoza II ang pag-iisyu ng nasa 11.8 milyong plaka para sa susunod na apat hanggang limang buwan.

Kasunod ito ng direktiba ni Transportation Secretary Vince Dizon na pabilisin ang pag-isyu ng mga motor plates.

Isa ito sa tinalakay ni LTO Chief Mendoza sa idinaos na seminar sa plate and registration management information system.

Ang nasabing seminar ay dinaluhan ng mga pangunahing opisyal ng ahensya na layong maisaayos ang proseso ng pagpaparehistro ng sasakyan at paglabas ng mga plaka.

Dagdag pa ni LTO Chief Assec. Atty. Mendoza, mahalaga ang ipnanukalang “PRMIS”  Para mas maging sistematiko at transparent ang registration.

Makatutulong din ito upang mapabilis ang pag-isyu ng plaka para sa mga bagong biling sasakyan.

Nanawagan si dating Presidential Spokesman Harry Roque sa pamahalaan ng Qatar na magkaroon ng maximum tolerance sa mga Pilipinong inaresto matapos magkilos-protesta.

Binigyan-diin ng dating Palace Official, na ipinakita lamang ng mga pilipino sa nasabing bansa ang kanilang pagmamahal kay dating Pangulong Rodrigo Duterte na kasalukuyang nakakulong sa The Hague, Netherlands.

Giit pa ni Atty. Roque, hindi lamang matanggap ng mga naarestong taga-suporta ng dating pangulo ang nangyaring pag-aresto rito.—sa panulat ni Kat Gonzales

Mayorya ng mga estudyante sa buong bansa ang naniniwala na dapat nang tanggalin sa pwesto si Vice President Sara Duterte.

Sa isinagawang survey ng Center for Studens Initiatives, 84.4% o karimihan sa mga respondent ang nagsabing gusto nilang matanggal sa pwesto ang bise presidente habang 12.2% naman ang hindi at 3.1% naman ang sumagot ng undecided.

40% ng mga respondent ay nasa National Capital Region; 35 porsiyento sa Balanced Luzon; 5% mula sa Visayas, at 10% naman sa Mindanao.

Bukod pa rito, lumabas din sa survey na 73% ng mga respondents na dapat nang mag-convene ang senado ngayon bilang impeachment court sa halip na magsagawa pa ng mga paglilitis habang 19.8% ng mga respondent ang nag-’no’.

Nabatid na ang CSI ay isang student-directed research institution.—sa panulat ni Kat Gonzales

Kinumpirma ng House Prosecution Panel na nagsagawa na sila ng mock trial bilang paghahanda sakaling magsimula na ang impeachment trial ni Vice President Sara Duterte.

Ayon kay San Juan Rep. Yzabel Maria Zamora, isa sa mga miyembro ng 11-man prosecution team, kanilang ipiprisenta ang mga testigo at ebidensya sa kada articles of impeachment pero hindi nito idinetalye ang kanilang magiging presentasyon.

Sinabi ng mambabatas na hindi rin ikukunsidera ng panel ang pagharap nina Pangulong Ferdinand Marcos Jr., First Lady Liza Marcos, at House Speaker Martin Romualdez sa gagawing paglilitis sa kabila ng pagabanta ni VP Sara sa buhay ng mga ito.

Aniya, ang ebidensya ay nasa video nang mag-live noon ang bise presidente.

Kumpiyansa naman si Rep. Zamora na lalong lumalakas ang kaso ng prosecution laban sa bise presidente kaugnay ng humahabang listahan ng kuwestiyunableng mga pangalan na nakinabang sa confidential at intelligence funds ng bise presidente.—ulat mula kay Geli Mendez (Patrol 30)

Kinondena ni Gabriela Party Rep. Arlene Brosas ang patuloy na pagkuwestiyon ni Vice President Sara Duterte sa mga ebidensyang inilatag sa International Criminal Court hinggil sa war on drugs campaign na ipinatupad ng kanyang amang si dating Pangulong Rodrigo Duterte.

Nabatid na kinontra ni VP Sara ang 30,000 drug war victims kasabay ng paggiit na hindi mapapatunayan ang sistematikong pagpatay kung hindi matutukoy ang mga biktima.

Iginiit ni Rep. Brosas na hindi lang ‘insensitive’ kundi pagsasawalang bahala sa hustisya at karapatang pantao ang mga pahayag ng bise presidente.

Binigyan diin ng Mambabatas, na hindi lang basta numero kundi mga pamilyang nawalan ng mahal sa buhay at nakaranas ng karahasan ang 43 counts of murder na may matitibay na ebidensya.

Ipinaalala ng mambabatas sa pangalawang pangulo na dapat din nitong silipin ang kanyang mga isyu gaya ng paghaba ng listahan ng mga kuwestiyonableng pangalang tumanggap ng confidential funds ng kanyang tanggapan. —ulat mula kay Geli Mendez (Patrol 30)

Patuloy ang pagsisikap ng pamahalaan upang masagip ang humigit-kumulang 500 pilipinong naiulat na na-trap sa mga scam centers sa myanmar nitong pebrero.

Sa press briefing sa Malakanyang, sinabi ni Palace Press Officer at Presidential Communications Office Undersecretary Claire Castro na nakahanda ang administrasyon na tumulong sa ating mga kababayang nangangailangan.

Kaya bilang bahagi ng mga hakbang upang maiwasan ang pagpasok ng mga Pinoy sa mapanganib na trabaho sa ibayong-dagat, ibinida ni Usec. Castro na patuloy na nagsasagawa ang gobyerno ng mga job fairs upang makapagbigay ng mas maraming oportunidad sa mga manggagawa.

Umaasa ang Palasyo na sa pamamagitan nito ay mas pipiliin ng mga ito na manatili sa bansa kasama ang kanilang pamilya.

Bukod dito, patuloy ding mino-monitor ng pamahalaan ang sitwasyon ng mga Pilipinong naiipit sa mga illegal na operasyon sa ibang bansa habang pinapalakas ang kampanya laban sa human trafficking at illegal recruitment.—ulat mula kay Gilbert Perdez (Patrol 13)

Kumpyansa ang Lead Legal Counsel ni dating Pangulong Rodrigo Duterte na si Atty. Nicholas Kaufman na may hawak silang matibay na argumento upang maibasura ang kaso ng dating pangulo sa International Criminal Court.

Ayon kay Atty. Kaufman, target niya maipatigil ang pag-usad ng kaso bago pa kumpirmahin ng icc ang mga kaso laban kay Duterte, partikular na ang crimes against humanity dahil sa pagpapatupad ng drug war campaign sa ilalim ng kanyang administrasyon.

Iginiit ng Lead Counsel ni Duterte na wala nang hurisdiksyon sa Pilipinas ang pandaigdigang korte dahil kumalas na ang bansa bago pa magsimula ang imbestigasyon kaugnay sa nasabing isyu.

Dagdag pa ni Atty. Kaufman na siya ay labis na madidismaya sakali mang hindi umubra ang kanilang “jurisdictional argument”.

Nakatakda sa September 23 ang confirmation of charges ng dating pangulo.—sa panulat ni John Riz Calata

Hinimok ng iba’t ibang grupo at indibidwal ang Korte Suprema na ipag-utos sa dalawang kapulungan ng kongreso na bumuo ng isang batas na magbabawal sa pag-iral ng political dynasties sa bansa.

Sa petition for certiorari and mandamus na inihain sa kataas-taasang hukuman nina 1sambayan Rep. Antonio Carpio, Sanlakas Rep. Marie Margerite Lopez, Advocates for National Interest members, at University of the Philippines law class of 1975, humirit ang mga ito na maipasa ang isang batas na tutukoy sa depenisyon ng political dynasties.

Kabilang din sa mga petitioner na lumagda sa nasabing petisyon sina dating Ombudsman Conchita Carpio Morales; dating Commission on Elections Commissioner  Christian Monsod; at dating National Economic and Development Authority Sec. Solita Monsod.

Gayundin ang ilang dating opisyal ng militar; mga obispo at pari; at mga propesor ng University of the Philippines.

Binigyang-diin ng mga petitioner na malinaw na ipinag-uutos ng 1987 Constitution ang pagbabawal sa political dynasties.

Sinisi rin ng mga nasabing grupo at indibidwal ang pagkakaroon ng political dynasty sa pagbagsak ng socio-economic development ng bansa.

Ipinunto ng mga petitioner na batay sa datos mula noong 2006 hanggang 2018, halos 80% ng kongreso at mahigit 50% ng mga  local government official ay mula sa political dynasty.—sa panulat ni John Riz Calata